14-17 جەلتوقسان ارالىعىندا وسى قوس ازاماتتىڭ جۇلدەسى ءۇشىن الماتى وبلىسى ەڭبەكشىقازاق اۋدانىنىڭ جولدىباي قايىپوۆ اتىنداعى اۋىلىندا بوكستان رەسپۋبليكالىق تۋرنير وتەدى. تاۋەلسىزدىك كۇنىنە وراي ۇيىمداستىرىلىپ وتىرعان ايتۋلى جارىستا 2003-2004 جانە 2005-2006 جىلدار ارالىعىندا تۋعان 200-گە تارتا بىلعارى قولعاپ شەبەرلەرى باق سىنايدى. وسى باسەكەنى تاماشالاۋ ءۇشىن بوكستان وليمپيادا چەمپيونى ەرماحان ىبىرايىموۆ, ەركىن كۇرەستەن وليمپيا ويىندارىنىڭ جەڭىمپازى, الەمنىڭ بەس دۇركىن چەمپيونى حادجيمۋرات گاتسالوۆ, دزيۋدودان الەم چەمپيوناتىنىڭ كۇمىس جۇلدەگەرى, سامبودان الەم چەمپيونى ازامات مۇقانوۆ, ەلىمىزگە ەڭبەك سىڭىرگەن جاتتىقتىرۋشىلار تۇرسىنعالي ەدىلوۆ پەن مۇرات سيقىمباەۆ جانە تاعى باسقا اتاقتى سپورتشىلار مەن باپكەرلەر جولدىباي قايىپوۆ اتىنداعى اۋىلعا ات باسىن بۇرادى.
شىڭعىس قاسىموۆ پەن قانات جاقىپباەۆتىڭ ەكەۋى دە كەزىندە بوكسپەن شۇعىلدانىپ, سپورت شەبەرلىگىنە ۇمىتكەر دارەجەسىنە دەيىن جەتتى. وبلىستىق جانە رەسپۋبليكالىق تۋرنيرلەردە جۇلدە الدى. كەيىننەن دجيۋ-دجيتسۋ ونەرىنە مىقتاپ دەن قويىپ, كوپتەگەن ءدۇبىرلى دودالاردا جەڭىس تۇعىرىنا كوتەرىلدى. تارقاتىپ ايتساق, الەم جانە ازيا چەمپيوناتتارىندا ءۇش رەتتەن باس جۇلدەنى ولجالاعان شىعىس قاسىموۆ بۇگىنگى تاڭدا جەكپە-جەكتىڭ بۇل تۇرىنەن تورتكۇل دۇنيەدەگى ەڭ مىقتى سپورتشىلاردىڭ ساناتىنا ەركىن قوسىلىپ وتىر. سول سەكىلدى قانات جاقىپباەۆتىڭ دا ءبىر باسىنا جەتەرلىك اتاق-داڭقى بار. ول الەم جانە ازيا چەمپيونى.
عالىم سۇلەيمەن,
«ەگەمەن قازاقستان»
