عيماراتتاردى ارالاۋ بارىسىندا «Yessenov University» ستۋدەنتتەرگە قىزمەت كورسەتۋ ورتالىعى تولىققاندى قىزمەت جاساپ تۇرعاندىعى, ستۋدەنتتەر ءۇشىن قولايلى جاعدايدىڭ جاسالعاندىعى بايقالدى. قىزمەتتەر الۋ كەزىندەگى جاپپاي كەپتەلىستى بولدىرماۋ ءۇشىن ارنايى ەلەكتروندى كەزەكتىلىك جانە تەرمينال ورنالاستىرىلعان.
بۇدان كەيىن, ماماندار اقتاۋ قالاسىندا ورنالاسقان ارناۋلى ورتا ءبىلىم بەرۋ ۇيىمدارىن (كوللەدجدەردى) ارالاپ, ءوز وزىنە قىزمەت كورسەتۋ بۇرىشتارى مەن ستۋدەنتتەرگە مەملەكەتتىك قىزمەت كورسەتۋدىڭ ءتارتىبىن ءىس جۇزىندە كورىپ شىقتى.
ولاردىڭ ىشىندە حالەل وزبەكعاليەۆ اتىنداعى ماڭعىستاۋ پوليتەحنيكالىق كوللەدجىنىڭ ء«بىر تەرەزە» قاعيداتىن ناقتى ۇستانىپ, ستۋدەنتتەر ءۇشىن ارنايى قىزمەت كورسەتۋ ورتالىعى مەن كورنەكتى جەردە ءوز-وزىنە قىزمەت كورسەتۋ بۇرىشى ءتيىستى دەڭگەيدە ۇيىمداستىرىلعان.
جۇمىس توبى ءبىلىم الۋشىلارمەن تىلدەسىپ, قىزمەت كورسەتۋ ساپاسىنا قاتىستى ۇسىنىس-پىكىرلەرىن تىڭدادى. بىراق, بۇل جۇمىستاردى ۇيىمداستىرۋ كوللەدجدەردىڭ بارلىعىندا بىردەي ءوز دارەجەسىندە ورىندالماعان.
مىسالى, ماڭعىستاۋ ەنەرگەتيكالىق كوللەدجىندە ستۋدەنتتەردىڭ وزىنە-ءوزى قىزمەت كورسەتۋ بۇرىشىنىڭ قىزمەتىمەن تانىسۋ ءۇشىن جاعداي جاسالماعان, قىزمەت الۋشىلاردىڭ, ياعني ستۋدەنتتەر ساپالى قىزمەت الا الماي الەك. ماڭعىستاۋ گۋمانيتارلىق كوللەدجىندە اتالعان سەرۆيستىڭ ستۋدەنتتەر ءۇشىن قولايسىز جەردە ورنالاسقان جانە اقپاراتتاندىرۋعا بايلانىستى جول كورسەتۋ بەلگىلەرىنىڭ بولماۋى سياقتى كەمشىلىكتەر كەزدەستى.
ال, ماڭعىستاۋ تۋريزم كوللەدجىنىڭ عيماراتى بولسا تالاپقا ساي, ءارى بارلىق قاجەتتى تەحنيكالىق قۇرالدارىمەن, وقۋ تاجىريبەلىك جۇمىستار ءۇشىن جوعارعى دەڭگەيدە ورىنداردىڭ ەرەكشە جابدىقتالۋى, قىزمەت كورسەتۋ ورنىنداعى مامانداردىڭ بىلىكتىلىگى ايقىن كورىنىپ تۇردى.
قورىتا كەلگەندە ۋاكىلەتتى ورگان تاراپىنان وقۋ ورىندارىنىڭ باسشىلارىنا ورىن العان كەمشىلىكتەردى جويۋ جونىندە ۇسىنىستار بەرىلدى. ال ونىڭ ورىندالۋىن باقىلاۋ وبلىستىق ءبىلىم باسقارماسىمەن جۇزەگە اسىرىلاتىن بولادى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
