جىل باسىندا امەريكالىق اتاقتى مەنەدجەر ەگيس كيليماسپەن جۇمىس ىستەي باستاعان قانات يسلام بيىل جاز مەزگىلىندە جەكپە-جەك وتكىزۋى ءتيىس بولعان, الايدا جاتتىعۋ بارىسىندا جاراقات الىپ, كەزدەسۋى كەيىنگە شەگەرىلگەن ەدى. وتاندىق باق وكىلدەرىنە بەرگەن سۇحباتىندا قانات يسلام جاراقاتىنان تولىق ايىعىپ, جاتتىعۋعا كىرىسكەنىن ايتادى. «جەكپە-جەك وتكىزبەگەنىمە دە ءبىر جارىم جىلعا تاياپ قالدى. قازىر جاراقاتىم تولىق جازىلىپ ءبىتتى, اقىرىنداپ جاتتىعۋعا كىرىسىپ جاتىرمىن. بويىمدا ءالى كۇش بار ەكەنىن سەزەمىن. سوندىقتان كارەرامدى اياقتاۋعا ءالى ەرتە دەپ ويلايمىن. جاراقاتتان امان بولساق, كەلەسى جىلدىڭ ناۋرىز ايىندا اقش-تا جەكپە-جەك وتكىزىپ, جانكۇيەرلەرىمدى قۋانتپاقشىمىن», دەيدى قانات يسلام.
ايتا كەتەيىك, قانات يسلام ءوزىنىڭ سوڭعى جەكپە-جەگىن 2017 جىلدىڭ 9 قىركۇيەگىندە استاناداعى «سارىارقا» ۆەلوترەگىندە وتكىزىپ, كانادالىق بوكسشى برەندون كۋكتى 9-راۋندتا تەحنيكالىق نوكاۋتپەن جەڭگەن بولاتىن.
ءالي بيتورە,
«ەگەمەن قازاقستان»
