ىلكىدەن جالعاسىپ كەلە جاتقان ىزەتتى ءداستۇردىڭ ساباقتاستىعىنا ءسال سەلكەۋ تۇسكەنىن دە كورىپ ءجۇرمىز. اسىرەسە جيىن-تويدا باتا بەرگەننىڭ ءجونى وسى ەكەن دەپ, ۇزىن-سونار اڭگىمە ايتىپ كەتەتىندەر اراگىدىك بولسا دا كەزدەسەدى. ءتىپتى مازمۇنسىز, ماعىناسىز ءسوز سويلەپ, سوڭىندا ەسكى داعدىمەن «الىپ قويايىق» دەپ جاڭىلىسقانداردى دا كورگەنبىز.
ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىنىڭ باعىتتارىن ىسكە اسىرۋ ماقساتىندا وبلىستىق ارداگەرلەر كەڭەسىنىڭ ۇيىمداستىرۋىمەن تۇڭعىش رەت تارتىمدى شارا ءوتتى. بۇل شارا «باتامەن ەل كوگەرەر» دەپ اتالادى. تاعىلىمدى شارانىڭ ويداعىداي وتۋىنە اتسالىسقان وبلىستىق ارداگەرلەر كەڭەسىنىڭ توراعاسى عوسمان تولەعۇل ءوز ويىن بىلايشا وربىتەدى.
– بالا كەزىمىزدە ەلىمىزدىڭ ۇلكەندەرى قولعابىس ەتكەن سايىن اق تىلەكتەرىن اقتارىپ, باتا بەرۋشى ەدى. سول كۇنى ءىسىمىز وڭعا باسقانداي قاناتتانىپ جۇرەتىنبىز. ءسوز نارقىن بىلەتىن نار تۇلعالاردىڭ ءازىز كوكىرەكتەرىندەگى جىپ-جىلى سەزىم نۇرى جان دۇنيەمىزدى شۋاققا مالىپ, ءۇمىتىمىزدى ۇشتاي تۇسەتىن. حالقىمىزدىڭ وسى ءبىر قاسيەتتى ءداستۇرى قايتا جاڭعىرىپ, مازمۇنى تۇرلەنىپ جاتسا, نۇر ۇستىنە نۇر ەمەس پە؟! – دەيدى ول.
بايقاۋعا ەل اعالارى قاتىستى. جارىم ىرىسقا بالانعان جاقسى ءسوز, ءومىردىڭ ءار ساتىنە وراي بەرىلەتىن اق باتالاردىڭ ءتۇرى, ۇلگىسى, ماڭىزى, مازمۇنى, اۋەزى مەن ماقامى تارازى باسىنا تارتىلدى. بايقاۋ سوڭىندا باتاگويلەردىڭ بىلىكتىلىگى ساراپقا سالىنىپ, جەڭىمپازدارعا ارنايى سىيلىقتار تاپسىرىلدى. ساندىقتاۋ اۋدانىنان كەلگەن اقساقال جاقسىباي احمەتوۆ باس جۇلدەگە يە بولسا, ءبىرجان سال اۋدانىنىڭ ەل اعاسى مىرزابەك بۇرماعانوۆ ءبىرىنشى ورىنعا يە بولدى.
بايقال ءبايادىل,
«ەگەمەن قازاقستان»
