اتى ايتىپ تۇرعانداي باستاپقىدا فوتوگراف رەتىندە تانىلعان ولەگ بەليالوۆتىڭ جاڭا تۋىندىسى قىزعالداقتىڭ توركىنى بولعان قازاقستان تۋرالى باياندايدى. فيلم تامىرى تەرەڭگە تارتاتىن ەرەكشە گۇلگە ارنالادى.
– تاماشا فوتوگراف ولەگ بەليالوۆتى كەزىندە رەجيسسەر بولۋعا كوندىرە العانىما قاتتى قۋانام. ول ءۇشىن بۇل ماڭىزدى شەشىم بولدى. بۇگىن مىنە, ءبىز ونىڭ ءفيلمىن تاماشالاۋعا جينالىپ وتىرمىز, – دەدى فيلم باستالار الدىندا ءسوز العان «قازاقفيلم» كينوستۋدياسىنىڭ پرەزيدەنتى باقىت قايىربەكوۆ.
سونداي-اق باقىت قايىربەكوۆ رەجيسسەردىڭ ءبىرىنشى تۋىندىسى «التىنەمەل» قىتايدىڭ تايچجوۋ قالاسىندا وتكەن كينو مەن تۋريزم سالاسىنداعى ازيا ونەرى اپتالىعىندا ۇزدىك شەتەل دەرەكتى ءفيلمى اتالىمىندا العان جۇلدەسىن تابىستادى. ايتا كەتەلىك, ولەگ بەليالوۆتى قازاقستان كينەماتوگرافيستەر وداعى ۇلتتىق «قۇلاگەر» پرەمياسىندا ۇزدىك رەجيسسەر-دوكۋمەنتاليست دەپ تانىعان بولاتىن.
«قىزعالداقتار اتامەكەنى» ءفيلمىنىڭ تۇسىرىلىمدەرى الماتى, جامبىل, تۇركىستان جانە ورتالىق قازاقستان وبلىستارىندا جۇرگەن. سونىمەن قاتار, رەجيسسەردىڭ ايتۋى بويىنشا, فيلمدە ارحيۆتىك ماتەريالدار قولدانىلعان.
– كوپشىلىك قىزعالداقتى گوللانديامەن بايلانىستىرادى. الايدا, بۇل گۇلدىڭ وتانى – قازاقستان. پرەزيدەنت نۇرسۇلتان نازارباەۆ « ۇلى دالانىڭ جەتى قىرى» اتتى ماقالاسىندا قىزعالداق تاقىرىبىن قوزعاعانى مەنى قۋانتىپ وتىر. ويتكەنى, بۇل گۇلدەر ءبىزدىڭ مۇرامىز, ماقتانىشىمىز, برەندىمىز. ولاردى قادىرلەپ, قورعاۋىمىز كەرەك, – دەدى ءفيلمنىڭ عىلىمي كەڭەسشىسى اننا يۆاششەنكو.
ايناش ەسالي,
«ەگەمەن قازاقستان»
الماتى
