سالاماتتى ۇرپاق كوبەيتىپ, حالىق سانىن ارتتىرۋ بۇگىننىڭ باستى تاقىرىبى بولىپ وتىر. بۇل تۋرالى ەلباسى ءوز جولداۋىندا دا ايتىپ وتكەن بولاتىن. سول تاپسىرما نەگىزىندە سوڭعى جىلدارى كوپتەگەن پەرزەنتحانا سالىنىپ, ايەلدەر مەن بالالار كونسۋلتاتسيالارى سياقتى ءتۇرلى جوبا ۇيىمداستىرىلىپ جاتىر. تاياۋدا استانا قالاسىنىڭ قوعامدىق دەنساۋلىق ساقتاۋ باسقارماسى جانە №3 پەريناتالدى ورتالىعى انا مەن بالا ءومىرىن جاقسارتۋعا ارنالعان شەبەرلىك ساباعىن وتكىزدى. شەبەرلىك ساباعى ايەلدەردىڭ جۇكتىلىك كەزىندەگى ىشكى پسيحولوگيالىق جاي-كۇيىن رەتتەۋ مەن بالاعا دۇرىس كۇتىم جاساۋ تاقىرىبىنا ارنالدى. شارا بارىسىندا №3 پەريناتالدى ورتالىقتىڭ دارىگەرلەرى قاتىسۋشىلارعا بوسانۋ كەزىندە دۇرىس تىنىس الۋدى, ارت-تەراپيانى قولدانۋ ارقىلى بالا تۋ پروتسەسىن جەڭىلدەتۋدى ۇيرەتتى. سونداي-اق بولاشاق انالار ءۇشىن ارنايى ماسساج بەن بي تۇرلەرى كورسەتىلدى.
دارىگەرلەردىڭ ايتۋىنشا, انا مەن بالا ءولىمىنىڭ كوبەيۋى ايەلدەردىڭ جۇكتىلىك كەزىندەگى دۇرىس كۇتىمنىڭ بولماۋىنان ورىن الادى. دارىگەر ۋاقتىلى تەكسەرۋدەن ءوتىپ تۇرۋدى قانشا مىندەتتەسە دە, جۇكتى ايەلدەردىڭ ءبىرازى بۇعان كوڭىل بولە بەرمەيدى. جۇكتى ايەلدەرگە قاتىستى ءتۇرلى وقيعالاردىڭ نەگىزگى سەبەبى دە وسى. بيىل استانا قالاسى بويىنشا 6 جۇكتى ايەلدىڭ ءولىمى تىركەلدى. بۇل وقيعاعا بايلانىستى دەنساۋلىق ساقتاۋ مينيسترلىگى شۇعىل شارالاردى قولعا الىپ, انا مەن بالا ماسەلەسىنە ايرىقشا نازار اۋدارىپ وتىر.
№3 پەريناتالدى ورتالىقتىڭ باس دارىگەرى ز.حاميدۋللينانىڭ ايتۋىنشا, انا مەن بالا دەنساۋلىعىن جاقسارتۋدا بىلىكتى ماماندار تارتىلىپ, جاڭا مۇمكىندىكتەر قولعا الىنۋدا. بۇرىنعى كەزدەرى بوسانۋ بارىسى جابىق تۇردە وتكەن بولسا, قازىرگى كۇنى سەرىكتەستىك بوسانۋ ءادىسى بار. دارىگەرلەر ايەلدەرگە مەديتسينالىق كومەكپەن قوسا, ولاردىڭ پسيحولوگيالىق, ەموتسيونالدىق جاعدايىن رەتتەۋگە كومەكتەسەدى. ولاردىڭ ايتۋىنشا, انانىڭ جاقسى كوڭىل كۇيى ىشتەگى ءسابيدىڭ تولىق جەتىلۋىنە ۇلكەن ۇلەس قوسادى.
ەلىمىزدىڭ ستراتەگيالىق قۇجاتتارىندا كورسەتىلگەندەي, 2020 جىلعا قاراي انا مەن بالا ءولىمى كورسەتكىشىن 2 ەسەگە ازايتىپ, قازاقستاندىقتاردىڭ ورتاشا ءومىر ءسۇرۋ ۇزاقتىعىن 72 جاسقا دەيىن ارتتىرۋ كوزدەلگەن. قازىر قازاقستاندا ءار 85 سەكۋند سايىن 1 نارەستە دۇنيەگە كەلەدى. ال جىل باسىنان بەرى 341 750 ءسابي دۇنيەگە كەلگەن. سوڭعى 10 جىلدا بالا تۋ كورسەتكىشى 25%-عا ارتىپ, سالماعى 1500 گرامعا دەيىن بولاتىن بالالاردى امان ساقتاپ قالۋ كورسەتكىشى جاقسارعان.
مارجان تىلەۋبەك,
«ەگەمەن قازاقستان»
