كورەيادا تاعى دا ءۇش بالاعا وپەراتسيا جاسالدى

كورەيادا ءتۋابىتتى جۇرەك اقاۋى­مەن اۋىراتىن ءۇش قازاق­ستاندىق بالاقايعا تەگىن وپەراتسيا جاسالىپ, بالالار انالارىمەن ءبىر­گە ەلگە امان-ەسەن ورال­دى. قايىرىمدىلىق اك­تسيا­سىنا قازاقستانداعى كورەيا رەس­پۋب­ليكاسىنىڭ ەلشى­لىگى, كورەيانىڭ حا­لىق­ارالىق ارىپتەستىك ءجونىن­دەگى ۇيىمى قازاق­ستاننىڭ كوشباس­شى الەۋ­مەتتىك قوعامدىق قورى مەن “درۋجبا” كورەي-قازاق­ستان گوسپيتالى قول­داۋ كورسەتتى. وسىدان ون ءبىر جىل بۇرىن كورەيا مەن قازاقستان مەملەكەتتەرى باسشىلارىنىڭ باستاماسىمەن ەكى ەلدىڭ مەديتسينا سالاسىن جاقىنداستىرىپ, دوستىقتى نىعايتۋ ماقساتىندا الماتىدا “درۋجبا” كورەي-قازاقستان گوسپيتالى اشىلعان بولاتىن. ءبىر ايتا كەتەرلىگى, 2003 جىلعا دەيىن مۇنداعى مامان-دارىگەر­لەر كورەيا رەسپۋبليكاسىنان جىل سايىن اۋىسىپ كەلىپ, جۇمىس ىستەدى. ودان كەيىنگى جىلدارى گوسپي­تالعا قازاقستاندىق دارىگەر ۆيتالي كيم جەتەكشىلىك جاساعان. بۇگىندە مۇندا كورەيادان كەلگەن مامان­دارمەن بىرگە, حالىقارالىق كەلىسىم بويىنشا ۆولونتەرلەر دە قىزمەت كورسەتەدى. ەستەرىڭىزدە بولسا, 2008 جىلدىڭ قاراشا ايىندا قازاقستاندىق بەس بالا انالارىمەن بىرگە كورەياعا بارىپ, ءتۋابىتتى جۇرەك اقاۋىنا جاسالعان وپەراتسيا­لارى ءساتتى ءوتىپ, قۇلان-تازا ايىعىپ, امان-ەسەن ەلگە ورالعانى جونىندە گازەتىمىزدە جازىلعان-دى. ەندى, مىنە, سول جاقسىلىقتىڭ, قايىرىمدىلىقتىڭ, دوس­تىق­تىڭ جالعاسىنداي 2009 جىلدىڭ جەلتوقسان ايىنىڭ اياعىندا كورەيانىڭ چيندجۋ قالاسىنداعى گەنگ سانگسك ۇلتتىق ۋنيۆەرسيتەتىنىڭ جانىنداعى گوسپيتالدا قازاقستاندىق ءۇش بالاعا – دينارا داميرقىزى (4 جاستا), الىشەر جايلاۋباەۆ (5 جاستا) جانە ءاليحان تورەحانعا (7 جاستا) ءتۋابىتتى جۇرەك اقاۋىنا وپەراتسيا ءساتتى جاسالىپ, ولار نەبارى ون ەكى كۇندە ەلگە ورالىپ, وتباسىمەن قاۋىشتى. گوسپيتالدىڭ توراكالدى حيرۋرگيا ءبولىمىنىڭ حيرۋرگى, پروفەسسور لي سان حو مىرزانىڭ بالالاردىڭ جۇرەگىنە جاساعان وپەراتسياسىنىڭ ارقايسىسى بەس ساعاتقا سوزىلعان. بالالار ءۇش-ءتورت كۇننەن كەيىن-اق وزدەرىن جاقسى سەزىنىپ, سەگىزىنشى كۇنى گوسپيتالدان شىققان. – مەن وپەراتسيانىڭ ءساتتى اياقتالعانىنا وتە قۋانىشتىمىن. وپەراتسيا بىتكەن سوڭ ءوزىمنىڭ قازاق بالالارىنىڭ الداعى ومىرلەرىنە سەپتىگىمدى تيگىزگەنىمە كوڭىلىم مارقايىپ قالدى. ەكىنشى جاعىنان, قازاق­ستاندا وسىنداي اۋرۋمەن ناۋقاستانعان بالا­لارعا دەر كەزىندە وپەراتسيا جاسالمايتىنىنا قىنجىلدىم, – دەگەن ەكەن لي سان حو مىرزا وپەراتسيادان كەيىن بالالاردىڭ انالارىمەن كەزدەسۋىندە. ءيا, پروفەسسور مىرزانىڭ ايتقانىنداي, شىنىندا دا قازاقستاندا ءتۋابىتتى جۇرەك اقاۋىمەن تۋىلعان نارەستەلەر 12-15 كيلو سالماق المايىنشا, ولارعا دەر كەزىندە وپەراتسيا جاسايتىن ازىرگە كلينيكا جوق. ال مۇنداي سالماقتى بالا تەك 3 جاسقا قاراي عانا جيناي السا كەرەك. – العاشقى جولى جاسالعان قايىرىمدىلىق وپەراتسياسىنا كورەيانىڭ نيچان قالاسىنداعى گەل مەديتسينا ينستيتۋتىنىڭ پروفەسسورلارى قولۇشىن بەرگەن ەدى, – دەدى بىزبەن اڭگىمەسىندە “درۋجبا” كورەي-قازاقستان گوسپيتالىنىڭ باس دارىگەرى ۆيتالي لەوني­دوۆيچ. – ونداعى دەمەۋشىلەر نيچان قالاسى­نىڭ اكىمشىلىگى مەن باي كورپوراتسيالار, سونداي-اق سەۋل­دەگى كارديولوگيا ورتالىعى بولدى. ەندى, مىنە, كورەيا­نىڭ حالىقارالىق ارىپتەستىك جونىندەگى ۇيىمى كومەك قولىن سوزدى. مەن وسى گوسپيتالدىڭ باس دارىگەرى رەتىن­دە ءبىزدىڭ ەمدەۋ ورنىنىڭ ەكى مەملەكەت اراسىندا دوستىققا كوپىر, سەبەپكەر بولعانىنا قۋانىشتىمىن. ەگەر گوسپيتالدىڭ اشىلۋىنا ەكى مەملەكەتتىڭ باسشى­لارى سەبەپكەر بولىپ, ۇلگى كور­سەتسە, ەندى سول ەكى ەلدىڭ اراسىنداعى ارىپتەستىك قاتى­ناس بۇگىندە ءوز تيىمدىلىگىن كورسەتۋدە. الداعى ۋاقىتتا دا ءبىزدىڭ وسىنداي دوستىق قارىم-قاتىناسىمىز نىعايا تۇسەدى دەپ سەنەمىن.