سەسسيادا سەكرەتاريات مەڭگەرۋشىسى – قازاقستان حالقى وبلىستىق اسسامبلەياسى توراعاسىنىڭ ورىنباسارى بيبىگۇل اققوجينا جىل بويى اتقارىلعان جۇمىستارعا شولۋ جاسادى. ول الدىمەن ەلباسى نۇرسۇلتان نازارباەۆتىڭ جاقىندا عانا جاريالاعان « ۇلى دالانىڭ جەتى قىرى» ماقالاسىنا توقتالىپ ءوتتى.
« ۇلى دالانىڭ جەتى قىرى» اتتى ماقالاسىندا نۇرسۇلتان نازارباەۆ ءار قازاقستاندىق ءۇشىن باعدار, تەمىرقازىق ەتىپ ۇستانار تۇلعالاردى اتاپ ايتتى. ول – التىن ادام,جىبەك جولى, كۇلتەگىن, ەر جۇرەك بەيبارىس, دانا تاۋكە حان, ۇلى اباي. جۇپار ءيىستى الما مەن قىردى جاپقان قىزعالدىقتىڭ ومىرمەن توننىڭ ىشكى باۋىنداي ۇيلەسۋى ۇلى دالا حالقى ءوي-ءورىسىنىڭ ىرگەتاسىن قالادى» دەدى بيبىگۇل بۇركىتقىزى. قازاقستان حالقى وبلىستىق اسسامبلەياسى وڭىردەگى ىنتىماقتىڭ, بىرلىكتىڭ وتاۋى سەكىلدى. ول جىل تاۋلىگىندە 142 ءىرى شارالار وتكىزدى. ونىڭ ىشىندە وسى وڭىردە تۇرىپ جاتقان ءتۇرلى ۇلىستاردىڭ ۇلتتىق داستۇرلەرى مەن حالىقتىق مەرەكەلەرىنە ارنالعان شارالار بارلىق قوستانايلىقتاردى ءۇيىرىپ, ىنتىماقتى ارتتىرا ءتۇستى.
وبلىستىق اسسامبلەيانىڭ عىلىمي زيالى قاۋىم وكىلدەرىنەن تۇراتىن عىلىمي-ساراپتاما توبىنىڭ وكىلدەرى ءوڭىر تۇرعىندارىمەن ءجيى كەزدەسۋلەر جاساپ, ەلباسىنىڭ سىندارلى ساياساتىن, باعدارلامالارىن تۇسىندىرەدى. حالقىمىزدىڭ جانە ءوڭىردى مەكەن ەتكەن ۇلىستار ءداستۇر-سالتتارىن, سالاۋاتتى ءومىر سالتىن ناسيحاتتايتىن ءتۇرلى فەستيۆالدەر ءوتتى. انالار كەڭەسى وبلىس وڭىرىندە وتباسىلىق قۇندىلىقتاردى ساقتاۋ باعىتىندا كوپتەگەن يگى شارالار وتكىزىپ وتىرادى.
قوستاناي وبلىسىندا 250 قوعامدىق كەلىسىم كەڭەسى جۇمىس ىستەيدى. بيىل عانا 2001 شارا وتكىزدى. كەڭەس ءتورايىمى الەكساندرا سۋسلوۆا بۇل قوعامدىق ۇيىم الەۋمەتتىك باعدارلامالاردى, ولاردى جۇزەگە اسىرۋدا قوعامدىق بەلسەندىلىك پەن باستامالاردى بارىنشا قولداپ وتىراتىنىن تىلگە تيەك ەتتى. قوعامدىق كەلىسىم كەڭەسىنىڭ مۇشەلەرى قوعامداعى ماسەلەنىڭ ەشقايسىسىنا ۇساق-تۇيەك دەپ قارامايدى.
وبلىس اكىمى ارحيمەد مۇحامبەتوۆ سەسسيانى قورىتىندىلاپ, قازقستان حالقى وبلىستىق اسسامبلەياسىنىڭ بارلىق جۇمىسى قوعامداعى ىنتىماققا جانە ەلباسى باستامالارى مەن باعدارلامالارىنىڭ ءتيىمدى جۇزەگە اسۋىنا قىزمەت ەتەتىنىن ايتتى.
ءنازيرا جارىمبەت,
«ەگەمەن قازاقستان»
قوستاناي
