كۇن تارتىبىندە - ەۋروپالىق وداقتىڭ ورتالىق ازيا بويىنشا جاڭا ستراتەگياسىنىڭ جوباسى. قازاقستان ءسىم باسشىسى قايرات ءابدىراحمانوۆتىڭ پىكىرىنشە, بۇگىندە ورتالىق ازيا ماڭىزدى ستراتەگيالىق وڭىردە ورنالاسقان, ەلەۋلى ادامي جانە ۇلكەن جيىنتىق ەكونوميكالىق الەۋەتكە يە, تابيعي جانە وندىرىستىك رەسۋرستارعا باي, الەمنىڭ قارقىندى دامىپ كەلە جاتقان ايماقتارىنىڭ ءبىرى بولىپ تابىلادى.
قازاقستان ەۋروپالىق وداقپەن وڭىرارالىق ىنتىماقتاستىققا ەرەكشە ءمان بەرەدى جانە ونى ءوڭىردىڭ تۇراقتى دامۋىن قامتاماسىز ەتۋ قۇرالدارىنىڭ ءبىرى رەتىندە قاراستىرادى. وسى رەتتە جاڭا ستراتەگيانى قالىپتاستىرۋ جيناقتالعان تاجىريبەنى ەسكەرە وتىرىپ,قۇجاتتىڭ ناقتى ناتيجەلەرىن ارتتىرۋعا مۇمكىندىك بەرەتىن ەرەكشە ءسات بولىپ تابىلادى, دەلىنگەن قازاقستان سىرتقى ساياسي ۆەدومستۆو باسشىسىنىڭ بايانداماسىندا.
ءوز ۇسىنىستارىندا, قازاقستاندىق تاراپ ءبىلىم بەرۋ ارقىلى ادامي كاپيتالدى دامىتۋعا, زاڭ ۇستەمدىگىن جانە جوعارى ساپالى مەملەكەتتىك باسقارۋدى ىلگەرىلەتۋگە, جەكە كاسىپكەرلىكتى, شاعىن جانە ورتا بيزنەستى, ونىڭ ىشىندە ايەلدەر كاسىپكەرلىگىن دامىتۋعا ەرەكشە نازار اۋدارعان.
قازاقستاندىق دەلەگاتسيانىڭ پىكىرىنشە, ورتالىق ازيانىڭ جاھاندىق ەكونوميكالىق پروتسەستەرگە قوسىلۋى, جاڭا تەحنولوگيالىق ءومىر سالتىن جانە تسيفروۆيزاتسيا ەلەمەنتتەرىن ەنگىزۋ, كولىكتىك-لوگيستيكالىق ينفراقۇرىلىمداردى جاقىنداستىرۋ, ەنەرگيا تيىمدىلىگىن ارتتىرۋ جانە «جاسىل» تەحنولوگيالاردى ەنگىزۋ بويىنشا ەكى ءوڭىردىڭ تىعىز ارىپتەستىگىن تالاپ ەتەدى. قورشاعان ورتانى قورعاۋ جانە سۋ رەسۋرستارىن ءتيىمدى پايدالانۋ, سونداي-اق اۋعانستاندى قالپىنا كەلتىرۋگە جانە تۇراقتاندىرۋعا بىرلەسكەن كومەك كورسەتۋ ماسەلەسى دە اسا ماڭىزدى. قازاقستاندىق تاراپ وسى جانە باسقا دا شارالاردىڭ قۇجاتتا ەسكەرىلۋى قاجەت دەپ ەسەپتەيدى.
سونداي-اق, ق. ءابدىراحمانوۆ قاتىسۋشىلاردى پرەزيدەنت ن. نازارباەۆتىڭ « ۇلى دالانىڭ جەتى قىرى» ماقالاسىنىڭ نەگىزگى تۇستارىمەن تانىستىرىپ, قازاقستاندا كوپعاسىرلىق تاريحي مۇرانى جانداندىرۋعا جانە ارحيۆتىك, ارحەولوگيالىق جانە وزگە دە مالىمەتتەردى تسيفرلىق وركەنيەت جاعدايىندا ازاماتتاردىڭ ءتۇسىنۋى مەن قولدانۋىنا قولايلى ەتۋگە باعىتتالعان ءىرى جوبالار ىسكە قوسىلاتىنىن حابارلادى.
وسى جوبالاردىڭ شەڭبەرىندەگى بىرلەسكەن جۇمىس وا مەن ەو-نىڭ اراسىنداعى وڭىرارالىق ارىپتەستىكتىڭ مادەني-گۋمانيتارلىق باعىتىن بايىتاتىنى اتاپ ءوتىلدى.
سونداي-اق, ەو-ورتالىق ازيا فورماتىنىڭ ەۋرازيالىق كەڭىستىكتەگى ءىرى ەكونوميكالىق جوبالارمەن, اتاپ ايتقاندا, ەۋرازيالىق ەكونوميكالىق وداقپەن جانە «بەلدەۋ جانە جول» باستاماسىمەن سەرىكتەستىگى ورتالىق ازيانى جاھاندىق ەكونوميكالىق قاتىناستاردىڭ ماڭىزدى قاتىسۋشىسىنا اينالدىرادى. مينيستر,قاجەت بولعان جاعدايدا, استانا ەو – ەاەو – قحروزارا ءىس-قيمىل تۋرالى ديالوگىن باستاۋ الاڭىن قامتاماسىز ەتۋگە ءازىر ەكەندىگىن حابارلادى.
قۇجاتتىڭ كەلەشەكتەگى ىسكە اسىرىلۋىنا توقتالا وتىرىپ, ق.ءابدىراحمانوۆ ءۇش نەگىزگى ەلەمەنتتى: ەو-وا فورماتىنداعى ىنتىماقتاستىقتىڭ تۇتاستىعىن قامتاماسىز ەتۋ, ستراتەگيانى پراكتيكالىق ىسكە اسىرۋ ءۇشىن نەعۇرلىم يكەمدى قۇرالداردى قالىپتاستىرۋ, سونداي-اق ونىڭ كورنەكى قابىلداۋىن كۇشەيتۋ قاجەتتىگىنە نازار اۋداردى.
ماسەلەن, سوڭعىسىن جۇزەگە اسىرۋ ءۇشىن, قازاقستان ارىپتەستىكتى «ۆيرتۋالدى ينستيتۋتسيوناليزاتسيالاۋدى» قامتاماسىز ەتەتىن جانە ورتالىق ازيانىڭ 70 ملن. حالقىنا ەۋروپاعا بىرەگەي ونلاين-تەرەزە بولاتىن ءبىرتۇتاس ونلاين-پورتال قۇرۋدى ۇسىندى.
پلەنارلىق سەسسيانىڭ قورىتىندىسى بويىنشا, تاراپتار «ەكى ءوڭىر اراسىنداعى ءوزارا ءتيىمدى, ناقتى جانە ۇزاق مەرزىمدى پايداعا نەگىزدەلگەن قارىم-قاتىناستى دامىتۋ ءۇشىن» جاڭا ستراتەگيانى 2019 جىلدىڭ باسىندا قابىلداۋ قاجەتتىگىن ەرەكشە اتاپ وتەتىن بىرىككەن كومميۋنيكە قابىلدادى.
