قازىرگى تاڭدا ادامداردىڭ تاريحي تانىم-تۇيسىگىندە كينو ونەرىنىڭ الار ورنى ەرەكشە بولعاندىقتان, پرەزيدەنت دەرەكتى-قويىلىمدىق فيلمدەردىڭ, كوركەم كارتينالاردىڭ تسيكلىن وندىرىسكە ەنگىزۋدى تاپسىردى. مەملەكەت باسشىسى وسى ماقساتتا ۇلى دالانىڭ باي ميفولوگيالىق جانە فولكلورلىق ماتەريالدارىن پايدالانۋدى ۇسىنادى.
«اتالعان جوبالار كەڭ حالىقارالىق ىنتىماقتاستىق اياسىندا وتاندىق جانە شەتەلدىك ۇزدىك ستسەناريستەردى, رەجيسسەرلەردى, اكتەرلەردى, پروديۋسەرلەردى جانە زاماناۋي كينو ءوندىرىسىنىڭ باسقا دا ماماندارىن تارتۋ ارقىلى جۇزەگە اسىرىلۋعا ءتيىس».
دەرەكتى فيلمدەرمەن قاتار قىزىقتى ءارى مەلودرامالىق سارىنداعى تانىمال فەنتەزي جانە شىتىرمان وقيعالى بلوكباستەرلەردىڭ ەلەمەنتتەرىن قوسا وتىرىپ, جاڭا تاريحي تەلە-كينو تۋىندىلاردىڭ جانرلارىن بارىنشا كەڭەيتۋ قاجەتتىگى دە ايتىلعان.
«ۇلت قاھارماندارىن ۇلگى تۇتۋ ءۇردىسىن قالىپتاستىرۋعا جول اشاتىن ساپالى بالالار فيلمدەرى مەن مۋلتيپليكاتسيالىق سەريالداردى اسا قاجەت ەتەتىن وسكەلەڭ ۇرپاقتىڭ دا تالعامىنا ەرەكشە نازار اۋدارۋ كەرەك.
ءبىزدىڭ داڭقتى باتىرلارىمىز, ويشىلدارىمىز بەن ەل بيلەۋشىلەرىمىز – تەك قازاقستان عانا ەمەس, سونداي-اق بۇكىل الەم بويىنشا ەلىكتەۋگە لايىقتى تۇلعالار», دەلىنگەن پرەزيدەنت ماقالاسىندا.
