وبلىس نارىعىندا «لاۆرا» دەگەن اتپەن بەلگىلى ماي ساپاسىنىڭ جوعارىلىعىمەن دۇكەن سورەلەرىندە كوپ جاتپايدى. ەندى «پرومبازا–7» جاۋاپكەرشىلىگى شەكتەۋلى سەرىكتەستىگى «دامۋ» باعدارلاماسى بويىنشا 1 ميلليارد 700 مىڭ تەڭگە ينۆەستيتسيا سالىپ, تازارتىلعان ماي شىعارۋدى قولعا الدى. بۇل وبلىستاعى تازارتىلعان وسىمدىك مايىن وندىرەتىن العاشقى قۋاتتى ماي زاۋىتى بولىپ تابىلادى.
«جاڭا ماي زاۋىتىنىڭ ينفراقۇرىلىسى وبلىس بيۋدجەتى ەسەبىنەن مۇمكىن بولدى. كەلىپ تۇرعان گاز قۇبىرىنا جالعانىسىمەن زاۋىت تولىق جۇمىس ىستەي باستايدى. گازبەن قاتار وندىرىسكە سۋ دا كەرەك, ول دا وبلىس باسشىلىعىنىڭ كومەگىمەن شەشىمىن تاباتىنىنا سەنىمدىمىز» دەيدى «پرومبازا – 7» جاۋاپكەرشىلىگى شەكتەۋلى سەرىكتەستىگىنىڭ ديرەكتورى مۇحامەدجان اقۇلوۆ.
زاۋىتتا ماي ەكى جەلى ارقىلى وندىرىلەدى. بۇرىننان جۇمىس ىستەپ تۇرعان جەلىدە ءونىم سالقىن سىعىلادى, ياعني تۇتىنۋشىعا تانىس «لاۆرا» مايى وندىرىلەدى.ال ەكىنشى جاڭادان ورناتىلعان جەلىدە سىعىلعان ماي ودان ءارى تازارتىلادى. مۇحامەدجان اقۇلوۆتىڭ ايتۋىنشا, تازارتىلعان ماي تەك ەكسپورتقا ارتۋعا باعىتتالعان. كاسىپكەر ءونىمدى وتكىزۋدەن ەشقانداي قيىندىق بولمايتىنىن دا ايتتى. تازارتىلعان وسىمدىك مايىنا قىتايدا دا, رەسەيدە دە, وزگە ەلدەردە دە سۇرانىس جوعارى. زاۋىت شيكىزاتتى وبلىس وڭىرىندەگى, كورشى رەسەيدىڭ ىرگەلەس شارۋاشىلىقتارىنان ساتىپ الادى. كۇنباعىس كۇنجاراسىنان مال جەمى دايىندالادى.
جاڭا ماي زاۋىتىن وبلىس اكىمى ارحيمەد مۇحامبەتوۆ ارالاپ, ينۆەستيتسيالىق جوبانىڭ ىسكە قوسىلۋعا دايىن ەكەنىن كوردى. جاڭا زاۋىت قۋاتىندا جۇمىس ىستەگەندە, مۇندا 30 جۇمىسشى ەڭبەك ەتەتىن بولادى.
ءنازيرا جارىمبەت,
«ەگەمەن قازاقستان»
قوستاناي
