1997 جىلدىڭ 10 جەلتوقسانىندا ەل استاناسى الماتىدان اقمولا قالاسىنا رەسمي تۇردە كوشىرىلگەن بولاتىن. وسى كۇنگە ورايلاستىرىلىپ استانادا العاش رەت «ەلوردا جۇلدىزى» پرەمياسى تاعايىندالدى. ول ەندى جىل سايىن تاعايىندالاتىن بولادى.
«قۇرمەتتى قالا تۇرعىندارى مەن قوناقتارى! سىزدەردى شىن جۇرەكتەن بۇگىنگى مەرەكەمەن قۇتتىقتايمىن. 21 جىل بۇرىن مەن دە جاس مامان رەتىندە پوەزعا وتىرىپ, بوراندى تاڭدا استاناعا كەلگەنمىن. سودان بەرى كوپ دۇنيە وزگەردى. مەن ءۇشىن وسى اتاۋلى كۇندە مىنا ساحنادا تۇرىپ سىزدەردى قۇتتىقتاۋ ۇلكەن قۇرمەت», دەدى قالا اكىمى باقىت سۇلتانوۆ.
قۇرمەتتى ماراپات ەلىمىزدىڭ باس قالاسىنىڭ دامۋىنا ەلەۋلى ۇلەس قوسقان جانە ونىڭ داڭقىن الەمگە تانىتقان ەلوردالىق ۇجىمدار, ۇيىمدار مەن تانىمال تۇرعىندارعا بەرىلدى. سالتاناتتى تۇردە ەستەلىك حرۋستال مۇسىندەر «Astana Ballet» تەاترىنا, «استانا وپەرا» تەاترىنا, «ەكسپو-2017» حالىقارالىق مامانداندىرىلعان كورمەسىنە, نازارباەۆ ۋنيۆەرسيتەتىنە, «استانا» فۋتبول كلۋبىنا, «بارىس» حوككەي كلۋبىنا, «استانا» ۆەلوكومانداسىنا, «سپارتا-نوماد استانا» كتك كومانداسىنا, «جاستار» تەاترىنا, سونداي-اق, مەديتسينالىق كلاستەر وكىلدەرى يۋري پيا جانە سەرىك اقشولاقوۆقا تابىس ەتىلدى.
«بۇل كۇن استانا ءۇشىن ماڭىزدى. استانا دامىپ كەلەدى, ساياسي, مادەني, سپورت سالالارىندا تانىمال بولدى. استانانى ۇجىمدار, ۇيىمدار, كاسىپورىندار مەن ادامدار تانىتتى. وسى جىلى جاڭا جانە قارقىندى دامۋشى ەلوردامىزدىڭ تانىلۋىنا ەلەۋلى ۇلەس قوسقان ۇجىمدار مەن ادامداردى اتاپ وتكىمىز كەلدى», دەدى استانا قالاسى مادەنيەت جانە سپورت باسقارماسى باسشىسىنىڭ ورىنباسارى ناريما مۇحامبەتالينا.
مەرەكەلىك كونتسەرتتى «Astana Ballet» ترۋپپاسىنىڭ حورەوگرافيالىق قويىلىمى اشتى. مەرەكەلىك كەشتە قايرات باەكەنوۆ, الەن سامىكەن, اعايىندى جۇگۇنىسوۆتەر, سارا يساك, اينۇر ابديەۆا جانە باسقا دا ەسترادا جۇلدىزدارى ءان شىرقادى. «جاستار» تەاترىنىڭ اكتەرلەرى كورەرمەندەردىڭ نازارىنا « ۇلى دالانىڭ جەتى قىرى» تەاترلاندىرىلعان قويىلىمىن ۇسىنسا, «سپارتا-نوماد استانا» كومانداسى قاۋىمعا كوتەرىڭكى كوڭىل-كۇي سىيلادى. مەرەكەلىك كەشتى استانا قالاسىنىڭ مادەنيەت جانە سپورت باسقارماسى ۇيىمداستىردى. ايتا كەتەيىك, «ەلوردا جۇلدىزى» سىيلىعى ەندى جىل سايىن تابىستالاتىن بولادى.
باعاشار تۇرسىنباي ۇلى,
«ەگەمەن قازاقستان»
