دەپۋتاتتارمەن كەزدەسۋ كەزىندە الماتى اكىمى باۋىرجان بايبەك مەگاپوليس بيۋدجەتىنىڭ الەۋمەتتىك سيپاتتى ساقتاپ قالاتىنىن جانە مەملەكەت باسشىسىنىڭ جولداۋى مەن «نۇر وتان» پارتياسىنىڭ دوكتريناسىنا تولىق ساي كەلەتىن ءار ادامعا قامقورلىق قاعيداسىنا نەگىزدەلگەن «الماتى-2020» قالالىق باعدارلاماسىن جۇزەگە اسىرۋعا باعىتتالاتىنىن اتاپ ءوتتى.
«حالىققا قولداۋ كورسەتۋدىڭ ناقتىلى مىندەتتەرى ايقىندالعان مەملەكەت باسشىسىنىڭ جولداۋىن جۇزەگە اسىرۋ ءۇشىن 106 شارادان تۇراتىن جالپىقالالىق باعدارلاما قابىلداندى جانە قاجەتتى رەسۋرستار ءبولىندى. ءبىزدىڭ باستى مىندەتىمىز - الماتىنى جايلى, قاۋىپسىز جانە وركەندەگەن قالاعا اينالدىرۋ. ايتا كەتەرلىگى, قالادا ماڭىزدى شەشىمدەردىڭ بارلىعى «نۇر وتان» پارتياسىنىڭ جانە ماسليحاتتاعى دەپۋتتار فراكتسياسىنىڭ قاتىسۋىمەن عانا قابىلدانادى. مىسالى, دەپۋتاتتار بيۋدجەتتىك قارجىلاندىرۋ كولەمىن ۇلعايتۋدى, جەرگىلىكتى ءمانى بار جولداردى ورتاشا جوندەۋدەن وتكىزۋگە مونيتورينگ جۇرگىزۋدى, سونىمەن قاتار سيرەك كەزدەسەتىن ءارى ورفاندى سىرقاتتارعا ۇشىراعاندارعا ءدارى ءبولۋ ءۇشىن مونيتورينگ پەن اۋديت جۇرگىزۋگە قاتىستى كوميسسيا قۇرۋدى ۇسىندى», - دەدى باۋىرجان بايبەك.
جيىن بارىسىندا جەتەكشى پارتيا فراكتسياسىنىڭ دەپۋتاتتارى قالاعا قوسىلعان اۋدانداردى سۋمەن قامتاماسىز ەتۋگە, جول سالۋ مەن ولاردى جوندەۋ جۇمىستارىنا ايرىقشا نازار اۋدارۋ قاجەتتىگىن اتاپ ءوتتى.
«قالاعا قوسىلعان اۋدانداردان شاعىم كوپ تۇسەدى, ويتكەنى, مۇنداعى ينفراقۇرىلىم قالانىڭ ورتالىعىمەن بىردەي دامۋدى قاجەت ەتەدى. سۋمەن قامتاماسىز ەتۋ جانە كارىزدى جوندەۋ جۇمىستارى اياقتالعان سوڭ بۇلارداعى كەيبىر جولدار جارامسىز بولىپ قالعان. مۇنداعى تۇرعىنداردىڭ كوپتەگەن وتىنىشتەرىن ەسكەرە كەلىپ, 1,8 ميلليارد كولەمىندە بيۋدجەتتىك قارجى ءبولۋدى سۇرايمىز», - دەدى ءماسليحات دەپۋتاتى راحمان الشانوۆ.
ءوز كەزەگىندە فراكتسيا مۇشەسى سەرگەي كوزلوۆ ەلدى مەكەندەر تۇرعىندارىنان كوشە جارىعىن جۇرگىزدى تالاپ ەتەتىن شاعىمدار تۇسەتىنىن دە ايتتى.
«ەكونوميكا جانە بيۋدجەت جونىندەگى كوميسسيا توراعاسى رەتىندە ەكونوميكا باسقارماسىمەن بىرگە الدىن-الا ەسەپتەۋلەر جۇرگىزدىم, ناتيجەسىندە بىرقاتار اۋدانداردىڭ, سونىڭ ىشىندە الاتاۋ جانە ناۋرىزباي اۋداندارىنىڭ كوشەلەرىن جارىقتاندىرۋ ءۇشىن 808,3 ملن. تەڭگە قاجەت», - دەدى ول.
بۇلاردان وزگە, دەپۋتاتتىق فراكتسيا مۇشەلەرى قارت ادامدارعا قولداۋ كورسەتۋ, ولارعا دۇرىس دەمالىس ۇيىمداستىرۋ, «دارحان», «زاريا ۆوستوكا», «راحات-مادەنيەت», «ترۋدوۆيك» ىقشام اۋداندارىندا مەكتەپتەر سالۋ سياقتى ماڭىزدى ماسەلەلەردى كوتەردى. «نۇر وتان» پارتياسىنىڭ مۇشەلەرى اۋتيزم, بالالاردىڭ تسەرەبرالدى سال اۋرۋىنا, داۋن سيندورمىنا شالدىققاندارعا, پسيحيكالىق جاعىنان جەتىلۋى جانە ءتىلىنىڭ شىعۋى قيىن بالالارعا ەرەكشە قامقورلىق كورسەتۋ ءۇشىن قارجى ءبولۋدى سۇرادى.
ساپارباي پارمانقۇل,
«ەگەمەن قازاقستان»
الماتى
