جالپى, ەلىمىزدىڭ كولىك-ترانزيتتىك الەۋەتىن نىعايتۋدا جانە حالىقتى جەدەلدىكپەن قامتاماسىز ەتۋدە, ىشكى جانە سىرتقى بايلانىستاردى ورنىقتىرۋدا اۋە كولىگىنىڭ دە ماڭىزدى ءرول اتقاراتىنى بەلگىلى. وسى ورايدا قازاقستان ارقىلى وتەتىن اۆياتاسىمالداۋ ءترانزيتىنىڭ دامۋىندا تۇراقتى ءوسىم بار ەكەنىن ايتا كەتكەن ءلازىم. ماسەلەن, 2022 جىلعا قاراي, ەلىمىزدىڭ اۋماعىن باسىپ وتەتىن ۇشۋلاردىڭ سانى 2011 جىلعى دەڭگەيمەن سالىستىرعاندا كەمىندە 1,5 ەسەگە ارتادى دەپ كۇتىلۋدە.
الەمدەگى ەڭ جاس ەلوردالاردىڭ ءبىرى سانالاتىن استانا ەۋرازيانىڭ ءىرى ىسكەرلىك, مادەني جانە عىلىمي حابىنا اينالىپ كەلەدى. جاھان ەكونوميكاسىندا جىلدان-جىلعا جەدەل وركەندەپ كەلە جاتقان ساناتقا ەنەتىن قازاقستاننىڭ الەۋمەتتىك-ەكونوميكالىق دامۋ جاعدايى دا ەلوردانىڭ تۇرعىندارى مەن قوناقتارىنىڭ وسىمىنە وڭ ىقپال ەتىپ وتىر.
قازىرگى استانا اۋەجايىنىڭ وتكىزۋ مۇمكىندىگى 3,6 ملن جولاۋشىنى قۇرايدى. بۇل كەلەشەكتە جولاۋشىلار اعىنىنداعى ترافيكتىڭ وسىمىنە لايىقتى جاۋاپ بەرە الاتىن الەۋەت. وسىعان بايلانىستى ەلوردانىڭ اۋە قاتىناسىنداعى تۇتىنۋشى سۇرانىسىن قامتاماسىز ەتۋ جانە ەكسپو-2017 حالىقارالىق مامانداندىرىلعان كورمەسىن وتكىزۋگە دايىندىق ماقساتىندا «نۇرلى جول» مەملەكەتتىك باعدارلاماسى اياسىندا استانالىق اۋەجايدىڭ جاڭا تەرمينالى جوباسى جۇزەگە اسىرىلعان بولاتىن.
2017 جىلدىڭ 31 مامىرىندا مەملەكەت باسشىسىنىڭ قاتىسۋىمەن استانا قالاسىنداعى زاماناۋي حالىقارالىق تەرمينال اشىلعانى ءمالىم. بۇل تەرمينال حالىقارالىق رەيستەردى قابىلداۋعا ارنالىپ سالىنعان بولاتىن.
جاڭا تەرمينالدىڭ جالپى اۋدانى حالىقارالىق جولاۋشىلار جانە VIP تەرمينالىن قوسا العاندا 47 مىڭ شارشى مەتردى قۇرايدى. مۇندا جولاۋشىلاردى ۇشاققا وتىرعىزۋ جولاعىمەن بىرگە اۋە كەمەلەرىنە ارنالعان 6 جاڭا تۇراق جانە 4 اۆتوبۋسقا ارنالعان شىعۋ جولدارى بار. حالىقارالىق تالاپتارعا ساي جاڭا تەرمينال اۋماعىندا زاماناۋي قاۋىپسىزدىك جۇيەسى ورناتىلدى. سونداي-اق اۋەجايدىڭ قىزمەت كورسەتۋ ساپاسىن ارتتىرۋ ماقساتىندا جوعارى تەحنولوگيالى جۇيەلەر ەنگىزىلدى. تەرمينالدا ەلىمىزدە العاش رەت جۇكتى وڭدەۋدىڭ زاماناۋي جۇيەسى ورناتىلدى. بۇل جۇيە ەۋرووداق تالاپتارىنا سايكەس كەلەدى. سونىمەن بىرگە ساعاتىنا 1200 دانا جۇكتى وتكىزۋ قابىلەتىنە يە. جەكە كۋالىكتى تەكسەرۋگە ارنالعان 50 كابينا جۇمىس ىستەيدى. 27 تىركەۋ باعانى جانە 4 ءوزىن ءوزى تىركەۋ باعانى قىزمەت كورسەتەدى.
ت1 تەرمينالىنىڭ جالپى وتكىزۋ مۇمكىندىگى جىلىنا 5,2 ملن جولاۋشىنى قۇرايدى.
دۋمان اناش,
«ەگەمەن قازاقستان»
