بىرنەشە عاسىر بويى «اكتيۋبينسكي ۆەستنيك» گازەتىنىڭ ءوز عيماراتى بولمادى. مەرەيتوي جىلى بۇل ماسەلە شەشىمىن تاپتى. 30 قاراشا, جۇما كۇنى وبلىستاعى تۇڭعىش ءباسپاسوز ءۇيى سالتاناتتى تۇردە اشىلدى. ەندى مۇندا وبلىستاعى ەكى باستى باسىلىم - «اقتوبە» جانە «اكتيۋبينسكي ۆەستنيك» گازەتتەرى ورنالاسادى.
باسىلىم ۇجىمدارىن قۋانىشتارىمەن اقتوبە وبلىسىنىڭ اكىمى بەردىبەك ساپارباەۆ تا قۇتتىقتادى.
«سىزدەردى قر تۇڭعىش پرەزيدەنتى كۇنىمەن جانە ەلىمىزدىڭ تاريحىنداعى العاشقى گازەتتەردىڭ ءبىرى – «اكتيۋبينسكي ۆەستنيك» گازەتىنىڭ 100 جىلدىعىمەن قۇتتىقتايمىن! گازەت وسى ۋاقىت ىشىندە ءبىزدىڭ جالپى تاريحىمىزدىڭ ءتۇرلى ساتتەرىن حالىقپەن بىرگە وتكەردى. قۇلدىراۋ, اشارشىلىق, سوعىس جىلدارى سىندى قيىن-قىستاۋلارعا قاراماستان شىعا بەردى. بۇل مەرەيتوي – گازەت ۇجىمى ءۇشىن دە, بۇكىل وبلىس ءۇشىن دە ۇلكەن, اسىلىندا اتاۋلى كۇن. گازەتتىڭ 100 جىلدىعىن مەرەكەلەۋ اياسىندا وبلىس تاريحىندا ءبىرىنشى رەت ء«باسپاسوز ءۇيىن» اشقانىمىز قۋانتادى. بۇل ءبىزدىڭ وڭىردەگى جۋرناليستيكا مەن بۇقارالىق اقپارات قۇرالدارىنىڭ دامۋىنا جاڭا شابىت بەرەتىنىنە سەنىمدىمىن»,- دەدى بەردىبەك ساپارباەۆ.
ءباسپاسوز ءۇيىنىڭ اشىلۋىنا بايلانىستى وتكەن سالتاناتتى شاراعا سونداي-اق, وليمپيادا چەمپيونى جاقسىلىق ۇشكەمپىروۆ, قازاقستانداعى اتاقتى قوعام قايراتكەرلەر مەن جۋرناليستەر – عادىلبەك شالاحمەتوۆ, قاينار ولجاي, نۇرتىلەۋ يمانعالي ۇلى مەن ت.ب., وبلىستىق گازەتتەردىڭ رەداكتورلارى, ارداگەرلەر مەن گازەتتىڭ بۇرىنعى قىزمەتكەرلەرى قاتىستى.
قوناقتار الاڭى شامامەن 6,8 مىڭ شارشى مەتر بولاتىن ءباسپاسوز ءۇيىنىڭ ءتورت قاباتتى كەڭ ءارى جارىق عيماراتىن ارالادى. بۇگىندە مۇندا باسپاحانا مەن «اقتوبە» جانە «اكتيۋبينسكي ۆەستنيك» گازەتتەرى مەن ولاردىڭ سايتتارىنىڭ, «اقتوبە», «ادىرنا», ء«ۇش تاعان» جۋرنالدارىنىڭ, «اقتوبەمەديا.kz» مەديا پورتالىنىڭ, «Akotbenews»اقپاراتتىق سايتىنىڭ مەنشىك يەسى «اكتوبە مەديا» جشس ورنالاسقان.
بۇدان باسقا, ءباسپاسوز ۇيىندە بۇقارالىق اقپارات قۇرالدارىنىڭ مۇراجايى, كىتاپحانا, بەلگىلى جۋرناليست گۇلناز الىمگەرەيدىڭ ونلاين-ستۋدياسى مەن اۆتورلىق مەديا مەكتەبى اشىلعان.
«اكتيۋبينسكي ۆەستنيك» گازەتىنىڭ 100 جىلدىعىنا ارنالعان باستى شارا بۇگىن كەشكە ت.احتانوۆ اتىنداعى دراما تەاتر عيماراتىندا وتەدى. شارا اياسىندا باسىلىمنىڭ ۇجىمى مەن جەكەلەگەن قىزمەتكەرلەرىنە قر پرەزيدەنتى اكىمشىلىگىنىڭ, قر اقپارات جانە بايلانىس مينيسترلىگىنىڭ, وبلىس اكىمى مەن وبلىستىق ءماسليحاتتىڭ ءتۇرلى ماراپاتتارى تابىس ەتىلەدى.
