كورمەنىڭ «ماحاببات الماسى» اتالۋى دا تەگىن ەمەس. سىرباز سۋرەتشى كورىكتى قالانىڭ سيمۆولى الما ەكەنىن ماقتانىشپەن قابىلداي وتىرىپ, ءوز كورمەسىنە وسىنداي اتاۋ ۇسىندى. كارمينە بارباروعا الماتى سىندى كەرەمەت قالادا جيىرما جىلدان اسا تۇرۋ عاجايىپ اسەر ەتكەن ءتارىزدى. بۇل جەردە ول قازاقستانعا, ونىڭ حالقىنا, شالقار دالاسىنا دەگەن ساعىنىشىن وسى سۋرەتتەرمەن جەتكىزگەن. ءوزىنىڭ بۇلقىنعان جۇرەگىندەگى ومىرگە, ادامدارعا دەگەن شەكسىز ماحابباتىن ول شىعارمالارى ارقىلى جەتكىزۋگە تىرىسادى.
كارمينەنىڭ كوركەم ويلارى مەن ۇشقىر يدەيالارى جان-جاقتىلىعىمەن ەرەكشەلەنەدى. ول مونۋمەنتالدى كەسكىندەمە,گرافيكا, ءمۇسىن سالالارىندا جۇمىس ىستەيدى, ءارى سونىمەن بىرگە پورترەت, ناتيۋرمورت جانە كوركەم سۋرەتتەر سالادى.
ەكى الەم مەن مادەنيەتتە قاتار ءومىر سۇرەتىن سۋرەتشىلەر از ەمەس. دەسەك تە جەرورتا تەڭىزىنىڭ جۇمساق كليماتىن قاتاڭ قۇرلىققا ايىرباستاۋ كوپتىڭ تاڭدانىسىن تۋدىراتىن اۋىر تاڭداۋ ەكەنى بەلگىلى. كارمينە كەرىلگەن كەربەز تابيعاتتىڭ كەلبەتىن كورىپ سولاي جاسادى دا. سۋرەتكە بەرىلە كىرىستى. سويتە تۇرا ول ءوزى ءۇشىن مۇلدە جاڭا الەم – قازاق مادەنيەتىنىڭ الەمىنە شىنايى قىزىعۋشىلىعىن تانىتىپ, ونى ءتۇسىنىپ قانا قويماي, سەزىنۋگە قۇلشىندى. ونىڭ ءومىردى تانۋعا دەگەن ىنتىزارلىعى اۋىلدارعا ساپار شەگۋ, ءوزىنىڭ بولاشاق كەيىپكەرلەرىنىڭ – قارتتاردىڭ, ايەلدەردىڭ جۇزدەرىنە تەرەڭ ۇڭىلۋگە, تابيعات بوياۋىنا قانىعۋعا ءۇيىر ەتەتىنىن بىلەدى. ء«ۇش اجە» سۋرەتى «اۋىزاشار» كەزىندەگى داستارقان باسىنداعى ءۇش كىسىنىڭ بەينەسى كەلىستى كەيىپتەلگەن. كارمينەنىڭ سۋرەتتەرى پلاستيكانى, قوزعالىستى توسىن جەتكىزگەندىگىمەن, تۇستەردىڭ اۋىسۋىن نازىك سەزىنە وتىرىپ, كومپوزيتسياعا ۇيلەسىمدى بەرە العاندىعىمەن ەرەكشەلەنەدى. بۇل شىعارماسىنىڭ مىسالىندا سۋرەتشىنىڭ گارمونيانى جاقسى سەزەتىندىگىن, ءداستۇرلى, ۇلتتىق كوركەمونەر ەلەمەنتىن الەمگە قازىرگى زامانعى كوزقاراسپەن ۇشتاستىرا العاندىعىن اڭعارامىز. كارمينە باربارو بىزگە جاڭا كوزقاراسىمەن, ەرەكشە تاعدىرىمەن يتاليالىق رومانتيزم مەن قازاقى مەنتاليتەتتى ساباقتاستىرا بىلگەندىگىمەن قىزىقتى. شەبەردىڭ بىزگە بۇرىننان تانىس ءارى ۇيرەنشىكتى تاقىرىپتار مەن سيۋجەتتەردى جاڭاشا جەتكىزە العانى قۋانتادى. بۇل كورمەدە ونىڭ 80-نەن استام كەسكىندەمەلىك شىعارمالارى قويىلىپ وتىر.
ساپارباي پارمانقۇل,
«ەگەمەن قازاقستان»
الماتى
