بيىلعى جىلدىڭ وزىندە عانا وبلىس اكىمى مالىك ءمىرزاليننىڭ جاندى قامقورلىعىنىڭ ارقاسىندا قالىڭ وقىرمان قاۋىمنىڭ رۋحاني ءماندى ازىعىنا اينالاتىن بىرقاتار تۋىندىلار جارىق كورىپ, كوپشىلىكتىڭ قولىنا ءتيدى. ۇلى دالانىڭ ۇلاعاتتى پەرزەنتى, كەڭەس وداعىنىڭ باتىرى مالىك عابدۋلليننىڭ 11 تومدىعى مەن جازۋشى-پۋبليتسيست, قازاقستان رەسپۋبليكاسىنىڭ ەڭبەك سىڭىرگەن قايراتكەرى جابال ەرعاليەۆتىڭ ەلباسى نۇرسۇلتان نازارباەۆتىڭ قايراتكەرلىك تۇلعاسىن اشىپ كورسەتەتىن «الەمگە! عارىشقا! بولاشاققا جول اشقان تۇڭعىش!» جيناعى, پروفەسسور قادىرجان ءابۋوۆتىڭ وڭىرىمىزدەگى تاريحي تۇلعالار تۋرالى بيبليوگرافيالىق وچەركتەرى جارىق كورگەن بولاتىن.
–جەرلەسىمىز, تالانتتى جازۋشى ساكەن ءجۇنىسوۆتىڭ «زاماناي مەن اماناي» پوۆەسى لوندوندا جارىق كوردى,–دەدى تۇساۋكەسەردى اشىپ جۇرگىزىپ وتىرعان وبلىس اكىمى مالىك مىرزالين,ء–بىز بۇگىن وتكەنىمىزدىڭ ورەلى ىستەرى مەن كەمەل كەلەشەگىمىزدى قاۋزايتىن جاقسى ىستەردى جالعاستىرۋدامىز.
ەل تاۋەلسىزدىگىنىڭ قارساڭىندا قازاق, ورىس جانە اعىلشىن تىلدەرىندە جارىق كورگەن جيناق قاسيەتتى وڭىردەگى كونەنىڭ كومبەسىن اقتارىپ, ەل جۇرەگىندە قالعان تاريحي تۇلعالاردىڭ تۋعان ەلىنە سىڭىرگەن قيساپسىز ەڭبەگىن سيپاتتايدى. تاۋەلسىزدىك جىلدارىنداعى وبلىستىڭ الەۋمەتتىك-ەكونوميكالىق دامۋى, تەڭدەسى جوق تابيعي بايلىعى, ەكونوميكاسىنىڭ ەڭسە كوتەرۋى, سونداي-اق رۋحاني الەمىنىڭ كەمەلدەنىپ, كوركەيە ءتۇسۋى ءارى وعان سونى سەرپىن بەرگەن «رۋحاني جاڭعىرۋ» باعدارلاماسىنىڭ بايىپپەن جۇزەگە اسۋى قامتىلىپ وتىر. بەزەندىرىلۋى دە تالايعا تاڭداي قاقتىراتىنداي. الماتى قالاسىنداعى «التىن كىتاپ» باسپاسىنان شىققان جيناق الداعى ۋاقىتتا كىتاپحانالار مەن ءبىلىم وشاقتارىنا تاراتىلماق.
تۇساۋكەسەر بارىسىندا «التىن كىتاپ» باسپاسىنىڭ ديرەكتورى ۆياچەسلاۆ تيتەنەۆ, جازۋشى-اۋدارماشى عوسمان تولەعۇل, وبلىستىق تاريحي ولكەتانۋ مۋزەيى ديرەكتورىنىڭ ورىنباسارى الما قۇنانباەۆا, اقمولا وبلىسىنىڭ قۇرمەتتى ازاماتى ساعىنتاي ەلۋباەۆتار ءالى سياسى كەپپەگەن جيناقتىڭ قۇندىلىعىن ايتىپ, جوعارى باعا بەردى.
بايقال ءبايادىل,
«ەگەمەن قازاقستان»
اقمولا وبلىسى
