سوڭعى مۇمكىندىك – ماسكەۋدە
ناۋرىز مەرەكەسىنەن كەيىن استانا مەن ميلان قالالارىندا جانكۇيەرلەردىڭ تاعاتسىزدانا كۇتكەن بۇكىلالەمدىك بوكس سەرياسى جارتىلاي فينالىنىڭ العاشقى كەزدەسۋلەرى ءوتتى.
«استانا ارلاندارى» ءوز الاڭىندا ماسكەۋدىڭ «دينامو» كومانداسىمەن كەزدەسسە, «ميلان نايزاعايلارى» ازەربايجاننىڭ «باكۋ وتتارى» كلۋبىن قابىلدادى.
ناۋرىز مەرەكەسىنەن كەيىن استانا مەن ميلان قالالارىندا جانكۇيەرلەردىڭ تاعاتسىزدانا كۇتكەن بۇكىلالەمدىك بوكس سەرياسى جارتىلاي فينالىنىڭ العاشقى كەزدەسۋلەرى ءوتتى.
«استانا ارلاندارى» ءوز الاڭىندا ماسكەۋدىڭ «دينامو» كومانداسىمەن كەزدەسسە, «ميلان نايزاعايلارى» ازەربايجاننىڭ «باكۋ وتتارى» كلۋبىن قابىلدادى.
وسى كەزدەسۋدىڭ ەكەۋى دە ەكى كۇندە ءوتتى. العاشقىسى 23 ناۋرىز كۇنى, ەكىنشىسى كەلەسى كۇنى بولدى. سونىڭ ىشىندە 23-ءى كۇنى «استانا ارلاندارىنىڭ» رەسەيلىك كوماندامەن بولعان كەزدەسۋى اسا قىزىقتى جانە تارتىستى ءوتىپ, جەرلەستەرىمىز 3:2 ەسەبىمەن جەڭىسكە جەتتى. بۇل ايقاستا ءبىزدىڭ كوماندانىڭ ساپىندا ءمىرجان راقىمجانوۆ (54 كگ.), مەرەي اقشالوۆ (61 كگ.), ميراس بايىرحانوۆ (73 كگ.), رامزجون احمەدوۆ (85 كگ.) پەن اسا اۋىر سالماقتاعى رۋسلان مىرساتاەۆ رەسەيلىكتەردىڭ قۇرامىنداعى ۆلاديمير نيكيتين, ۆازگەن سافاريانتس, ۆيتالي باندارەنكا, دانيل شۆەد پەن سەرگەي كالچۋگينمەن قولعاپ ءتۇيىستىردى. وسى ايقاستا «ارلانداردىڭ» ساپىنداعى اقشالوۆ, بايىرحانوۆ پەن احمەدوۆ جەڭىسكە جەتسە, قالعان ەكەۋى جەڭىلۋگە ءماجبۇر بولدى. مىرساتاەۆ ءۇمىتىمىزدى اقتامادى. وسى ايقاستاردا ءمىرجاننىڭ قارسىلاسىنان تازا جەڭىلگەنىن مويىنداۋ كەرەك. نيكيتين ايلا-ءتاسىلى, قۋلىق-سۇمدىعى باسىم بوكسشى ەكەن. سوققىلارى دا دىتتەگەن جەرىنە ءدال ءتيىپ جاتادى. ءوزى مىعىم, سابىرلى, ايلاكەر بوكسشى ەكەنى كورىنىپ تۇر. ول بەس راۋندتىڭ بارىندە راقىمجانوۆتى شىداتپادى. ال مىرساتاەۆ بولسا, ءۇشىنشى راۋندتان كەيىن سىر بەرىپ, قالعان ۋاقىتقا شىداي الماي قالدى. ونىڭ تاعى ءبىر قاتەلىگى, ويلاماعان جەردەن قارسىلاسىن باسپەن ۇرىپ, تورەشىلەردەن ەسكەرتۋ العانى بولدى. وسى باسپەن ۇرۋ وعان تىپتەن كەرەك ەمەس ەدى. قىسقاسى, بوكس كەشىندە ءبىز جەڭىسكە جەتسەك تە, كوڭىلىمىز ءالى ماسكەۋدە وتەتىن ايقاس ءۇشىن الاڭداۋلى ەكەنىن جاسىرا المايمىز. 30 ناۋرىز كۇنى ماسكەۋدە وتەتىن ەكىنشى جارتىلاي فينالدىق سىندا «ارلاندارعا» 4:1 ەسەبىمەن جەڭىسكە جەتۋ كەرەك. ەگەر ەسەپ 3:2 بولىپ ماسكەۋلىكتەردىڭ پايداسىنا شەشىلسە, وندا قوسىمشا جەكپە-جەك وتەتىن بولادى. بۇل كەزدەسۋگە ءبىزدىڭ تاراپىمىزدان قانات يسلام باستاعان بوكسشىلار قاتىسادى. ولارعا ءبىز اق جول عانا تىلەي الامىز. ال كەشەگى «داۋلەت» سپورت كەشەنىندە وتكەن بوكس كەشىندە جەڭىسكە جەتكەن اقشالوۆ, بايىرحانوۆ پەن احمەدوۆكە ءبىزدىڭ العىسىمىز شەكسىز.
