قاپشاعاي قالاسىنىڭ زارەچنىي اۋىلىندا ورنالاسقان «مارەۆەن فۋد» زاۋىتى جەتىسۋداعى شەتەل ينۆەستيتسياسىنا سالىنىپ, ءونىم وندىرۋگە كىرىسكەن بىرەگەي ءوندىرىس. زاۋىت اتتاس ترانسۇلتتىق كومپانيا مەن الماتى وبلىسى اكىمدىگىنىڭ ارىپتەستىگى اياسىندا اشىلعان زاۋىتقا 15,4 ملرد تەڭگە شەتەل ينۆەستيتسياسى تارتىلدى.
ايتپاقشى, بۇگىن اشىلعان جاڭا زاۋىت الماتى وبلىسىنداعى سىرتقى ينۆەستيتسياعا سالىنعان جالعاز نىسان ەمەس. قازىر وبلىس بويىنشا جالپى سوماسى 1,3 ترلن تەڭگە بولاتىن 50 ءىرى ينۆەستيتسيالىق جوبا جۇزەگە اسىرىلۋدا. ونىڭ ىشىندە 32 جوبا تىكەلەي شەتەلدىك كومپانيالاردىڭ قاتىسۋىمەن باستالعان. جەتىسۋعا كەلگەن ينۆەستورلار قاتارىندا الەمگە ايگىلى «كوكا-كولا», «فۋد ماستەر», «دانون», «ەفەس», «دجي تي اي», «تيكۋريللا» سياقتى جيىرمادان استام برەند كومپانيالار بار.
«مارەۆەن فۋد» برەندى الەم نارىعىندا تاماق وناركاسىبىنىڭ الپاۋىتى رەتىندە تانىمال. اسىرەسە, جىلدام دايىندالاتىن كەسپە ونىمدەرىنىڭ نەگىزگى ۇلەسى وسى ترانسۇلتتىق كومپانيانىڭ ەنشىسىندە. قازاقستاندا تۇڭعىش سانالاتىن قاپشاعايداعى زاۋىتتا دا تانىمال «روللتون» جانە «Bigbon» ساۋدا بەلگىسى اياسىندا دايىن ءونىم شىعارىلا باستادى. قازىرگى ۋاقىتتا زاۋىت 370 ادامدى جۇمىسپەن قامتىدى. الداعى كۇندەرى جۇمىس كۇشى 523 ادامعا جەتپەك. كومپانيا ءوندىرىس ەرەكشەلىگنە وراي جەرگىلىكتى جۇمىسشىلاردى قايتا دايارلاۋدان وتكىزىپ, جاڭا تەحنولوگيانى مەڭگەرگەن بەساسپاپ مامان ەتىپ شىعارماقشى. زاۋىت ءوندىرىسىنىڭ 3 بولىگى ىسكە قوسىلىپ, ءونىم شىعارۋعا كىرىسىپ كەتتى. ەندىگى قاپتاماسىندا «مارەۆەن فۋد» زاۋىتىندا, قازاقستاندا وندىرىلىگەن» انىقتاما جازۋى بار «روللتون» كەسپەسى مەن ء«ۇي روللتونى» تۇزدىعى ساۋداعا شىعىپ ۇلگەردى.
- جاڭا زاۋىت جىلىنا 417 ملن داناعا دەيىن جىلدام دايىندالاتىن كەسپە ونىمدەرىن شىعارا الادى. بۇل «قازاقستاندا جاسالعان» بەلگىسىمەن ىشكى جانە سىرتقى نارىققا شىعارىلاتىن ءونىم ءتۇرى بولماق. قازىر وتاندىق نارىققا 50 پروتسەنتكە, سىرتقى نارىققا 50 پروتسەنتكە جۇمىس جاساماقپىز. بۇيىرسا, قاپشادايدا جاسالعان كەسپە ەلىمىزدىڭ بارلىق ايماعىنان بولەك, ورتالىق ازيا, قىتاي, يران, اۋعانستان, موڭعوليا مەملەكەتتەرىنە ەكسپورتتالادى, - دەيدى «مارەۆەن فۋد» زاۋىتىنىڭ ديرەكتورى الەكساندر ۆيازنيكوۆ.
قالماحانبەت مۇقامەتقالي,
«ەگەمەن قازاقستان»
الماتى وبلىسى
