مىنە, سونداي يگىلىكتى جوبالاردىڭ ءبىرى رەتىندە شىمكەنت قالاسىندا مۇقتاج جاندار ءۇشىن «IZGILIK» اتالاتىن تەگىن دۇكەن اشىلدى. اتالعان دۇكەن كۇنكورىس دەڭگەيى تومەن وتباسىلار مەن جەتىم-جەسىرلەردى ازىق-ت ۇلىك, كيىم-كەشەكپەن قامتاماسىز ەتۋدى ماقسات ەتكەن. مۇندا تەك ماتەريالدىق كومەك كورسەتىلىپ قانا قويماي, جۇمىسسىز ازاماتتاردى قابىلەتىنە قاراي جۇمىسقا ۇيرەتەدى. وسىلايشا, ولاردىڭ قوعامدا ءوز ورنىن تابۋىنا سەپتىگىن تيگىزەدى.
«ىزگىلىكتە جارىسايىق» قايىرىمدىلىق قوعامدىق قورىنىڭ ۇيىمداستىرۋىمەن جۇمىس باستاعان بۇل الەۋمەتتىك ۇيدەن مۇقتاج جاندار اپتانىڭ 6 كۇنىندە قاجەتتى زاتتارىن تەگىن الۋىنا مۇمكىندىك بار. بۇل ءۇشىن وزىمەن بىرگە جەكە كۋالىگىن, الەۋمەتتىك از قامتىلاتىن توپتىڭ وكىلى ەكەندىگىن انىقتايتىن قۇجاتىن الىپ كەلسە جەتكىلىكتى.
دۇكەننىڭ ىشكى ەرەجەسى بويىنشا مۇقتاج جان ايىنا تەك ءبىر عانا كيىمگە يە بولماق. ازىق-ت ۇلىكتى دە وتباسىنداعى ادام سانىنا قاراي شامالاپ الىپ كەتە الادى. ال دۇكەن سورەلەرىندەگى زاتتار قايىرىمدى قالا تۇرعىندارىنىڭ كۇندەلىكتى وسى الەۋمەتتىك ۇيگە الىپ كەلگەن تارتۋلارى. اينالاسىنا قارايلاسقاندى ازاماتتىق پارىز سانايتىن جاندار شىمشاھارداعى ەلشىبەك باتىر كوشەسىندە ورنالاسقان №88 ۇيگە اتباسىن بۇرىپ, قاجەتتى تۇرمىستىق زاتتاردى وتكىزۋىنە بولادى.
– تەك كيىم-كەشەك تاراتىپ قانا قويماي, قىستىڭ كوزى قىراۋدا جاۋراماس ءۇشىن وتىنى جوق وتباسىلارعا كومىر ءتۇسىرىپ بەرۋدى جوسپارلاپ وتىرمىز. ارينە, بۇل ۋاقىتشا كومەك. دەگەنمەن, وسىنداي ساۋاپتى ىستەردى كوپتەپ ۇيىمداستىرۋ ارقىلى قوعام نازارىن الەۋمەتتىك جاعدايى تومەن وتباسىلارعا, مۇگەدەك جاندارعا اۋدارماقپىز. ءتىپتى, ەڭبەككە قابىلەتتىلىگى جوق اعايىندى قايىرىمدىلىق قور ارقىلى باسپانامەن قامتاماسىز ەتۋدى قولعا الدىق. وسى جىلى كاسىپكەرلەردىڭ قارجىلاي قولداۋىمەن 2 ءۇي ساتىپ الدىق. الداعى ۋاقىتتا ءۇيسىز-كۇيسىز جۇرگەن وتباسىلارعا تابىستايتىن بولامىز», دەيدى «ىزگىلىكتە جارىسايىق» قوعامدىق قورىنىڭ باسشىسى اسقار ماۋلەنوۆ.
دۇكەن اشىلعان 10 كۇن ىشىندە 250 وتباسىعا كيىم-كەشەك, 50-دەن استام وتباسىعا الەۋمەتتىك, تۇرمىستىق زاتتار ۇلەستىرىلگەن. الداعى ۋاقىتتا دۇكەن جەلىلەرىن اۋدانداردان اشىپ, اۋىلداعى الەۋمەتتىك جاعدايى تومەن وتباسىلارعا كومەك قولىن سوزۋدى جوسپارلاپ وتىر ەكەن.
كەيدە كۇندەلىكتى قوقىس جاشىگىنىڭ قاسىندا ءۇيىلىپ جاتقان جاماۋ-جاسقاۋسىز كيىم-كەشەك پەن قالتا تولى اق نان قالدىقتارىن كورگەندە قايىرىمدىلىققا مويىنى بۇرىلماي جۇرگەن ادامداردىڭ قىلىعىنا ءىشىڭ اشيدى. «وزىنەن ارتىلعاندى دالاعا تاستاعانشا نەگە مۇقتاج جاندارعا ۇلەستىرمەدى ەكەن؟» دەگەن سۇراق تۋادى... مۇمكىن بۇل جاندار «كەرەكسىز» زاتتارىن كىمگە بەرەرىن بىلمەي جۇرگەن شىعار. ەندەشە, سونداي جاندارعا «IZGILIK» دۇكەنىنىڭ مەكەن-جايىن كورسەتىپ جىبەرسەڭىز, سول دا قايىرىمدىلىققا بارابار ءىس بولماق.
نۇرشات توكەن,
«ەگەمەن قازاقستان»
شىمكەنت
