ج.قاسىمبەك الەۋمەتتىك-ەكونوميكالىق دامۋ كورسەتكىشتەرى تۋرالى باياندادى

ج. قاسىمبەكتىڭ ايتۋىنشا, 2018 جىلدىڭ 11 ايىنىڭ قورىتىندىسى بويىنشا ونەركاسىپ ءوندىرىسى 104,5% بولعان (جوسپار – 103,3 %). ونىڭ ىشىندە تاۋ-كەن ونەركاسىبىندە 104,7%, ال وڭدەۋ ونەركاسىبىندە بۇل كورسەتكىش 104,9%-دى كورسەتتى. ەلىمىزدىڭ 14 وڭىرىندە ونەركاسىپتىك ءوندىرىستىڭ وڭ كولەمى ساقتالىپ وتىر.

ءمينيستردىڭ ايتۋىنشا, تاۋ-كەن سەكتورىندا ءسستوب-ىندە ءوندىرىس كولەمىنىڭ ارتۋىنا بايلانىستى تەمىر كەنىن ءوندىرۋ كولەمى 7,3%-عا ءوستى. ءتۇستى مەتالل كەنىن ءوندىرۋ كولەمى 3,9%-عا ارتقان.  

«وڭدەۋ ونەركاسىبىندە جىلدىق جوسپارلانعان كورسەتكىشتەرگە قول جەتكىزىلىپ, بىرقاتار سالالاردا ءوسىم بايقالىپ وتىر. اتاپ ايتقاندا, ماشينا جاساۋ سالاسى 15,7%-عا, بىلعارى ءوندىرىسى 8,1%-عا, حيميا ونەركاسىبى 7,2%-عا, قاعاز ءوندىرىسى 5,1%-عا, رەزەڭكە جانە پلاستماسس بۇيىمدار ءوندىرىسى 2,9%-عا جانە جيھاز ءوندىرىسى 2,4%-عا وسكەن», — دەدى ج. قاسىمبەك.

قر يدم مالىمەتتەرىنە سايكەس, كولىك كەشەنى بويىنشا 11 ايداعى ناقتى كولەم يندەكسى 104,6%-دى قۇراعان. ج. قاسىمبەك جىلدىق جوسپارلى كورسەتكىشكە ترانزيتتىك كونتەينەرلىك تاسىمالدار كولەمى مەن قىتايعا گاز ەكسپورتىن ارتتىرۋ ەسەبىنەن قول جەتكىزىلەتىنىن اتاپ ءوتتى.

قۇرىلىس بويىنشا ناقتى كولەم يندەكسى 103,9%-دى قۇراپ, جوسپارلى كورسەتكىشكە قول جەتكىزىلدى (جوسپار – 103,6%). 13 وبلىستا وڭ سەرپىن بايقالادى. دەگەنمەن, ءمينيستردىڭ ايتۋىنشا, جىلدىق جوسپاردى ورىنداۋ ءۇشىن بىرقاتار وڭىرلەردىڭ قۇرىلىس جۇمىستارىنىڭ ءوسۋ قارقىنىن كۇشەيتۋلەرى قاجەت.  

«جالپى قۇرىلىس بويىنشا جوسپارلانعان 103,6% جىلدىق كورسەتكىشىن اتىراۋ وبلىسىندا 600 ملرد تەڭگەگە, استانا قالاسىندا 530 ملرد تەڭگەگە جانە الماتى قالاسىندا 340 ملرد تەڭگەدەن استام سوماعا قۇرىلىس-مونتاج جۇمىستارى كولەمىنىڭ ەسەبىنەن ورىنداۋ كوزدەلىپ وتىر. قۇرىلىس جۇمىستارىنىڭ ءوسىم قارقىنى كورسەتكىشتەرىنە شاعىن كاسىپكەرلىك سۋبەكتىلەرىنىڭ توقسان سايىن ۇسىناتىن ەسەپتەرى ىقپالىن تيگىزەدى. سونىڭ ەسەبىنەن ءار توقسان قورىتىندىسى بويىنشا جوعارى كورسەتكىشتەرگە قول جەتكىزىلەدى», — دەيدى ج. قاسىمبەك.  

تۇرعىن ءۇي قۇرىلىسىنىڭ دامۋى تۋرالى بايانداي وتىرىپ, مينيستر 11 ايدىڭ قورىتىندىسى بويىنشا 11 ملن م2 تۇرعىن ءۇي پايدالانۋعا بەرىلگەنىن, مۇنىڭ 2017 جىلدىڭ سايكەس كەزەڭىمەن سالىستىرعاندا 114,3%-دى قۇرايتىنىن جەتكىزدى.

«جالپى, ەلىمىز بويىنشا 96 761 باسپانا, ونىڭ ىشىندە 37 026 جەكە تۇرعىن ءۇي پايدالانۋعا بەرىلدى. تۇرعىن ۇيلەردى پايدالانۋعا بەرۋ كولەمىنىڭ ارتۋى وتكەن جىلمەن سالىستىرعاندا رەسپۋبليكانىڭ 16 وڭىرىندە جالعاسۋدا», — دەپ تۇيىندەگەن ج. قاسىمبەك, جالپى, 2018 جىلدىڭ قورىتىندىسى بويىنشا ينۆەستيتسيالار جانە دامۋ مينيسترلىگى جەتەكشىلىك ەتەتىن بارلىق سالالار بويىنشا ناقتى كولەم يندەكسىنىڭ جوسپارلانعان كورسەتكىشتەرىنە قول جەتكىزۋ كوزدەلىپ وتىرعانىن اتاپ ايتتى.