بۇل ەسىم جانكۇيەرلەرگە جاقسى تانىس. مارينا كوركەم گيمناستيكادان وليمپيا ويىندارىنىڭ جەڭىمپازى اتانعان كسرو-نىڭ تۇڭعىش سپورتشىسى. بۇل اتاققا لوباچ 1988 جىلى سەۋلدە قول جەتكىزدى. ودان بولەك, بەلارۋسسيالىق ارۋ 1987 جىلى ۆارناداعى الەم چەمپيوناتىندا 1 التىن جانە 2 قولا مەدالدى يەلەنسە, 1985 جىلى ۆاليادوليدتە قولاعا قول سوزدى. ەۋروپا بىرىنشىلىگىندە جەڭىپ العان 2 التىن مەن 2 قولا مەدالى تاعى بار. ال 1986 جىلى ماسكەۋدە جالاۋى جەلبىرەگەن ىزگى نيەت ويىندارىن 2 التىن جانە 2 كۇمىس جۇلدەمەن قورىتىندىلادى.
مىنە, وسى ساڭلاق سپورتشىنىڭ قۇرمەتىنە مينسكىدە جىل سايىن ءدۇبىرلى دودا ءوتىپ تۇرادى. بيىلعى جارىستا 10 مەملەكەتتىڭ سۇلۋلارى باق سىنادى. وسى باسەكەدە قازاقستاندىق ءسابينا باقاتوۆانىڭ باعى جانىپ, ول كۇمىس مەدالدى موينىنا ءىلدى. بۇل جەرلەسىمىزدىڭ حالىقارالىق جارىستارداعى العاشقى تابىسى ەمەس. ۇستىمىزدەگى جىلى استانالىق ارۋ مالايزيانىڭ استاناسى – كۋالا-لۋمپۋردە وتكەن ازيا بىرىنشىلىگىندە 2 التىن جانە 1 قولا مەدالدى جەڭىپ العان ەدى.
عالىم سۇلەيمەن,
«ەگەمەن قازاقستان»
