زاڭ جوباسىنىڭ تۇجىرىمداماسى ەلباسىنىڭ 2018 جىلدىڭ 5 قازانىنداعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋى اياسىندا ازىرلەنگەن بولاتىن. تالقىلاۋعا ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا الماتى قالاسىنان ونلاين رەجىمدە قاتىسىپ, بىرقاتار سۇراقتارعا جاۋاپ بەردى.
«ەلباسى جولداۋىن ورىنداۋ ماقساتىندا مينيسترلىك «پەداگوگ مارتەبەسى تۋرالى», وقۋشى جانە مۇعالىم جۇكتەمەسىن ازايتۋ ماسەلەلەرى بويىنشا كەيبىر زاڭنامالىق اكتىگە وزگەرتۋلەر مەن تولىقتىرۋلار ەنگىزۋ تۋرالى زاڭ جوباسىن ازىرلەپ, تالقىلاۋدا. وسى ماقساتتا جۇمىس توبى قۇرىلدى. ونىڭ ىشىندە مەكتەپ مۇعالىمىنەن باستاپ كوللەدج, جوو پەداگوگتارى, مەملەكەتتىك ورگاندار وكىلدەرى, اتا-انالار دا بار. حالىق جاڭادان ازىرلەنىپ جاتقان زاڭ جوبالارىن تالقىلاۋعا بەلسەندى قاتىسىپ جاتىر. بۇگىندە رەسپۋبليكانىڭ تۇكپىر-تۇكپىرىنەن 2 مىڭعا جۋىق ۇسىنىس كەلىپ ءتۇستى. ءالى دە قوسار ۇسىنىستارىڭىزدى bilimdiel.project@mail.ru, pressa.edu@gmail.com ەلەكتروندى ادرەسىنە جىبەرۋلەرىڭىزدى سۇرايمىز», دەدى ۆيتسە-مينيستر.
زاڭ جوباسىنىڭ تۇجىرىمداماسى ءبىلىم بەرۋ ۇيىمدارىنىڭ قۇقىقتارى مەن كەپىلدىكتەرىن, پەداگوگيكالىق جانە عىلىمي جۇمىستارىن جۇزەگە اسىرۋدى, سونداي-اق ءبىلىم بەرۋ دەڭگەيىنىڭ, مەنشىك نىساندارىنىڭ, ءبىلىم بەرۋ ۇيىمدارىنىڭ ءتيپى مەن تۇرلەرىنە قاراماستان مەملەكەتتىك, قوعامدىق قولداۋ جانە تانۋ شارالارىن جۇزەگە اسىرۋدى قامتيتىن مۇعالىم مارتەبەسىن كوتەرۋگە باعىتتالعانىن ايتا كەتكەنىمىز ءجون.
تالقىلاۋدان اڭعارعانىمىزداي, جاڭا زاڭ جوباسى ارقىلى بۇگىندە زور شەشىمدى قاجەت ەتىپ تۇرعان بىرنەشە ماسەلە بار. بۇل – ماماندىقتىڭ مىندەتىنە كىرمەيتىن فۋنكتسيالار كولەمىنىڭ ارتىق بولۋى, اي سايىن قاجەتتى دەڭگەيدەگى اقىعا قول جەتكىزۋ ءۇشىن مۇعالىمدەردىڭ شەكتەن تىس جۇمىس ىستەۋگە ماجبۇرلىگى, كوپتەگەن جەڭىلدىك پەن كەپىلدەمەنى الۋدىڭ قيىندىعى, مۇعالىمدەردى قورعايتىن ارنايى زاڭنىڭ جوقتىعى, سونداي-اق پەداگوگ ماماندىعىنا ەر ادامداردىڭ بارماۋى, مەكتەپكە دەيىنگى تاربيە مەن ءبىلىم بەرۋ سالاسىندا, اعىلشىن ءتىلى جانە تاعى باسقا ناقتى ماماندىقتاردان ساباق بەرەتىن ۇستازداردىڭ جەتىسپەۋشىلىگى مەن ەڭبەكاقىنىڭ تومەندىگى.
ءبىلىم جانە عىلىم مينيسترلىگىنىڭ مەكتەپكە دەيىنگى ورتا ءبىلىم دەپارتامەنتىنىڭ باس ساراپشىسى ايمان تەلمانقىزىنىڭ ايتۋىنشا, زاڭ جوباسىنىڭ تۇجىرىمداماسى الەۋمەتتىك جەلىدە قىزۋ تالقىلانىپ جاتىر. «الايدا ۇسىنىستار مەن سۇراقتار كوپ قايتالانادى. كوبى ۇستازداردىڭ الەۋمەتتىك جاعدايىنا قاتىستى ساۋال جولدايدى. سونداي-اق مۇعالىم مەن اتا-انا اراسىنداعى قارىم-قاتىناسقا قاتىستى ماسەلەلەر ءجيى كوتەرىلىپ جاتىر. ودان بولەك, ۇستازداردى زەينەتكە ەرتە شىعارۋ جايلى كوپ حات الدىق. مۇنى ەڭبەك جانە حالىقتى الەۋمەتتىك قورعاۋ مينيسترلىگىمەن بىرىگىپ تالقىلايمىز», دەيدى ا.دۇيسەنباەۆا.
مەكتەپكە دەيىنگى جانە ورتا ءبىلىم دەپارتامەنتى ديرەكتورىنىڭ ورىنباسارى زەينەپ ماقسۇتوۆا ايتىپ وتكەندەي, تۇجىرىمدامادا مۇعالىمدەردى كورنەكى قۇرالمەن تولىق جابدىقتاۋ, الەۋمەتتىك كەپىلدىكتەر بەرۋ, جالاقىسىن كوبەيتىپ, جۇكتەمەسىن ازايتۋ قاراستىرىلعان. اۋىلدىق جەرلەردەگى مۇعالىمدەرگە جىلىنا ءبىر رەت بەرىلەتىن كوممۋنالدىق وتەماقىنى بەلگىلەۋ ماسەلەسى دە قارالىپ جاتىر.
جيىندا ۇستازدار قاۋىمىنىڭ اتىنان استانا قالاسىنداعى №76 مەكتەپ-ليتسەيىنىڭ ديرەكتورى, جاڭاشىل ۇستاز سافۋرا سەيدۋاليقىزى ءوز ويىن ءبىلدىردى. «مۇعالىمدى الەۋمەتتىك تۇرعىدان قورعاۋ, مۇعالىمنىڭ بالاسىن بالاباقشاعا جەڭىلدىكپەن ورنالاستىرۋ, ءۇي الۋداعى جەڭىلدىكتەر قاراستىرىلىپ وتىر. وسىعان قوسقىمىز كەلەتىن ءبىر ماسەلە بار. ايتالىق, بۇگىنگى تاڭدا ءارتۇرلى سالا ماماندارى مەديتسينالىق ساپالى قىزمەت الۋدا ءبىرشاما جەڭىلدىكتەرگە يە بولىپ وتىر. وسىنداي جەڭىلدىكتەر مۇعالىمدەرگە دە تيەسىلى بولسا دەگەن نيەتىمىز بار. جاسى ۇلعايعان مۇعالىمدەر تۇراقتى ەمدەلىپ وتىراتىن مەديتسينالىق مەكەمەلەر قاراستىرىلسا قۇبا-قۇپ», دەيدى س.تولەكتەگى.
قازىرگى زاڭ بويىنشا الەۋمەتتىك كەپىلدىكتەر جەرگىلىكتى اتقارۋشى بيلىكتىڭ قۇزىرەتىنە قاراي بەلگىلەنەدى. «اۋىلدىق جەردەگى مۇعالىمدەرگە كوممۋنالدىق وتەماقى تولەۋ, تەگىن مەديتسينالىق تەكسەرىستەن ءوتۋ جۇمىستارى ءار وڭىردە ءارتۇرلى جۇزەگە اسىپ جاتىر. ماسەلەن, الماتى مەن قىزىلوردا وبلىستارىنىڭ مۇعالىمدەرى ءوز اقشالارىنا مەديتسينالىق تەكسەرۋدەن وتەدى. ويتكەنى جەرگىلىكتى بيۋدجەتتە قارجى جەتىسپەيدى. ەندى وسى كەمشىلىكتەردىڭ بارلىعى زاڭمەن رەتتەلەدى دەپ سەنەمىز», دەيدى سالالىق كاسىپوداق ۇيىمى توراعاسىنىڭ ورىنباسارى ايگۇل مۇقاشەۆا.
ودان بولەك تالقىلاۋدا مۇعالىمدەردىڭ تۇرعىن ءۇي ماسەلەسى دە وزەكتى ەكەنى ايتىلدى. سەبەبى, بۇگىنگى تاڭدا ۇستازداردىڭ جالاقىسى يپوتەكامەن ءۇي الۋعا جەتپەيدى. وسى تۇرعىدان دا اتالعان زاڭ ۇستازداردىڭ بىرقاتار ماسەلەسىن شەشىپ بەرسە, دەيدى تالقىلاۋعا قاتىسۋشىلار.
ميراس اسان,
«ەگەمەن قازاقستان»
