ماراپاتتاۋ ءراسىمىن رەسمي تۇردە اشقان قحا توراعاسىنىڭ ورىنباسارى لەونيد پروكوپەنكو بايقاۋدىڭ ءداستۇرلى تۇردە تۇڭعىش پرەزيدەنت كۇنىنە وراي ۇيىمداستىرىلىپ جاتقانىن ايتا كەلە, بايقاۋعا قاتىسقان جۋرناليستەرگە العىسىن ءبىلدىردى.
قازىلار القاسىنىڭ توراعاسى پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ جۋرناليستەردى ماراپاتتاۋ بارىسىندا: ء«بىزدىڭ حالقىمىزدىڭ بىرلىگى – باستى بايلىعىمىز. ءبىزدىڭ باستى قازىنامىز – جەردىڭ استىندا دا, ۇستىندە دە ەمەس, ادامداردىڭ جۇرەگىندە. نۇرسۇلتان نازارباەۆ كوپتەگەن عاسىر بويى كەمشىلىك دەپ سانالعان نارسەنى, ياعني ەلدىڭ كوپ ۇلتتىلىعىن ەلدىڭ ارتىقشىلىعىنا اينالدىرا ءبىلدى», دەدى.
بايقاۋداعى «قوعامدىق كەلىسىم مەن جالپىحالىقتىق بىرلىكتىڭ قازاقستاندىق مودەلىنە ارنالعان ۇزدىك ماتەريال» اتالىمى بويىنشا ءبىرىنشى ورىنعا «كازاحستانسكايا پراۆدا» گازەتىنىڭ پاۆلودار وبلىسىنداعى ءتىلشىسى ەكاتەرينا بەسكورسايا يە بولدى. «اسسامبلەيا قىزمەتىنىڭ جاڭا باعىتتارى مەن جوبالارى تۋرالى ۇزدىك ماتەريال» اتالىمى بويىنشا «Qazaqstan» ۇلتتىق تەلەارناسىنىڭ تالدىقورعانداعى ءتىلشىسى قۋانىش سەرىكقانوۆ ءبىرىنشى ورىن السا, «وسكەلەڭ ۇرپاقتى قازاقستاندىق پاتريوتيزم رۋحىندا تاربيەلەۋگە ارنالعان ۇزدىك ماتەريال» اتالىمى بويىنشا «دوستىق ايماعى» جۋرنالىنىڭ باس رەداكتورى دميتري پولتارەنكو ءبىرىنشى دارەجەلى ديپلوممەن ماراپاتتالدى. «تۇركىستان» حالىقارالىق گازەتىنىڭ ءتىلشىسى دينارا جەلدىباەۆا «مەملەكەتتىك ءتىلدى ناسيحاتتاۋعا ارنالعان ۇزدىك ماتەريال» اتالىمى بويىنشا ءبىرىنشى ورىنعا يە بولدى. «الەۋمەتتىك جەلىلەردەگى قوعامدىق كەلىسىم مەن جالپىحالىقتىق بىرلىك تاقىرىبىنا ارنالعان ۇزدىك ماتەريال» اتالىمى بويىنشا ءبىرىنشى ورىنعا «داۆايتە گوۆوريت» باعدارلاماسىنىڭ جۇرگىزۋشىسى ايگۇل مۇكەي لايىق دەپ تانىلدى.
سونداي-اق «استانا – بەيبىتشىلىك پەن كەلىسىمنىڭ 20 جىلى» دەگەن تاقىرىپتاعى ۇزدىك ماتەريالعا تاعايىندالعان ارنايى جۇلدەنى «Qazaqstan» ۇلتتىق تەلەارناسىنىڭ ءجۋرناليسى وڭعار توقانوۆ يەلەندى. الەۋمەتتىك جەلىلەردە «تاۋەلسىز قازاقستاننىڭ دامۋىنا قوسقان مەنىڭ ۇلەسىم» تاقىرىبى بويىنشا بايقاۋعا قاتىسىپ, ەڭ ۇزدىك پوست جازعان بەلسەندى پايدالانۋشىلار باعالى سىيلىقتار جانە ديپلومدارمەن ماراپاتتالدى.
اعىمداعى جىلدىڭ ماۋسىمىندا «رۋحاني جاڭعىرۋ» باعدارلاماسى اياسىندا قحا «قازاقتانۋ» مادەني-اعارتۋشىلىق جوباسىن جۇزەگە اسىردى. وسى ورايدا مەملەكەتتىك ءتىلدىڭ قولدانىلۋ اياسىن كەڭەيتۋ جانە «قازاقتانۋ» جوباسىنا اقپاراتتىق قولداۋ بىلدىرگەنى ءۇشىن قحا تاعايىنداعان گران-پري جۇلدەسى فيلولوگيا عىلىمدارىنىڭ كانديداتى كامال الپەيىسوۆاعا تابىستالدى.
ايتا كەتۋ كەرەك, قوعامدىق كەلىسىم مەن جالپىۇلتتىق بىرلىك سالاسىنداعى مەدياتسيا ينستيتۋتتارىن دامىتۋعا كومەكتەسۋ ماقساتىندا قوعامدىق مەدياتورلار اراسىنداعى ۇيىمداستىرىلعان بايقاۋدىڭ جەڭىمپازدارى انىقتالدى. باتىسقازاقستاندىق قۇرمان بيسەعاليەۆ «ەڭ ۇزدىك مەدياتور», پاۆلودار وبلىسى اكىمدىگىنىڭ «قوعامدىق كەلىسىم» كمم ورتالىعىنىڭ مەڭگەرۋشىسى ولگا نيكولاشينا جەتەكشىلىك ەتەتىن كابينەت «ەڭ ۇزدىك مەدياتسيا كابينەتى» دەپ تانىلدى.
اقمارال اعزامقىزى,
«ەگەمەن قازاقستان»
سۋرەتتەردى تۇسىرگەن ەرلان ومار
