Astana hub-تىڭ قىزمەتى قانداي؟

جاقىندا ەلباسىنىڭ قاتىسۋىمەن رەسمي اشىلۋى بولعان Astana hub حالىقارالىق IT ستارتاپتار تەحنوپاركى كۇنى كەشە ەلىمىزگە الەمنىڭ ءار تاراپىنان تۋريستەر مەن كورەرمەندەر جيناپ, ەلوردا اتىن شارىقتاتقان ەكسپو اۋماعىندا ورنالاسقان.

نەگىزى جۇمىسىن ءبىر جىل بۇرىن باستاعان تەحنوپارك بۇگىندە 150-گە جۋىق ستارتاپتىڭ ورداسىنا اينالدى. ءتورت قاباتتى عيماراتتا ەلىمىزدىڭ ەرەك ويلى تارلاندارى جينالىپ, كاسىپكەرلىككە العاشقى قادامدارىن جاساۋدا.

«زەردە» ۇلتتىق ينفوكوممۋنيكاتسيا حولدينگى» اكتسيونەرلىك قوعامى قارجىلاندىراتىن Astana hub IT ستارتاپتار تەحنوپاركىن كاسىپكەرلىك مەكتەبى دەسەك تە بولادى. ويتكەنى ورتالىق جاس كاسىپكەرلەردى 6 نەمەسە 12 اي كولەمىندە شارت بويىنشا, اقىسىز جۇمىس الاڭىمەن, شەبەرحانا, جەتەكشىلەر مەن بىلىكتىلىكتى ارتتىرۋ كۋرستارىمەن قامتاماسىز ەتەدى. بۇل جەردە تەك جۇمىس ىستەپ قويماي, زامانداستارىمەن, ارىپتەستەرىمەن پىكىر الماسىپ, جوبا تۋرالى ويلارىن بىلۋگە مۇمكىندىك بار. ءتىپتى, ەكى توپ بىرىگىپ, بىرنەشە جوبانى ءبىر ارناعا توعىستىرعان جاعدايلار دا بولعان. قازىرگى تاڭدا 25 ستارتاپ نارىققا شىعىپ, كاسىپكە اينالىپ ۇلگەرگەن.

سونىمەن قاتار IT سالاسىن دامىتۋعا باعىتتالعان ستارتاپ پايدا اكەلەتىن كاسىپكە اينالا باستاعاندا  مەملەكەت تاراپىنان بىرقاتار كومەك كورسەتىلىپ, سالىقتان بوساتىلۋىن قامتاماسىز ەتەدى. «بۇل كومپانيالارعا جۇمىس ىستەۋگە جىگەر بەرىپ, سالانى دامىتۋعا ۇلكەن ۇلەس قوسادى», دەيدى «زەردە» اق باسقارما توراعاسىنىڭ ورىنباسارى پاۆەل كوكتىشەۆ.

«قازىر ستارتاپتىڭ hard ware جانە soft ware دەپ اتالاتىن ەكى ءتۇرى بار. Hard ware ستارتاپتارعا روبوت, ۆيرتۋالدى كوزىلدىرىكتەر جاتادى. Soft ware ستارتاپتار – قالتا تەلەفونىنا, قىزمەت كورسەتۋگە ارنالعان باعدارلامالار. بىزدە ستارتاپتىڭ ەكى تۇرىنە دە جاعدايلار جاسالعان. 3D پرينتەرمەن, زاماناۋي قۇرىلعىلارمەن جابدىقتالعان شەبەرحانالارىمىز بار», دەيدى Astana hub-تىڭ قوعاممەن بايلانىس ءبولىمىنىڭ جەتەكشىسى ايگۇل شەرنيازوۆا.

كاسىپكەرلەر كۇندەلىكتى مونيتورينگتەن ءوتىپ, جارتى جىل ىشىندە ناقتى ناتيجەلەر كورسەتۋى كەرەك. ولاردىڭ وسى سالاداعى شەتەلدەن ارنايى شاقىرتىلاتىن  تاجىريبەلى ماماندارمەن جۇمىس ىستەۋگە مۇمكىندىكتەرى بار. ءار ەكى اپتا سايىن ماسكەۋلىك ساراپشىلار سۇراقتارىڭىزعا جاۋاپ بەرىپ, جوباڭىزعا تۇزەتۋلەر ەنگىزەدى. بۇدان بولەك ءتۇرلى شەبەرلىك ساعاتتارى, قوسىمشا بىلىكتىلىكتى ارتتىرۋ كۋرستارى وتكىزىلىپ تۇرادى.

Astana hub-تىڭ كاسىپكەرلەردى وقىتۋ جۇيەسىنىڭ ەكى ءتۇرى بار. ءبىرىنشىسى – ينكۋباتسيا. بيزنەس-ينكۋباتور 6 اي وقۋ-دايارلاۋ باعدارلاماسى مەن وتاندىق ساراپشىلاردىڭ كومەگىنەن تۇرادى. ەكىنشىسى – اكسەلەراتسيا. بۇل كەزەڭدە كاسىپكەرلەر 3 ايلىق وقۋ باعدارلاماسىنان ءوتىپ, ستارتاپ-جوبالارىن دامىتۋ كەزەڭىنەن وتەدى. ولارعا ارنايى كەڭەسشىلەر تاعايىندالادى. كەڭەسشىلەر جوبالاردى دامىتۋعا, قاتەلىكتەردى تۇزەتىپ, جوبانىڭ جاڭا كەزەڭگە وتۋىنە كومەكتەسەدى. ءدال وسى كەزەڭدە ينۆەستيتسيا تارتۋ دا كوزدەلگەن.

«العاشقى باعدارلاما اياسىندا 14 جوبا قولعا الىنىپ, 10 تۇلەگىمىز جاقسى ناتيجە كورسەتتى. سونىڭ ارقاسىندا 28 ميلليون ينۆەستيتسيا تارتىلدى. جاقىندا عانا «Clockster» جوباسى سينگاپۋرلىق ينۆەستورلاردىڭ نازارىنا ىلىگىپ, 250 000 اقش دوللارى كولەمىندە ينۆەستيتسيا تارتتى. ينۆەستيتسيا كولىمىن 2 ميلليون اقش دوللارىنا دەيىن ۇلعايتۋدى جوسپارلاپ وتىرمىز», دەيدى پاۆەل كوكتىشەۆ.

«قازىرگى تاڭدا تەحنوپارك ستارتاپتارىنىڭ 30 پايىزى شەتەلدىك كاسىپكەرلەرگە تيەسىلى. بۇل وتاندىق ەكونوميكاعا وتە ءتيىمدى. ويتكەنى ولاردىڭ جوبالارى مەملەكەتكە سالىق تولەپ, ەلىمىزدە جۇمىس ورىنىن كوبەيۋىنە ۇلەس قوسادى. ودان بولەك الەمدەگى ۇلكەن Nokia, Huawei سىندى ۇلكەن كورپوراتسيالار وكىلدىكتەرىن اشىپ, جاس كاسىپكەرلەرگە باعىت-باعدار بەرىپ وتىرادى. جىل سوڭىنا دەيىن 35 توپ وقۋىن اياقتاۋى كەرەك. بىلاي ايتقاندا, Astana hub كاسىپكەرلەر مەن مەملەكەت اراسىنداعى مودەراتور. تەحنوپارك جۇمىس الاڭىمەن قامتاماسىز ەتىپ, ۇلەستىرۋشى قىزمەتىن اتقارادى», دەيدى Astana hub حالىقارالىق IT ستارتاپتار تەحنوپاركى ديرەكتورى ادىلەت نۇرعوجين.

Astana hub تالىمگەرلەرىنىڭ ءبىرى – جەڭىس ىزماعانبەت. ول دوسى داۋلەت ايتماحانوۆپەن بىرگە ء«يىس سۋ» جوباسىن باستاعان. الەمدىك برەندتەردىڭ ءيىس سۋلارىن جاڭا فورماتتا ۇسىنىپ جۇرگەن جاستار جوبانى تەك ەكەۋى جۇرگىزەدى. اتىرلەردى ىڭعايلى قۇتىدا, ءتيىمدى كولەمدە, قولجەتىمدى باعامەن جەتكىزىپ بەرۋگە باعىتتالعان ستارتاپتىڭ جۇمىسىن باستاعانىنا ءۇش اي بولىپتى. بۇل وي داۋلەتكە مەكتەپ كەزىندە-اق كەلگەن. بۇگىندە تەحنوپارك عيماراتىندا جۇمىس ىستەيتىن جاس ستارتاپتى Astana hub جاقىندا شيكىزات ساقتايتىن, اتىرلەردى قۇيۋعا قولايلى جاڭا ورىنمەن قامتاماسىز ەتپەك. شيكىزات ساتىپ الۋ, ولاردى قۇيۋ, جارناما, ەسەپ, لوگيستيكا ماسەلەلەرىن تۇگەلدەي ەكەۋى دوڭگەلەتىپ وتىرعان ولار Astana hub-تىڭ كاسىپتەرىنە كوپ پايداسى بولعانىن ايتادى.

بۇدان بولەك Astana hub قاراماعىندا «Antidolg.kz», «Kompra», «Tourcenter», «HomeFix», «Workis» «Mediascanner», «Eventum.one» ستارتاپتارى جۇمىس ىستەۋدە.

سونىمەن, Astana hub ەلىمىزدەگى يننوۆاتسيا مەن IT سالاسىن دامىتۋعا باعىتتالعان كاسىپكەرلەر مەكتەبى دەي الامىز. تەحنوپارك – كوممەرتسيالىق جوبا ەمەس, مەملەكەت پەن كاسىپكەرلەر اراسىنداعى مودەراتور, ۇيلەستىرۋشى. Astana hub باسشىلىعىنىڭ ايتۋىنشا, الداعى 5 جىلعا ناقتى جوسپارى قۇرىلعان ستارتاپتار مەكەنى ەلىمىزدەگى ءار سالانىڭ IT جۇيەسىن دامىتاتىن, حالىق ءومىرىن جاقسارتۋعا باعىتتالعان جوبالاردىڭ ورداسىنا اينالماق.

سۆەتلانا عالىمجانقىزى,

«ەگەمەن قازاقستان»