س.گروموۆ 1868 جىلعى جارىلعىش جانە ورتەگىش وقتاردى قولدانۋدان باس تارتۋ تۋرالى سانكت-پەتەربۋرگ دەكلاراتسياسىنىڭ تاريحي ماڭىزدى قۇجات ەكەنىنە كونفەرەنتسياعا قاتىسۋشىلاردىڭ نازارىن اۋداردى. بۇل دەكلاراتسيا اسكەري قيمىلدار بارىسىندا قارۋدىڭ جەكەلەگەن تۇرلەرىن قولدانۋعا تىيىم سالعان جانە حالىقارالىق گۋمانيتارلىق قۇقىقتى ودان ءارى دامىتۋدىڭ نەگىزىن قالاعان العاشقى رەسمي كوپ جاقتى كەلىسىم بولدى.
سەنات توراعاسىنىڭ ورىنباسارى جارتى عاسىر ۋاقىت ىشىندە قارۋدىڭ جاڭا تۇرلەرى, سونىڭ ىشىندە بۇكىل ادامزاتتى جەر بەتىنەن جويىپ جىبەرەتىن جاپپاي قىرىپ-جويۋ قارۋلارى پايدا بولعانىن اتاپ ءوتتى.
وسىعان بايلانىستى س.گروموۆ 2016 جىلى جاريالانعان پرەزيدەنت نۇرسۇلتان نازارباەۆتىڭ «الەم. XXI عاسىر» مانيفەسىنە نازار اۋداردى. «بۇل بىرەگەي ساياسي قۇجات جاھاندىق قاۋىپسىزدىكتىڭ بەرىك كەپىلدىگىن قامتاماسىز ەتۋ ءۇشىن الەم قاۋىمداستىعى باسشىلىققا الۋى ءتيىس باستى قاعيداتتاردى قامتيدى. بىرىنشىدەن, مانيفەستە اتالىپ وتكەندەي, قازىرگى زامانداعى سوعىستىڭ بىردە-بىرىندە جەڭىسكە جەتكەندەر بولمايتىنىن جەتە ءتۇسىنۋىمىز قاجەت. ەكىنشىدەن, جاڭا سوعىستا جاپپاي قىرىپ-جويۋ قارۋلارىن پايدالانباۋ مۇمكىن ەمەس. ۇشىنشىدەن, مەملەكەتتەر اراسىنداعى بارلىق داۋلاردى رەتتەۋدىڭ نەگىزى بەيبىت ۇنقاتىسۋ مەن سىندارلى كەلىسسوزدەر بولۋى ءتيىس», - دەدى س.گروموۆ.
ول قازاقستان يادرولىق قارۋدان تولىق باس تارتقان الەمگە قاراي دايەكتى تۇردە ىلگەرىلەۋگە; ورنىقتى الەم گەوگرافياسىن قالىپتاستىرۋعا; ادامزاتتى ءبولىپ-جاراتىن اسكەري بلوكتاردى جابۋعا جانە قارۋسىزداندىرۋ ۇدەرىسىن جاڭا تاريحي احۋالعا بەيىمدەۋگە ۇندەيتىنىن اتاپ ءوتتى.
س.گروموۆ جۋىردا عانا استانا كلۋبىنىڭ وتىرىسىندا قازاقستاننىڭ پرەزيدەنتى ن.نازارباەۆتىڭ سويلەگەن سوزىنە پارلامەنتشىلەردىڭ نازارىن اۋداردى. ەلباسىمىز گەوساياسي باسەكەلەستىكتىڭ ۋشىعۋى جاھاندىق قاۋىپسىزدىك نەگىزدەرى مەن ستراتەگيالىق تۇراقتىلىقتى وزگەرتۋىنە بايلانىستى ءوز الاڭداۋشىلىعىن بىلدىرگەن بولاتىن. «جاھاندىق سىن-قاتەرلەردى ەڭسەرۋدىڭ شەشىمدەرىن ىزدەۋ ماقساتىندا پرەزيدەنت 1975 جىلى قول قويىلعان حەلسينكي قورىتىندى اكتىسىن جاڭارتۋدى جانە 2020 جىلى قاۋىپسىزدىك پەن ىنتىماقتاستىق جونىندەگى وسىنداي كونفەرەنتسيانى وتكىزۋدى ۇسىندى. ەلباسى ن.نازارباەۆ سونداي-اق ازياداعى قاۋىپسىزدىك جانە ىنتىماقتاستىق جونىندەگى ۇيىمدى قۇرۋ قاجەتتىگىن اتاپ ءوتتى. استانانىڭ باستاماسىمەن قۇرىلعان ازياداعى ءوزارا ىقپالداستىق جانە سەنىم شارالارى جونىندەگى كەڭەس (اوسشك) وسى ۇيىمنىڭ ىرگەتاسى بولا الادى», - دەپ مالىمدەدى سەنات توراعاسىنىڭ ورىنباسارى.
ءسوز سوڭىندا س.گروموۆ سانكت-پەتەربۋرگ دەكلاراتسياسى «سوعىس قاجەتتىلىكتەرى ادامگەرشىلىك تالاپتارىنىڭ الدىندا توقتايتىن» شەكارانى قۇقىقتىق انىقتاۋ ۇدەرىسىنىڭ باستاپقى نۇكتەسىنە اينالدى, دەپ اتاپ ءوتتى. «دەكلاراتسيادا قامتىلعان, ادامگەرشىلىكتى وزەك ەتكەن قاعيداتتار مەن قۇندىلىقتاردى ادامزاتتىڭ بولاشاعى ءۇشىن ساقتالۋى ءتيىس», - دەپ اتاپ ءوتتى توراعا ورىنباسارى.
