ابزالدىڭ قاسىنا ءوزى سياقتى اعاش شەبەرلەرىن جيناپ, قازاقتىڭ ەرتەدەن بەرى تۇتىنعان تۇرمىستىق بۇيىمدارىن, ونىڭ ىشىندە ىدىس-اياقتار جاساۋمەن اينالىسقانىنا بىرنەشە جىل بولدى. اۋەلگىدە اعاشتان استاۋ, تاباق جونۋدى ەرمەك سانايتىن ول كۇندەردىڭ كۇنى مۇنى كاسىپكە اينالدىرۋدى كوزدەدى. الدىمەن اعاشتان ىدىس-اياق جونىپ, ونى تۇتىنۋشىلار تالعامىنا ساي ەتىپ جاساۋ ءۇشىن ارنايى كۋرستان ءتالىم الۋدى ويلادى. بىراق تالدىقورعاندا بۇل ءىستىڭ قىر-سىرىن اشىپ وقىتاتىن مامان جوق بولىپ شىقتى. ىزدەنگەن مۇراتقا جەتپەي مە, اعاشتىڭ ءتىلىن بىلەتىن ادام تاراز قالاسىنان تابىلدى. ابزال ەرىنبەي باسقا قالاعا بارىپ, اعاشتان استاۋ جاساۋدىڭ سىرىن ۇيرەنىپ, ءادىسىن الىپ قايتتى.
بىراق باستاعان ءىس بىردەن بيزنەسكە اينالىپ كەتە قويمادى. ارنايى قۇرىلعىلار مەن ورىن قاجەت بولدى. شيكىزات كوزى تاعى بار. ءارى قول ۇشىن بەرەتىن كومەكشى دە كەرەك. ال مۇنى ۇيىمداستىرۋ, قۇرال-جابدىق ساتىپ الۋ مەن تسەح اشاتىن ورىن جالداۋ ءۇشىن قارجى كەرەك ەدى. ءدال وسى تۇستا «اتامەكەن» ۇلتتىق كاسىپكەرلەر پالاتاسىنىڭ «باستاۋ» جوباسى دۇنيەگە كەلىپ جاتقان بولاتىن. ىزدەگەنگە-سۇراعان بولىپ, ابزال ەندى كاسىپكەرلىكتىڭ الىپپەسىن وقۋعا بەت بۇردى. ناتيجەسىندە, «بيزنەستىڭ جول كارتاسى - 2020» باعدارلاماسى اياسىنداعى مەملەكەتتىك گرانت بايقاۋىنا قاتىسۋعا بەل بۋدى. ابزال بەگىمبەتوۆ ۇسىنعان «اعاشتان ۇلتتىق ىدىستار جاساۋ ءوندىرىسى» جوباسى ۇزدىك اتانىپ, 1 ميلليون تەڭگە كولەمىندەگى گرانت بۇيىردى. كاسىپكەر بۇل قاراجاتقا قۇرال-جابدىق ساتىپ الىپ, تسەحتىڭ اۋماعىن كەڭەيتتى.
قازىر «تابىستىڭ» ءوندىرىس تسەحىندا بەس ادام جۇمىس ىستەيدى. ولار كۇنىنە 12-15 دانادان استاۋ دايىندايدى ەكەن.
– اعاشتان شابىلعان ىدىستى تۇتىنۋشىلار قاتارى جىل ساناپ كوبەيىپ كەلەدى. اسىرەسە ەت تارتۋعا ارنالعان اعاش استاۋ ءوتىمدى. ءبىزدىڭ ونىمدەرىمىزگە استانا, الماتى, قوستاناي قالالارىنان ارنايى تاپسىرىس بەرىپ, الدىرۋشىلار بار. قازىر استاۋلارعا قازاقتىڭ ويۋ-ورنەگىنىڭ ىشىنەن «ۇكىكوز» اتتى نۇسقاسىن تاڭداپ, جاساتۋشىلار كوپ. ءبىزدى تاۋارعا تاپسىرىس بەرۋشى ادامداردىڭ ۇلتتىق سيپاتقا دا ماڭىز بەرە باستاعانى قۋانتادى, – دەيدى اعاش شەبەرى ابزال.
قالماحانبەت مۇقامەتقالي,
«ەگەمەن قازاقستان»
الماتى وبلىسى
