جانبولات كەنجەعۇل
مادەني ءومىرىمىزدىڭ كوركەمدىك قورىن جاڭعىرتىپ, اسىل قازىنامىزدى دارىپتەۋدە بۇگىنگىدەي ءىس-شارالاردىڭ ماڭىزى زور. سوندىقتان دا بولار سەگىز سەرىنىڭ ءومىرى مەن ونەرىن زەرتتەۋگە دەگەن قىزىعۋشىلىق ارتا تۇسكەن. ماسەلەن, كومپوزيتور, مەملەكەتتىك سىيلىقتىڭ لاۋرەاتى بالنۇر قىدىربەك: «بارلىق سينكرەتتى ونەر يەلەرى سياقتى, سەگىز سەرى اندەرىنىڭ العاشقى ورىنداۋشىسى ءوزى بولدى. شىعارمالارىن تالداپ وتىرىپ بايقايتىنىمىز: سەرى اتانىڭ داۋىس دياپازونى درامالىق باريتوننان درامالىق تەنورعا دەيىن مەيلىنشە كەڭ بولعان. دەم الۋ بارىسى دا اۋقىمدى» دەپ سيپاتتاما بەرەدى. دەمەك, سەرىنىڭ اندەرى مەن شىعارمالارىن ورىنداۋدا ۇلكەن جاۋاپكەرشىلىك پەن بيىك دەڭگەي قاجەت. ال استانا تورىندە وتكەن قورىتىندى كونتسەرتتە «سارىارقا» حالىق مۋزىكا ءانسامبلى بۇل ۇدەدەن شىعا ءبىلدى.
كونتسەرتتىك باعدارلامانى تاماشالاۋعا جينالعان قاۋىمنىڭ اراسىندا قۋانىش سۇلتانوۆ, اباي تاسبولاتوۆ, كارىباي مۇسىرمان, ومارحان وكسىكباەۆ, شاۆقات وتەمىسوۆ جانە تۇرعىن سىزدىقوۆ سىندى ەل قالاۋلىلارى مەن سەرىك نەگيموۆ, نەسىپبەك ايت ۇلى سەكىلدى باسقا دا زيالى قاۋىم وكىلدەرى بولدى.
كەشتى كۇيشى, كومپوزيتور, ونەر زەرتتەۋشىسى قايىرجان ماقانوۆ جۇرگىزىپ وتىردى. ءار نومەردى حابارلاماس بۇرىن ونىڭ شىعۋ تاريحى مەن ورىنداۋشىسىن ەگجەي-تەگجەيلى تانىستىرىپ وتىرعان ول: «سەگىز سەرى مەن نياز سەرىنىڭ كىشى ءجۇز جەرىنە كەلگەن ۋاقىتى – شامامەن 1834 جىل. ولار ەدىل وزەنىنىڭ كەپتەر دەگەن سالاسىن مەكەندەگەن ىسىق رۋىنان قوساياق ۇلى قالدىباي باتىردىڭ اۋىلىنا تۇسەدى. قالدىبايدىڭ ون ۇلى, عايني ەسىمدى جالعىز قىزى بولادى. عايني سۇلۋ مەن سەگىز سەرىنىڭ عاشىقتىق حيكاياسى وسى تۇستان باستالعان», دەيدى.
سەگىز سەرىنىڭ ءانى «عاينيدى» حالىقارالىق «شابىت» فەستيۆالىنىڭ لاۋرەاتى جاقسىكەلدى ماياساروۆ ورىندادى. ال «ايكەن-اي» ءانىن رەسپۋبليكالىق بايقاۋلاردىڭ لاۋرەاتى جالعاس سۇلتان, «قارعام-اۋدى» حالىقارالىق «شابىت» فەستيۆالىنىڭ باس جۇلدەگەرى دانيار مۇقان ورىنداسا, «اقەركە» ءانىن جىرشىلار بايقاۋىنىڭ باس جۇلدەگەرى اينۇر قونىسباەۆا شىرقادى. «اقباقايدى» ناقىشىنا كەلتىرىپ جەتكىزگەن مادەنيەت سالاسىنىڭ ۇزدىگى نۇراي تاناباەۆا بولدى. وزگە دە ونەرپازدار سەرىنىڭ ءانىن سىزىلتا سالىپ, زالداعى جۇرتتىڭ ىستىق ىقىلاسىنا بولەنىپ جاتتى.
ساحناعا بيبىگۇل تولەگەنوۆا شىعىپ, ونەر كورسەتكەندە كەلگەن جۇرت ورىندارىنان تىك تۇرىپ قوشەمەت كورسەتتى. قازاقتىڭ بۇلبۇل كومەي, جەزتاڭداي ءانشى قىزىنىڭ بۇل كەلىسى كەشتىڭ شىرايىن كىرگىزىپ, سالماعىن ارتتىرا ءتۇستى.
جانبولات كەنجەعۇل,
«ەگەمەن قازاقستان»
