ىشكى ساياسات باسقارماسىنىڭ باسشىسى بۇلبۇل ەلەۋسىنوۆا مالىمدەگەندەي, 20 قاراشادا باستالعان تاۋەلسىزدىك كۇنىنە ارنالعان مەرەكەلىك شارالار 17 جەلتوقساندا اياقتالادى.
بۇل كۇندەرى وبلىستا 250 مىڭعا جۋىق ادامدى قامتىعان 400-دەن اسا اۋقىمدى مادەني-كوپشىلىك, الەۋمەتتىك ماڭىزى بار شارالار وتەدى. ەلدىڭ باستى مەرەكەسى قارساڭىندا 32 جاڭا وندىرىستىك جانە الەۋمەتتىك نىسانداردى اشۋ جوسپارلانىپ وتىر. اتاپ ايتقاندا, ەكى مەكتەپ, بەس بالاباقشا, بەس كوپقاباتتى تۇرعىن ءۇي, اۋىلداردا ءتورت گازبەن جانە سۋمەن جابدىقتاۋ نىساندارى, وڭالتۋ ورتالىعى, ەكى سپورتتىق نىسان مەن ت.ب. پايدالانۋعا بەرىلمەك.
وبلىس اكىمى بەردىبەك ساپارباەۆ از قامتىلعان جانە كوپ بالالى وتباسىلاردى, مۇگەدەكتەر مەن الەۋمەتتىك جاعىنان الجۋاز توپتارعا جاتاتىن باسقا دا ازاماتتاردى قولداپ, ماتەريالدىق كومەك كورسەتۋگە باسا نازار اۋدارۋدى تاپسىردى.
«مەملەكەتتىڭ قامقورلىعى مەن مەرەكەلىك كوڭىل-كۇيدى ءاربىر وتباسى, ءاربىر اقتوبەلىك سەزىنۋى كەرەك»,-دەدى ءوڭىر باسشىسى.
جيىن كەزىندە سونداي-اق, جاڭا جىلعا دايىندىق جانە ونى وتكىزۋ شارالارىنىڭ جوسپارى دا قارالدى.
اقتوبە قالاسى اكمىنىڭ ورىنباسارى كۇلپارشىن ايدارحانوۆانىڭ سوزىنشە, وبلىس ورتالىعىنىڭ كوشەلەرىندە 17 جەلتوقساننان باستاپ ەلۋدەن اسا جاڭا جىل شىرشالارى ورناتىلىپ, مەرەكەلىك جارىقتاندىرۋلار ۇيىمداستىرىلادى. اباي داڭعىلىن بەزەندىرەتىن باس شىرشانىڭ بيىكتىگى وتىز مەتر. ونى 18 جەلتوقساندا سالتاناتتى تۇردە جاعادى دەپ جوسپارلانىپ وتىر. جاڭاجىلدىق شىرشالار سونداي-اق, قر تۇڭعىش پرەزيدەنتى اتىنداعى ساياباقتا, ارباتتا, «باتىس-2» (مۇز سارايى جانىنداعى) جانە «نۇر اقتوبە» تۇرعىن ءۇي الاپتارىندا ورناتىلادى.
ورتالىق ستاديون اۋدانىندا قالا تۇرعىندارى مەن قوناقتارى ءۇشىن مۇز قالاشىعى اشىلدى. 14 جەلتوقساننان باستاپ قالا بويىنشا بارلىعى 48 مۇز ايدىنى جۇمىس جاساي باستايدى. 80 مىڭنان استام بالاعا مىڭنان اسا جاڭا جىلدىق ەرتەڭگىلىكتەر وتەدى.
31 جەلتوقسان كۇنى تۇرعىندارعا ىڭعايلى بولۋ ءۇشىن اقتوبەدەگى تۇڭعىش پرەزيدەنت اتىنداعى ساياباقتا, «باتىس-2» جانە «نۇر اقتوبە» تۇرعىن ءۇي الاپتارىندا العاش رەت باستى مادەني-كوپشىلىك جاڭاجىلدىق شارالار مەن مەرەكەلىك وت شاشۋلار ۇيىمداستىرىلادى. بۇدان باسقا, مەيرامدار الدىندا قالانىڭ ءتۇرلى نۇكتەلەرىندە ازىق-ت ۇلىك ونىمدەرىنىڭ كەڭ تاڭداۋى ارزان باعامەن ساتىلاتىن اۋىل شارۋاشىلىعى جارمەڭكەلەرى تۇراقتى تۇردە وتكىزىلەدى.
ءوڭىر باسشىسى مەرەكەلىك شارالاردى جوعارى دەڭگەيدە وتكىزۋ ءۇشىن بارلىق شارالاردى قابىلداۋدى تاپسىردى.
