– بيۋدجەتتىڭ جالپى كولەمىنەن 30,3% الەۋمەتتىك سالا شىعىندارىنا باعىتتالادى. اتالعان باعىت بويىنشا ءابسوليۋتتى ماعىنادا شىعىستار 52,2 ملرد تەڭگەنى قۇرايدى, – دەپ مالىمدەدى وبلىستىق قارجى باسقارماسى جەتەكشىسىنىڭ ورىنباسارى ليۋدميلا باشارينا.
الەۋمەتتىك شىعىنداردىڭ باسىم بولىگى ءبىلىم سالاسىنا ءبولىندى, ول 23 ملرد تەڭگەنى قۇرادى. دەنساۋلىق ساقتاۋ سالاسىنا 7,3 ملرد تەڭگە قاراستىرىلعان. ءبىلىم جانە دەنساۋلىق ساقتاۋ نىساندارىن جوندەۋگە جانە ولاردىڭ ماتەريالدىق-تەحنيكالىق بازاسىن جاڭارتۋعا وبلىستىق بيۋدجەتتەن 6,2 ملرد تەڭگە ءبولىندى. سپورتتى دامىتۋعا 10,3 ملرد تەڭگە باعىتتالدى. الەۋمەتتىك كومەك جانە وبلىس حالقىن الەۋمەتتىك قورعاۋ ءۇشىن 6,2 ملرد تەڭگە قاراستىرىلعان.
– ناقتى سەكتور شىعىندارى 2019 جىلى 22,9 ملرد تەڭگەنى قۇرايدى. ولاردان وبلىس جولدارىن اعىمداعى, ورتاشا جانە كۇردەلى جوندەۋگە 9,8 ملرد تەڭگە, اگروونەركاسىپ كەشەنىن دامىتۋ باعدارلاماسىنا 4,2 ملرد تەڭگە, تۇرعىن ءۇي-كوممۋنالدىق شارۋاشىلىقتى دامىتۋعا 2,1 ملرد تەڭگە, كاسىپكەرلىكتى قولداۋعا جانە دامىتۋعا 1,9 ملرد تەڭگە ءبولۋ جوسپارلاندى, – دەپ مالىمدەدى ليۋدميلا باشارينا.
600 ملن تەڭگە تابيعاتتى قورعاۋ جانە كوكتەمگى سۋ تاسقىنىنا قارسى شارالارعا قاراستىرىلعان. 7,7 ملرد تەڭگە ءبىلىم, دەنساۋلىق ساقتاۋ, مادەنيەت, سپورت, سونداي-اق تۇرعىن ءۇي قۇرىلىسىنا باعىتتالادى دەپ جوسپارلاندى.
وبلىس اكىمى ەرلان قوشانوۆ بيۋدجەتتىڭ تەڭدەستىرىلگەنىن اتاپ ءوتتى.
– بەكىتىلگەن بيۋدجەت مەملەكەت باسشىسىنىڭ بارلىق تاپسىرمالارىن جۇزەگە اسىردى تولىقتاي قارجىلاندىرۋدى كوزدەيدى, – دەدى ول. – مىسالى, «7-20-25» باعدارلاماسىنا قاتىسۋشىلاردى ىنتالاندىرۋ جانە ولاردىڭ سانىن ارتتىرۋ ءۇشىن ءبىز جالپى سوماسى 1 ملرد تەڭگەنى قۇرايتىن تۇرعىن ءۇي سەرتيفيكاتتارىن قارجىلاندىرامىز. سونداي-اق, قوسىمشا قارجى قاجەت بولعان جاعدايدا, ءبىز بيۋدجەتتى ناقتىلاۋ كەزىندە بۇل ماسەلەنى دەپۋتاتتارمەن بىرلەسىپ شەشە الامىز.
قاراعاندىدا بالالار جانە جاسوسپىرىمدەر سارايى مەن 50 مەترلىك ءجۇزۋ باسسەينىنىڭ قۇرىلىسىنا 3 ملرد تەڭگە جوسپارلانعان. بۇل الەۋمەتتىك نىسانداردى سالۋ تۋرالى تاپسىرمانى ەلباسى وسى جىلدىڭ قىركۇيەك ايىندا وبلىسقا جاساعان ساپارى بارىسىندا بەرگەن بولاتىن.
سەسسيادا وبلىس اكىمى ەرلان قوشانوۆ ەلباسىنىڭ 2019 جىلدى «جاستار جىلى» دەپ جاريالاۋىنا بايلانىستى ايماقتا ءىت, اۋىل جاستارى, جاس جازۋشىلار فورۋمى جانە باسقا دا شارالاردى وتكىزۋ جوسپارلانىپ وتىرعانىن حاباردار ەتتى.
قايرات ءابىلدا,
«ەگەمەن قازاقستان»
قاراعاندى
