كوپشىلىكتىڭ كوڭىلىن باۋراعان مادەني ءىس-شارا نازارباەۆ زياتكەرلىك مەكتەبى وقۋشىلارىنىڭ ۇيىمداستىرۋىمەن وسىمەن ءتورتىنشى مارتە وتكىزىلىپ وتىر. بۇل كۇندى اسىعا كۇتەتىن ەلىمىزدەگى 20 نازارباەۆ زياتكەرلىك مەكتەبىنىڭ شاكىرتتەرى ءوز قالالارىنداعى ساۋدا ورتالىقتارىندا باس قوسىپ, مەرەيلى مەرەكەگە تارتۋ جاساۋدى داستۇرگە اينالدىرعان.
فيزيكا-ماتەماتيكا باعىتىنداعى جاس دارىندار مەكتەبىنىڭ دومبىرا وركەسترىنىڭ مۇشەلەرى كۇي اتاسى قۇرمانعازىنىڭ «بالبىراۋىن», ءابدىمومىن جەلدىباەۆتىڭ «ەركە سىلقىم» كۇيلەرىن كۇمبىرلەتە ورىنداپ كوپشىلىكتىڭ العىسىنا بولەندى. ال مەكتەپشىلىك حور ۇيىرمەسىنىڭ تالانتتارى «قازاق ەلى» ءانىن ناقىشىنا كەلتىرە شىرقاپ مەرەكەنىڭ شىرايىن اشتى. پەداگوگ-ۇيىمداستىرۋشى جانەركە ساتقىنبەكوۆانىڭ سوزىنشە, وقۋشىلار بۇل كۇنگە ايرىقشا دايىندالعان. ولاردىڭ ۇستىندەگى قازاقى ويۋ-ورنەكتەرمەن كومكەرىلگەن ۇلتتىق كيىمدەرىنىڭ ءوزى شاكىرتتەر ءۇشىن بۇل مەرەكەنىڭ ءمانى زور ەكەنىن اڭعارتاتىنداي. جۇزدەرى بال-بۇل جايناعان ولار ءوز اسەرلەرىمەن ءبولىستى.
«بۇگىن بارشا ەلىمىز ءۇشىن ۇلكەن مەرەكە. ەلباسىنىڭ اتىمەن اتالاتىن مەكتەپ بولعاننان كەيىن بۇل كۇن بىزگە ەرەكشە جاۋاپكەرشىلىك جۇكتەيتىندەي كورىنەدى. ونەرىمىزدى پاش ەتىپ, حالىقتىڭ كوڭىل-كۇيىن كوتەرەمىز. جارقىن بولاشاعىمىز ءۇشىن ەڭبەك ەتكەن پرەزيدەنتىمىزگە العىسىمىزدى وسى ارقىلى جەتكىزگىمىز كەلەدى», دەيدى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 7 «ا» سىنىپ وقۋشىسى الديار جايساڭباەۆ.
2014 جىلى اشىلعان ءبىلىم ورداسىندا بۇگىنگى تاڭدا مىڭعا تارتا شاكىرت ءبىلىم الۋدا. وقىتۋشىلار قۇرامى تاجىريبەسى مول بىلىكتى مامانداردان قۇرالعان. شەت ەلدەردەن ارنايى شاقىرتىلعان ۇستازدار ءدارىس بەرەدى. ءبىر ايتا كەتەرلىگى, از جىلدار ىشىندە مەكتەپ شاكىرتتەرى حالىقارالىق وليمپيادالاردا توپ جارىپ, جاس زياتكەرلەرگە ارنالعان الەمدىك جوبالاردا كوش باسىنان كورىنگەن.
ارمان وكتيابر,
«ەگەمەن قازاقستان»
الماتى
