مەملەكەت باسشىسى ۇلتتىق اسكەري-پاتريوتتىق ورتالىققا بارىپ, «وتان, ەلباسى, جاس سارباز» اتتى مەرەكەلىك ءىس-شاراعا قاتىستى, سونداي-اق بالالار مەن جاسوسپىرىمدەر اسكەري-پاتريوتتىق قوزعالىسىنىڭ تاربيەلەنۋشىلەرىمەن كەزدەستى.
ەلباسى ءىس-شارا باستالار الدىندا اسكەري-پاتريوتتىق ورتالىق مۋزەيىنىڭ ەكسپوزيتسيالارىمەن تانىستى. وندا قازاقستان ارمياسىنا ارنالعان اسكەري سۋرەتشىلەر ستۋدياسىنىڭ تۋىندىلارى مەن «وربۇلاق شايقاسىنىڭ» ديوراماسى قويىلعان, سونىمەن قاتار 3D-mapping شوۋ تەحنولوگياسىن قولدانا وتىرىپ, پروەكتسيالىق كورمە ۇيىمداستىرىلعان.
قازاقستان پرەزيدەنتى شاراعا قاتىسۋشىلاردىڭ ءبارىن وسكەلەڭ ۇرپاقتى وتانشىلدىققا تاربيەلەيتىن «جاس سارباز» قوزعالىسىنىڭ قۇرىلۋىمەن قۇتتىقتادى. وسىعان وراي, مەملەكەت باسشىسى ۇلتتىق رۋحتى قالىپتاستىرىپ, ەل تاريحىن تەرەڭ زەرتتەۋدىڭ ماڭىزدىلىعىن ايرىقشا اتاپ ءوتتى.
– جاقىندا جاريالانعان جولداۋداعى ماڭىزدى ماسەلەلەردىڭ ءبىرى – پاتريوتتىق تاربيە بەرۋ ءىسى. ەگەر ءبىز وتانىمىزدى قورعاي الماساق, وندا تاۋەلسىزدىكتىڭ 27 جىلى ىشىندە اتقارعان بارلىق جۇمىسىمىزدىڭ ءمانى جوعالادى, – دەدى نۇرسۇلتان نازارباەۆ.
ەلباسى بۇگىندە مەملەكەت تاراپىنان اتقارىلىپ جاتقان شارالاردىڭ ءبارى كەلەر ۇرپاق ءۇشىن جاقسى جاعداي جاساۋعا باعىتتالعانىن ايتتى.
– وسىنىڭ ءبارى جاستارىمىز – ءبىزدىڭ بولاشاعىمىز ءۇشىن. اتقارىلىپ جاتقان جۇمىستاردىڭ ءبارى سىزدەردىڭ ومىرلەرىڭىزدى ودان سايىن جاقسارتىپ, قازاقستانىمىزدى ودان ءارى بايىتا ءتۇسۋ ءۇشىن جاسالۋدا, – دەدى مەملەكەت باسشىسى.
نۇرسۇلتان نازارباەۆ ەلىمىزدىڭ بارلىق جاستارىن «جاس سارباز» قوزعالىسى مۇشەسىنىڭ قاتارىنا قوسىلۋعا شاقىردى.
– «جاس سارباز» قوزعالىسى ەلىمىزدىڭ بارلىق وڭىرىندە قۇرىلۋعا ءتيىس. جاستار وسى قوزعالىستىڭ قاتارىنان تابىلۋى قاجەت. سوندىقتان, دەنە شىنىقتىرۋمەن اينالىسىپ, اسكەري ماماندىقتاردى يگەرگەن ءجون. بۇل قوزعالىس قورعانىس مينيسترلىگىمەن بىرلەسىپ, پاتريوتتار تاربيەلەۋ ىسىنە بەلسەندى اتسالىسۋى كەرەك. سوندا عانا سىزدەر ءوز حالقىڭىزدىڭ تىرەگىنە اينالاسىزدار, – دەدى قازاقستان پرەزيدەنتى.
مەملەكەت باسشىسى « ۇلى دالانىڭ جەتى قىرى» اتتى ماقالانىڭ قازاقستاندىق ءپاتريوتيزمدى كۇشەيتۋ ىسىندەگى ەرەكشە ماڭىزىن ايتتى.
نۇرسۇلتان نازارباەۆ قازاقستان قوعامىنىڭ گۇلدەنۋى ءۇشىن تۇراقتىلىق پەن ۇلتارالىق كەلىسىمدى ساقتاۋدىڭ ماڭىزدىلىعىن اتاپ ءوتتى.
– ەلىمىزدە كوپتەگەن ەتنوس وكىلدەرى تۇرادى. ءبىز ءبارىمىز دە – قازاقستان ازاماتتارىمىز. باي تاريحىمىزدىڭ ارقاسىندا توزىمدىلىك پەن قۇرمەتتەۋدى بويىمىزعا سىڭىردىك. بۇل قۇندىلىقتار قازاقستاندى بىرىكتىرەدى, مەملەكەتتى قۋاتتى جانە سىيلى مەملەكەتكە اينالدىرادى. سوندىقتان وتانىمىزدىڭ پاتريوتى بولۋ – بارشامىزدىڭ پارىزىمىز, – دەدى قازاقستان پرەزيدەنتى.
سوڭىندا مەملەكەت باسشىسى بارلىق قاتىسۋشىلارعا تابىس پەن جاڭا جەتىستىكتەر تىلەدى.
