گوركي شىعارماشىلىعىنداعى ۇلكەن بەلەستەردىڭ ءبىرى – ونىڭ «ەگور بۋلىچوۆ جانە باسقالار» دراماسى مەن «ۆاسسا جەلەزنوۆا» تراگەدياسى بولدى. تاقىرىپ جاعىنان ەكەۋى دە ءبىر-بىرىنە ۇقساس. ەگور بۋلىچوۆ تا, ۆاسسا جەلەزنوۆا دا رەسەيدەگى ەڭ ءىرى كاسىپورىن يەلەرى. مۇنداعى درامالىق سيتۋاتسيالار دا ءبىر-بىرىمەن قارايلاس كەلەدى. سوندىقتان دا بولار, تەاتر سىنشىلارى ۆاسسا جەلەزنوۆانى «يۋبكا كيگەن بۋلىچوۆ» دەپ تە اتاپ ءجۇردى.
«ەگور بۋلىچوۆ جانە باسقالار» پەساسى ا.م. گوركيدىڭ وكتيابر رەۆوليۋتسياسىنان كەيىن جازعان العاشقى پەساسى بولدى.
1931 جىلدىڭ كۇزىندە م.گوركي مالايا نيكيتسكايا كوشەسىندەگى ءوز ۇيىندە پەسانى ۆاحتانگوۆ تەاترىنىڭ ارتىستەرىنە وقىپ بەردى. ءبىر كەزدەرى ف.شالياپينمەن بىرگە كونسەرۆاتوريانىڭ ۆوكالدىق فاكۋلتەتىنە ەمتيحان تاپسىرعان ا.پەشكوۆ قوڭىر دا قوماقتى داۋىسىمەن پەسانى جاقسى وقىپ شىقتى (كونسەرۆاتورياعا پەشكوۆ قابىلدانىپ, شالياپين تۇسە الماي كەتكەن).
پەسانى تەاتر ارتىستەرى ءۇنسىز تىڭداپ, وقىلىپ بىتكەن سوڭ بۇرىنعىداي اعىلىپ سويلەي الماي, قىسىلىپ-قىمتىرىلعان, ءتيىپ-قاشىپ ماقتاعان بوپ تىم ساراڭ پىكىر ايتتى. قىسقاسى, پەسا ەشكىمگە ۇنامادى. وندا ارەكەت از, ديالوگتار دورەكى, وقيعا دامۋى تەاترعا ارنالماعانداي كورىندى. ءۇش اكت بويى ادۋىندى دا وركوكىرەك باستى كەيىپكەردىڭ ءولىم اۋزىندا جاتقانى, ءانى-مىنە ولەدى دەپ كۇتكەنمەن ءولىپ تە تىنبايتىنى كورسەتىلەدى. وقيعانىڭ باس-اياعى وسى عانا. پەسانى تالقىلاۋ كەزىندە اكتەرلەر تۋراسىن ايتۋدان تايساقتاپ, ايتا قالسا دا سىزدىقتاتا سويلەپ, جەڭىل-جەلپى سىن-ەسكەرتپەلەرىن جاقاۋراتىپ ايتۋمەن عانا شەكتەلدى.
گوركيگە ءتان ەرەكشە قاسيەت – ول ەشقاشان اتاق-داڭقى مەن بەدەلىنە سالىپ ءوزىن وزگەلەردەن بيىك ۇستامايتىن. سول ادەتى بويىنشا ول تەاتر ەسكەرتپەلەرىن اسا ءبىر ىجداھاتتىقپەن تىڭداپ, ەسكەرتۋلەر بويىنشا ماتىنگە وزگەرىستەر ەنگىزىپ, بىراق العاشقى نۇسقاسىن نەگىزىنەن وزگەرىسسىز قالدىردى.
ەكى-ءۇش ايدان سوڭ سپەكتاكلدىڭ ءبىرىنشى اكتىسى كوركەمدىك كەڭەسىنىڭ نازارىنا ۇسىنىلدى. جينالعانداردىڭ باسىم كوپشىلىگى تاعى دا تۇيىققا تىرەلىپ, دراماتۋرگتىڭ نە ايتپاق بولعانىن تۇسىنە الماي دال بولدى. ەڭ باستىسى, گوركي بۇل پەساسىندا كورەرمەندى سىرتقى وقيعالاردىڭ اسەرىمەن, ينتريگانىڭ كەنەتتەن سىنىپ, باسقا باعىتتا ءوربۋى سياقتى ەجەلدەن كەلە جاتقان تەاتر ادىسىنەن سانالى تۇردە باس تارتىپ, بۋلىچوۆتىڭ نەگە, نە ءۇشىن ءۇش اكت بويى ولە الماي جاتقانىنىڭ سەبەبىنە رەجيسسەرلىك ءجىتى كوزبەن قاراۋ كەرەك ەكەنىن تالاپ ەتتى. ساحنادا ءۇش اكت بويى ولەمىن دەپ ولە الماي جاتقان ادامعا قانداي رەجيسسەرلىك ءجىتى كوز كەرەك؟ ول قانداي ءادىس؟ ءۇش اكت بويى ولە الماي جاتقان ادامنان كوز الماي قاراپ وتىرۋ كورەرمەندى جالىقتىرىپ جىبەرمەي مە؟
كورەرمەندەر نازارىن اۋلاۋ ءۇشىن رەجيسسەر بۋلىچوۆتىڭ جاستىعىنىڭ استىنا ءبىر قاعازدى جاسىرىپ قويۋ كەرەك دەگەن يدەيا ۇسىنىپ كوردى. ول قاعازدا وسيەت جازىلعان بولۋ كەرەك. دەمەك, وعان كەلىپ جاتقان جاقىن-تۋىستارى سول وسيەت-قاعازدى ۇرلاپ الۋعا ارەكەت جاساۋلارى ءتيىس. قويىلىمنىڭ فينالىندا ءتىرى اكتەرلاردىڭ ورنىنا ۇرمەلى قۋىرشاقتار شىعىپ, سابىن كوپىرشىكتەرى سياقتى ولار بىرىنەن سوڭ ءبىرى جارىلىپ, سول جارىلىستان بۋلىچوۆتىڭ ەسكى ءۇيى وپىرىلىپ قۇلاپ ءتۇسۋى ءتيىس. سيمۆوليكا – ەسكىنىڭ كۇيرەۋى.
مۇنداي ءادىس شىعارما ارقاۋىنا مۇلدە جات, سيۋجەتپەن كىرىگە المايتىن ءادىس ەدى.
قويىلىم وسىنداي رەجيسسەرلىك «جاڭاشىل ادىسپەن» تولىق قويىلىپ شىققان سوڭ اۆتوردىڭ ۇنجىرعاسى ءتۇسىپ, تەاتر ۇجىمى تاعى دا دەل-سال كۇيگە ءتۇستى. قويىلىمدى قاتتى سىنعا الۋشىلاردىڭ ءبىرى ب.ە.زاحاۆا «مۇنداي ارزانقول «تاپقىرلىق» پەسا تاقىرىبىنا مۇلدە جات, شىعارماداعى ماتەريالعا مۇلدە ۇيلەسپەيتىنىن, اقىرى وسىنداي «جامان» پەسانى قويۋ كەرەك دەپ شەشكەن ەكەنسىزدەر, وعان شىن مانىندە جاڭاشا تۇسىنىك كەرەك» دەگەن ۇسىنىستارىن ايتقان سوڭ, تەاتردىڭ كوركەمدىك كەڭەسى ونىڭ وزىنە باس سالىپ, پەسانى «جاڭاشا» قويۋدى تۋرا وسى جەردە زاحاۆاعا جۇكتەدى.
رەجيسسەر كەلىسىم بەردى. بىراق ول ءۇشىن ەكى اپتا ۋاقىت سۇرادى. ويلانىپ, ناقتى شەشىم قابىلداۋ ءۇشىن.
«ەكى اپتا مەرزىمنىڭ ءبىتۋىن كۇتپەستەن بوريس ەۆگەنەۆيچ ماسكەۋگە قايتا ورالىپ, بىردەن تەاترعا كەلدى, – دەپ ەسكە الادى نەميروۆيچ-دانچەنكو. – ول ەكى اپتاعا جەتەر-جەتپەس ۋاقىتتىڭ ىشىندە وسى «جامان» پەساعا «عاشىق» بولىپ ورالدى. «بۇل پەسادا ءبىز كورمەگەن, ءبىز بايقاي الماعان كۇردەلى الەم جاتىر, – دەپ مويىندادى ب.زاحاۆا. ول الەم – گوركي جاساعان كۇردەلى وبرازدار گالەرەياسى, قۇيىلىپ تۇرعان قۇنارلى ءتىل, استارلى سوزدەر, ادام جانىنىڭ قاتپار-قاتپار تەرەڭ سىرلارى, ەگور بۋلىچوۆتىڭ ءۇش اكتى بويى ولە الماي جاتۋىنىڭ ار جاعىندا قانداي موتيۆ بار؟ جەكە ادامنىڭ تاعدىرى-جەكە ادامنىڭ ءومىرى عانا. سول جەكە تاعدىر ارقىلى م.گوركي سول كەزدەگى قوعام تاعدىرىن كورسەتىپ وتىر. اۋرۋ قوعامنىڭ ولگىسى كەلمەي جانتالاسىپ باعۋدا. گوركي مىنە, وسى «اۋرۋدى» اشىنا جازىپ وتىر. ايتپەسە بۋلىچوۆتىڭ وسيەت قاعازىن كىم الادى, كىم-كىممەن جاعا جىرتىسىپ, كىم كىمنىڭ تۇمسىعىن بۇزادى – گوركي ءۇشىن ءبارى ءبىر ەمەس پە؟ دراماتۋرگ اۋرۋ قوعامنىڭ ولگىسى كەلمەي جانتالاسۋىن تاپتىشتەپ كورسەتىپ وتىرعان جوق پا؟ بۋلىچوۆ ءۇيىنىڭ سىرتىندا بولىپ جاتقان وقيعانى نەگىزگى سيۋجەتتىڭ پارالەلى رەتىندە كورسەتە ءبىلۋىمىز كەرەك». دراماتۋرگتىڭ ويىن تاپ باسۋ, شىعارمانىڭ استارىنا ۇڭىلە ءبىلۋ, قوعام ءومىرى مەن جەكە تۇلعانىڭ تاعدىرىن ءبىرتۇتاس ورگانيزم رەتىندە تۇتاستاي بىرىكتىرە قاراۋدا رەجيسسەرلىك ء«جىتى» كوزقاراس وسىلاي بولسا كەرەك.
رەجيسسەر تەاترعا كەلگەندە پەسانى باسقاشا وقىپ, ونى باسقا قىرىنان تانىپ قانا كەلگەن جوق, بولاشاق سپەكتاكلدى تۇتاستاي «كورىپ» كەلدى. ءتىپتى باستى ءرولدى بەلگىلى دە بەدەلدى ۆ.ششۋكينگە تاپسىراتىنىن دا ايتا كەلدى.
جاڭا قويىلىمدا قويىلىمداعى بارلىق كەيىپكەرلەرگە قايتا جان ءبىتتى. ەگور بۋلىچوۆ ەندى ولىمسىرەپ, تالماۋسىراپ جۇرگەن جوق, ولەر الدىنداعى «بوي جاساعان» ادامداي بارلىق ءسوزىن جىندانعان ادام سەكىلدى بۋىرقانا ايتىپ, قۇتىرىنا اندەتىپ, جىندانۋدان ساقتاندىرۋ ءۇشىن ونىڭ ء«ىشىن جايلاعان» جىن-سايتاندى قۋىپ شىقپاق بوپ كەلگەن ايەلىنىڭ ءسىڭلىسى يگۋمەنيا مالانيانى قاتتى قويىلعان گراموفون مۋزىكاسىنىڭ استىندا الاسۇرا بيلەپ, قۇدايعا قارسى ايعايلاي سويلەپ قۋىپ شىعادى. ۇستەلگە شىعىپ تەپسىنىپ, ءورت ءسوندىرۋشى گاۆريلانىڭ زارەسىن الادى. تەرەزەنى ايقارا اشىپ تاستاپ, «قاراڭعىلىققا تۇنشىققان پاتشالىق تۇنشىعىپ ولەدى» دەگەن ولەڭدى تىڭداپ, «دۇنيە قاراڭ!.. ءبارى ءبىتتى! مەن اداسىپ, باسقا الەمدە ءومىر ءسۇرىپ كەلىپپىن! تارت ترۋبانى, گاۆريلا! تارتا ءتۇس!» دەپ جانۇشىرا ايعايلاپ بارىپ جان تاپسىرادى. ەسكى روسسيا ءولدى, جاڭا روسسيا جاڭعىرىعى اشىق تەرەزەدەن ازىناپ ەستىلىپ تۇر. قويىلىم ادام ايتقىسىز زور تابىسپەن ءوتتى.
پەسانى ءتۇسىنىپ وقۋ, دراماتۋرگ ويىن ءدال تاۋىپ, اشىپ كورسەتە ءبىلۋ دەگەن وسى بولسا كەرەك. گوركي دە پرەمەرانى كورۋگە قاتىستى. وسى سپەكتاكلدەن سوڭ گوركيدىڭ اتاعى شارىقتاپ اسپانعا كوتەرىلسە, ونىڭ ءار قادامىن اڭدۋشى «قۇيىرشىقتار» دا كۇشەيە ءتۇستى.
ء«سىز جويقىن داۋىلدىڭ جاقىنداپ كەلە جاتقانىن حابارلاپ قانا قويمايسىز, ءسىز سول داۋىلدى وزىڭىزبەن بىرگە الىپ كەلگەندەي بولدىڭىز» دەپ جازدى جازۋشى ءارى دراماتۋرگ لەونيد اندرەەۆ ماكسيم گوركيگە. اندرەەۆتىڭ بۇل حاتىن دا قىراعى ءتارتىپ ساقشىلارى الىپ, گوركيگە ارنالعان ارنايى پاپكىگە تىگىپ قويادى.
پاتشالىق رەسەيدىڭ كەزىندە سوڭىنا ىلەسكەن «قۇيىرشىق», رەۆوليۋتسيا داۋىلپازى (بۋرەۆەستنيك) اتانعان گوركيدىڭ سوڭىنان كەڭەس وكىمەتىنىڭ كەزىندە دە ءبىر ەلى قالماپتى.
تالانتتى ادام بەلگىلى ءبىر كەزەڭدەگى بيلىك ءۇشىن عانا ەمەس, بارلىق كەزەڭدەگى بارلىق بيلىك ءۇشىن «سەنىمسىز». ويتكەنى بارلىق بيلىك بىتكەننىڭ شىندىعى باسقا دا وتىرىگى ءبىر. ال شىن تالانتتى جازۋشى شىندىقتى ايتپاي تۇرا المايدى.
«ەگور بۋلىچوۆتان» سوڭ ماكسيم گوركي «ۆاسسا جەلەزنوۆا» دراماسىن جازدى. تراگەديا جانرىنا جاتقىزۋعا بولاتىن بۇل پەسا كەڭەستەر وداعى تەاترىندا ەڭ ەلەۋلى, ەڭ قۇندى, كورەرمەندەردى ەڭ كوپ جيناعان «كاسسالىق» سپەكتاكل بولدى.
مۇنداعى تاقىرىپ – ەسكى مەن جاڭانىڭ ايقاسى, يدەيا – جاڭا رۋحتىڭ ءسوزسىز جەڭىسكە جەتەتىندىگى.
درامالىق سيتۋاتسيا – ۆاسسا جەلەزنوۆا مەن ونىڭ بايلىعىن تارتىپ الۋدى كوزدەگەن پايداكۇنەم, قوعامنىڭ مۇددەسىن ەمەس, جەكە باستىڭ قامىن ويلاعان توعىشارلاردىڭ اراسىنداعى تارتىس.
كۋلميناتسيا – ۆاسسا جەلەزنوۆانىڭ ءولىمى.
ۆاسسا جەلەزنوۆا – ۇلكەن ماسشتابتاعى كاسىپورىن يەسى. ۆولگا وزەنى بويىنداعى كەمە جۇرگىزۋ كومپانياسىنىڭ قوجايىنى. العىر, ىسكەر, جىگەرلى, ءوزىن-ءوزى قورعاي الاتىن قايراتتى ايەل. ونىڭ بايلىعىنا قىزىعىپ تا, قىزعانا قارايتىندار ونى تارتىپ العىسى كەلەتىندەر, تىم بولماسا سول مول بايلىقتان «تىستەپ» قالۋعا ۇمتىلاتىن ادامدار تولىپ جاتىر. ۆاسسانىڭ كۇرەسۋدەن جۇيكەسى توزا باستادى. اينالاسىن قورشاعان «قاسقىرلاردان» جەرىنىپ ءبىتتى. ەگور بۋلىچوۆ سياقتى بۇل دا ءوزىن باسقا الەمدە, باسقا زاماندا, باسقا ورتادا ءومىر ءسۇرىپ جاتقانىن سەزە باستادى.
الاياقتار مەن جەمقورلاردى جەڭۋ مۇمكىن ەمەس ەكەنىنە كوزى جەتە باستادى.
بۇل يدەيانى بۇگىنگى كۇنمەن ۇندەس ەمەس دەپ كىم ايتا الادى؟
ۆاسسا جەلەزنوۆا سانالى تۇردە جەڭىلدى.
بارلىق مال-مۇلكىن, كەمە جۇرگىزۋ كومپانياسىن, قىرۋار اقشاسىن تارك ەتىپ, باقشاسىندا ءوسىپ تۇرعان جەمىس اعاشىنىڭ ءبىر بۇتاعىن بەتىنە جاۋىپ, ومىرىمەن قوش ايتىستى. ءومىر ازابىنان قۇتىلدى.
ءبۇتىن ءبىر ءداۋىر كەلمەسكە كەتتى. ءۇش ساعات بويى ۆاسسا جەلەزنوۆامەن بىرگە ءومىر سۇرگەن زالداعى كورەرمەن سپەكتاكل بىتكەن سوڭ قول سوعۋدى دا ۇمىتىپ, بىرنەشە مينۋت بويى ورىندارىنان تاپجىلماي, ءۇنسىز وتىرىپ قالدى.
ولار تەاترداعى كاتارسيستى شىنداپ باستان كەشىرىپ, ادىلەتسىزدىك اتاۋلىعا ءدال وسى ساتتەن باستاپ قارسى شىقپاق بولعانداي دۇرلىگە كوتەرىلدى.
ونەر قۇدىرەتى دەگەن وسى. ول ادام بويىنا ەرەكشە كۇش, ەرەكشە جىگەر, ەرەكشە رۋح سەۋىپ, ەرەكشە شەشىم قابىلداۋعا اسەر ەتەدى.
وسى پەسانىڭ تاعدىرى دا ادام تاعدىرىنا – وتە ۇقساس. پرەمەرادان سوڭ بيلىك اتاۋلىعا قارسى كوشەگە شىعىپ, «جويىلسىن ادىلەتسىزدىك!» – دەپ ۇرانداۋعا دايىن كوپشىلىك, ارادا ءتورت-بەس جىل وتكەن سوڭ باسقا پەسالاردىڭ اسەرىنەن بۇل درامانى دا ۇمىتا باستادى.
پەسا بارلىق تەاترلاردىڭ رەپەرتۋارىنان ءتۇسىپ قالدى. ول مۇلدە ۇمىتىلا باستادى.
1935 جىلى ماسكەۋدە دەرەۆنيالىق تەاترلاردىڭ بۇكىلرەسەيلىك فەستيۆالى ءوتتى. وسى فەستيۆالعا لەنينگراد وبلىسىنداعى ءبىر كولحوزدىڭ اۋەسقوي تەاترى «ۆاسسا جەلەزنوۆا» دراماسىن الىپ كەلدى.
قويىلىم كورەرمەندەر مەن تەاتر سىنشىلارىنىڭ ۇلكەن باعاسىنا يە بولدى.
ۇمىتىلا باستاعان كلاسسيكالىق پەسانىڭ ەكىنشى ءومىرىنىڭ باستالۋىنا وسىلايشا الىس تۇكپىردە جاتقان كولحوز تەاترى سەبەپ بولدى.
وسىدان سوڭ ۇلكەن تەاترلار «ۆاسسا جەلەزنوۆانى» جاپپاي قايتا قويا باستادى.
* * *
الەم ادەبيەتىنىڭ كلاسسيگى رەتىندە تانىلىپ, كوپتەگەن روماندارىمەن, پەسالارىمەن, «ماكار چۋدرا», «چەلكاش», «كونوۆالوۆ», «يزەرگيل كەمپىر» سياقتى تاماشا اڭگىمەلىرمەن اتاق-داڭقتىڭ شىڭىنا كوتەرىلگەن ماكسيم گوركي كەڭەس وكىمەتى ىدىراعاننان كەيىن سەبەپسىز ۇمىتىلا باستادى. «سۇڭقار تۋرالى جىر», «داۋىلپاز تۋرالى جىر», «انا» رومانى ءۇشىن كەيىنگى ۇرپاق ونى «پرولەتارياتتىڭ جازۋشىسى», «كوممۋنيستىك يدەولوگيانىڭ تابىنۋشىسى» رەتىندە عانا تانىپ, ونىڭ باسقا شىعارمالارىن جادىلارىنان ءبىرجولاتا سىزىپ تاستادى. بۇل تەندەنتسيا – توبىرلىق سانانىڭ اداسۋى ەدى. رەسەي وقىرماندارى كەڭەس وكىمەتىنىڭ العاشقا ون جىلدىقتارى كەزىندە بۇكىل ادامزاتتىڭ كوركەم ويىنىڭ ەڭ جارىق جۇلدىزى دەپ مويىندالعان ۇلى جازۋشى ف.م.دوستوەۆسكيدى دە سانادان شىعارىپ تاستاعان ەدى. سول سياقتى, كوممۋنيستىك يدەولوگيادان ارىلۋ جولىندا ۇرانعا ىلەسكىش توبىر قۇممەن بىرگە التىندى دا توگىپ تاستادى.
دەتەكتيۆ جانرىندا پوليتسيا قىزمەتكەرى جايلى 30-عا جۋىق رومان جازىپ, شىعارمالارىنىڭ تارالىمى 750 مىڭعا جەتكەن رەسەيدىڭ ەڭ اتاقتى جازۋشىسى الەكساندرا مارينينا (مارينا الەكسەەۆا) جاس قالامگەرلەرمەن تاجىريبە جۇمىسىن جۇرگىزۋ كەزىندە ولاردىڭ ءبارى گوركيدى بىلمەيتىن بوپ شىعادى. بىلسە دە, وقۋلىقتا بار «داۋىلپاز تۋرالى جىر» جانە «شىڭىراۋدا» پەساسىن عانا بىلەدى ەكەن. سونىڭ وزىندە «شىڭىراۋدانى» پەسا ەمەس, «رومان» دەپ شاتاستىرعان. بۇدان سوڭ ول جاستارعا دا, وزىنە دە جاڭا تاجىريبە جۇرگىزىپ كورەدى. ول تاجىريبەنىڭ تالابى: گوركيدى رەۆوليۋتسيا جازۋشىسى دەپ ەمەس, ساياساتتان تىس جازۋشى رەتىندە شىعارمالارىن قايتا وقىپ شىعۋدى تاپسىرادى. ءوزى دە وسى ويمەن جازۋشى شىعارمالارىن قايتادان تۇگەلدەي وقىپ شىعادى. مىنە جاڭالىق! جوعارىدا اتالعان «انا» رومانى مەن ەكى جىرىنان وزگە ءبىر دە ءبىر شىعارماسىنان «رەۆوليۋتسيالىق» رۋحتىڭ, بولشەۆيكتىك ناسيحاتتىڭ ءىزىن دە تابا الماي, كەرىسىنشە, بارلىق شىعارمالارىندا ادام جانىنداعى ءىرى قوپارىلىستاردى اقتارا جازعان ناعىز ۇلى سۋرەتكەردى قايتا اشىپ, وسى كەزگە شەيىن وزگەلەر ەمەس, ءوزىنىڭ دە ساناسىنىڭ توبىرلىق جالعان ناسيحاتپەن تۇماندانىپ كەلگەنىنە تاڭعالادى. ي.س.تۋرگەنەۆتىڭ روماندارىندا اكە مەن بالانىڭ اراسىنداعى تۇسىنىسپەۋشىلىكتەن تۇراتىن دراما نەگىزگى پروبلەما بولسا, ا.م.گوركيدە ول پروبلەما انتوگونيستىك قاراما-قايشىلىق تۇرعىسىنداعى تارتىسقا قۇرىلعان. مۇندا كەلەسى ۇرپاق اتا-انانىڭ جولىمەن جۇرگىسى كەلمەيدى, ول جاڭا جول ىزدەيدى. سول ىزدەنىس جولىندا ادامي ىزگى قاسيەتتەر مەن نەشە ءتۇرلى حارام نيەتتەردىڭ بىتىسپەس كۇرەسىنە تولى درامالىق سيتۋاتسيالاردىڭ الۋان ءتۇرى ايقاسقا تۇسەدى. الەكساندرا مارينينانىڭ توقىراۋ كەزەڭىن كورسەتۋگە ارناعان «گوركي كۆەست» دەپ اتالاتىن كىتابى م.گوركيدىڭ شىن مانىندە ۇلى جازۋشى ەكەنىن قازىرگى وقىرماندارعا قايتا تانىتىپ بەردى.
دۋلات يسابەكوۆ,
جازۋشى
