مۇنداي ورتالىقتاردى اشۋ كولىك قۇرالدارىن تىركەۋگە, قايتا تىركەۋگە جانە كولىك جۇرگىزۋشىسى كۋالىگىن اۋىستىرۋعا نيەتتى ازاماتتار سانىنىڭ ءوسۋ قاجەتتىلىگىنەن تۋىنداپ وتىر.
«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ الماتى قالاسى بويىنشا فيليالىنىڭ ديرەكتورى عالىم قارقىنباەۆتىڭ ايتۋىنشا, العاشقى مامانداندىرىلعان حقو اشىلعان ارالىقتا, ياعني 5 جىل ىشىندە اۆتوكولىك يەلەرىنە كورسەتىلەتىن قىزمەت كولەمى بەس ەسەگە ارتقان. «قالا شەكاراسىنىڭ كەڭەيۋىنە بايلانىستى قالا حالقىنىڭ سانى ءبىر جارىم ەسەگە ءوستى. سونداي-اق مەملەكەتتىك تىركەۋ ءنومىرىن بەرۋ بويىنشا ەكستەرريتوريالدى قاعيداسى ەنگىزىلگەننەن كەيىن كولىك سانى دا ارتا تۇسكەن. تىركەلەتىن ترانسپورتتىڭ 50% وزگە قالالاردان كەلەدى. 80% – الماتى, 20% – تۇركىستان جانە جامبىل وبلىستارىنىڭ تۇرعىندارى. سالدارىنان «سايالى» شاعىن اۋدانى مەن مايلين كوشەسىندە ورنالاسقان مامانداندىرىلعان حقو جۇكتەمەسىن ارتتىرعان.
كولىك جۇرگىزۋشىسى كۋالىگىن الۋ بارىسىندا تاپسىرىلاتىن ەمتيحان بۇرىنعىداي الاتاۋ اۋدانىندا ورنالاسقان №1مامانداندىرىلعان حقو-دا جۇرگىزىلەتىن بولادى.
جاڭادان اشىلعان مامانداندىرىلعان حقو-لاردا كورسەتىلەتىن مەملەكەتتىك قىزمەت ساپاسىن مونيتورينگتەن وتكىزۋ ماقساتىندا احۋال ورتالىعىنا قوسىلعان بەينەباقىلاۋ كامەرالارى ورناتىلعان.
سونىمەن قاتار سىبايلاس جەمقورلىققا جول بەرمەۋ جانە مەملەكەتتىك قىزمەتتەردى كورسەتۋ ءۇردىسىن جەتىلدىرۋ ماقساتىندا «ەلەكتروندىق ۇكىمەت» پورتالىندا كولىكتەردى تىركەۋ جانە كولىك جۇرگىزۋشىسى كۋالىگىن الماستىرۋ قىزمەتتەرى بويىنشا سەرۆيستەر جۇمىس ىستەيدى. ءتيىستى قۇجاتتار ءبىر ساعات ىشىندە راسىمدەلەدى.
بۇگىنگە دەيىن ەلەكتروندىق ۇكىمەت پورتالى ارقىلى ءۇش مىڭنان استام كولىك تىركەۋگە قويىلدى (الماتى ق.– 550), سونداي-اق 13 مىڭعا جۋىق ازامات (الماتى ق.-1765) كولىك جۇرگىزۋشىسى كۋالىگىن جاڭاسىنا الماستىرعان.
ەلۆيرا سەرىكقىزى,
«ەگەمەن قازاقستان»
الماتى
