ۇزىندىعى - 860 مەتر, ەنى-13 مەتر بولاتىن كوپىر قۇرىلىسى 2014 جىلى اتىراۋ وبلىستىق جولاۋشىلار تاسىمالى جانە اۆتوكولىك جولدارى باسقارماسىنىڭ تاپسىرىسىمەن باستالعان. كوپىر 180 توننا جۇكتى كوتەرە الادى, كىرمە جولدارىنىڭ جالپى ۇزىندىعى-8,5 شاقىرىم.
جايىق وزەنى ارقىلى وتەتىن اۆتوكولىك كوپىرى ترانزيتتىك تاسىمالداۋدى دامىتۋ باعدارلاماسى اياسىندا جۇزەگە اسقان وبلىستاعى 7-ءشى كوپىر. سونىمەن قاتار, جاڭا كوپىر «اتىراۋ-اقتوبە-استراحان» جانە «اتىراۋ-ورال» باعىتتارى بويىنشا قوزعالىستى جانە جۇك تاسىمالىن جەڭىلدەتەدى.
اۋدان تۇرعىندارى اسىعا كۇتكەن سالتاناتتى لەنتا قيۋ ءراسىمى قر پارلامەنتى ءماجىلىسىنىڭ دەپۋتاتى, «ارداگەرلەر كەڭەسى» رەسپۋبليكالىق قوعامدىق بىرلەستىگىنىڭ توراعاسى باقتىعوجا ىزمۇحامبەتوۆ پەن ناسىپقالي سامەنوۆكە تابىستالدى. شاراعا ارنايى قاتىسقان وبلىس اكىمى نۇرلان نوعاەۆ وبلىس ءۇشىن ماڭىزى بار نىساننىڭ ەل يگىلىگى ءۇشىن سالىنعانىن اتاپ ءوتتى.
-بۇگىن بارلىق اتىراۋلىقتار مەن كورشى وبلىستار كوپتەن كۇتكەن جايىقتىڭ قوس جاعاسىن جالعاستىراتىن كوپىر ىسكە قوسىلدى. ەلىمىزدە وسىنداي ۇلكەن نىساندار سالۋعا قارجىلىق, اكىمشىلىك جاعدايلار جاسالعان. وسى يگى ىستەر ەلىمىزدەگى ساياسي تۇراقتىلىق, قوعامدىق كەلىسىم مەن ەتنوس, ءدىن ارالىق تاتۋلىقتىڭ ارقاسىندا بولىپ جاتىر. بۇل – ەلباسىمىز ن.نازارباەۆتىڭ دامۋعا, جاسامپازدىققا, قازاقستاندىقتاردىڭ ءال-اۋقاتىن كوتەرۋگە جانە الەمدەگى قاۋىمداستىقتا قازاقستاننىڭ ءوز ورنىن الۋىعا باعىتتالعان ىشكى جانە سىرتقى ساياساتتاعى سارابدال ىستەرىنىڭ ناتيجەسى. ەل دامۋى تۇراقتى قامتاماسىز ەتىلدى. جاڭا تەحنولوگيا مەن جاڭا تەحنيكالار كەلىپ, حالىقتىڭ يگىلىگى ءۇشىن قىسقا ۋاقىتتا ساپالى نىساندار سالۋ ماسەلەسى شەشىلۋدە. وسى كوپىر قۇرىلىسىن سالۋعا ات سالىسقان بارلىق ازاماتتارعا, سونىڭ ىشىندە مەردىگەر «اتىراۋينجستروي» مەكەمەسىنە زور العىسىمدى بىلدىرەمىن. جاڭا نىسان ەل يگىلىگىنە, وبلىس قاجەتتىلىگىنە جاراسىن,-دەدى ايماق باسشىسى.
كوپىر وزەن جاعالاۋلارىن عانا ەمەس, سونىمەن قاتار وزەننىڭ ەكى جاعىندا ورنالاسقان 10 سەلولىق وكرۋگتى بىرىكتىردى, بۇل شامامەن 40 مىڭ ادامدى قۇرايدى. تۇرعىندار بۇرىن وزەننىڭ كەلەسى جاعالاۋىنا پاروم ارقىلى عانا نەمەسە اينالما جول ارقىلى جەتەتىن, وزەندە مۇز قاتقان كەزدە قاۋىپتى بولسا دا مۇز ۇستىمەن ءجۇرىپ وتۋگە تۋرا كەلدى. اۋداندىق اۋرۋحاناعا قابىلداۋعا بارۋ ءۇشىن دە 60 شاقىرىم جەردە ورنالاسقان وبلىس ورتالىعى ارقىلى عانا بارۋ مۇمكىن بولدى.
