جوبانىڭ نەگىزگى مىندەتتەرى - تۇرعىنداردىڭ سىبايلاس جەمقورلىققا قارسى مىنەز-ق ۇلىق ۇلگىسىن ودان ءارى دامىتۋ مەن جەمقورلىق ماسەلەسىن مەملەكەتتىك قىزمەت كورسەتۋ ساپاسىن ارتتىرۋ ارقىلى شەشۋ, تۇرمىستىق جەمقورلىقتى جويۋ, ازاماتتار جانە بيزنەس ءۇشىن كەدەرگىسىز جانە قولايلى جاعدايلار جاساۋ, مەملەكەتتىك ورگاندار قىزمەتىنىڭ اشىقتىعى, اۋقىمدى قوعامدىق باقىلاۋ جۇرگىزۋ.
جوبا اياسىندا مەملەكەتتىك مەكەمە قىزمەتكەرلەرىنىڭ ەڭبەكاقىسىن قايتا قاراۋ, مەكەمە باسشىلارىنىڭ جەكە جاۋاپكەرشىلىگىن ارتتىرۋ, قىزمەتتەردىڭ بارلىق باعىتتارى بويىنشا سىبايلاس جەمقورلىققا قارسى ءىس-قيمىلدى ارتتىرۋ جانە تاعى باسقا ماسەلەلەر قامتىلادى. ماڭعىستاۋ تۇرعىندارى مەن قوناقتارى مەملەكەتتىك ورگانداردىڭ قىزمەتىن جاقسارتۋ جانە سىبايلاس جەمقورلىقتىڭ دەڭگەيىن تومەندەتۋ, جويۋ بويىنشا وزدەرىنىڭ ۇسىنىستارىن ەڭگىزە الادى. سونداي-اق, جۇمىس بارىسىندا تۋىنداعان ماسەلەلەردى قاراۋ ءۇشىن كاسىپكەرلەر, عالىمدار, ازاماتتىق سەكتوردىڭ جانە باق وكىلدەرى اراسىنان ساراپشىلار تارتىلماق.
- كەڭسەنىڭ اشىلۋ سالتاناتىندا ءسوز سويلەگەن سايان قىلىش ۇلى, بۇل باستاما جەمقورلىقتىڭ فاكتورى رەتىندەگى ادامي قاجەتتىلىكتى جويۋ ءۇشىن مەملەكەتتىك قىزمەتشىلەردى قولايلى ەڭبەك اقىمەن قامتاماسىز ەتۋ, قىزمەتتىڭ بارلىق باعىتتارى بويىنشا مەملەكەتتىك ورگاندار مەن ۇيىمدار باسشىلارىنىڭ دەربەس جاۋاپكەرشىلىگى ماسەلەلەرىن قاراۋعا باعىتتالعانىن ايتتى.
«سوڭعى جىلدارى ەلوردادا قۇقىق ءتارتىبىن ارتتىرۋ جانە تۇرعىندار مەن قوناقتار ءۇشىن جاعداي جاساۋدا بەلسەندى يننوۆاتسيالىق تاسىلدەر ىسكە اسىرىلىپ كەلەدى. بۇگىندە استانا باسقا دا قازاقستان ايماقتارى ءۇشىن لايىقتى "اقىلدى قالا" ۇلگىسى بولىپ وتىر. سوڭعى جولداۋىندا ەلباسىمىز استانانىڭ بۇل كرەاتيۆتى تاجىريبەسىن ەلىمىزدىڭ بارلىق وڭىرلەرىنە ەنگىزۋ مىندەتىن قويدى. «ماڭعىستاۋ – ادالدىق الاڭى» جوباسى ازاماتتاردىڭ سىبايلاس جەمقورلىققا قارسى كوزقاراسىن كۇشەيتىپ, قوعامدا جەمقورلىققا قارسى احۋالدى قالىپتاستىرۋعا باعىتتالعان», - دەدى ول.
سونىمەن قاتار, «ماڭعىستاۋ – ادالدىق الاڭى» جوباسىنا سايكەس, سىبايلاس جەمقورلىققا قارسى ءىس-قيمىلدا جاڭا ادىستەر ەنگىزۋ ماقساتىندا جوبا مەنەدجمەنتى قولدانىلاتىن بولادى. ول ماقساتتا, جوبا اياسىندا ماڭعىستاۋ وبلىسى اكىمدىگىنىڭ, جەرگىلىكتى اتقارۋشى ورگاندار قىزمەتكەرلەرى قاتارىنان جوبا كەڭسەسى قۇرىلىپ, تۇرعىنداردىڭ تۇرمىس ساپاسىن ارتتىرۋعا بار كۇشىمىزدى سالامىز دەگەن تىلەگىن جەتكىزدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
