بيىكتىگى 5,3 مەتر بولاتىن ەسكەرتىشتىڭ لەنتاسىن ءبىلىم جانە عىلىم ءمينيسترى ەرلان ساعاديەۆ, تۇركىستان وبلىسىنىڭ اكىمى جانسەيىت تۇيمەباەۆ پەن شىمكەنت قالاسىنىڭ اكىمى عابيدوللا ءابدىراحىموۆ قيدى. سالتاناتتى راسىمدە ءسوز العان وبلىس اكىمى ءمۇسىننىڭ شىنايى شىققانىن, وڭىردەگى قارا شاڭىراققا اينالعان ءبىلىم وشاعىنىڭ ۇلى جازۋشى مۇحتار اۋەزوۆتىڭ ەسىمىمەن اتالاتىنى ۇلكەن ماقتانىش ەكەنىن اتاپ ءوتتى. مەرەكەلىك شارادا قوناقتار, سونداي-اق «مۇحتارتانۋ» عىلىمي-زەرتتەۋ ورتالىعىنىڭ اشىلۋىنا قاتىستى.
تۇساۋى كەسىلگەن تاعى ءبىر نىسان – «ستۋدەنتتەرگە قىزمەت كورسەتۋ ورتالىعىندا» بولدى. شاكىرتتەرگە ء«بىر تەرەزە» قاعيداسى بويىنشا قىزمەت كورسەتەتىن ورتالىقتىڭ جۇمىسىمەن مينيستر ەرلان ساعاديەۆ ارنايى تانىسىپ شىقتى. ورتالىق ءبىر مەزەتتە 40-50 ستۋدەنتكە قىزمەت ەتەدى. ۋنيۆەرسيتەتتىڭ رەكتورى, تاريح عىلىمدارىنىڭ دوكتورى, پروفەسسور داريا قوجامجاروۆانىڭ ايتۋىنشا, تسيفرلانعان ورتالىق قىزمەتى ارقىلى ستۋدەنتتىڭ ءبىلىم الۋى, ساباققا قاتىسۋى, ەمتيحان ناتيجەلەرى باقىلانىپ, قاجەتتى قۇجاتتارىنا دا قول جەتكىزۋىنە بولادى.
عالىمجان ەلشىباي,
«ەگەمەن قازاقستان»
شىمكەنت
