كارتيناعا ايەلدەرىنەن اجىراسۋعا بەل بۋعان ءتورت دوستىڭ باسىنان وتكەن شىتىرمان وقيعالارى ارقاۋ بولادى. اجىراماس دوستار وسىندايدا بىرگە جۇرسەك, وتباسىلىق كيكىلجىڭدى ۇمىتىپ, قالاعانىمىزشا راحاتتانىپ ءومىر سۇرەمىز دەپ ويلاعان ەدى. ايتكەنمەن, بۇل جولى ءبارى ولار ويلاعانداي بولماي شىقتى.
جاڭا كومەديانىڭ باس پروديۋسەرلەرى قايرات رەيموۆ پەن باعدات قوجاحمەتوۆ. باستى رولدەردە ءسابيت راحيمباەۆ, داۋت شايحيسلاموۆ, ازيم سايدباەۆ, داريعا بادىكوۆا, نۇرداۋلەت شەرتىم, ناتاليا ۆالكوۆا, داريا الەكساندروۆا, نۇرگۇل الپىسباەۆا وينادى. ال جوبانىڭ رەجيسسەرى ءارى ستسەناريدىڭ قوسالقى اۆتورى انۆار ماتجانوۆ دا فيلمدە رولدەن تىس قالماعان.
سونىمەن قايرات رەيموۆ پەن باعدات قوجاحمەتوۆتىڭ تىرناقالدى پروديۋسەرلىگىن باعالاپ, قولداۋ كورسەتۋ ءۇشىن العاشقى كورسەتىلىمگە كينو مەن شوۋ-بيزنەستىڭ وكىلدەرى جينالدى. ولاردىڭ اراسىندا ساكەن مايعازيەۆ, اقان ساتاەۆ, اينۇر ءىلياسوۆا, تاۋەكەل ءمۇسىلىم, فارحات ءابدىرايىموۆ, داريا الەكساندروۆا, الىشەر ەلىكباەۆ سىندى جاندار بار.
«كومەديالىق فيلم قىزىقتى جاعداياتتار ارقىلى وتباسىلىق قۇندىلىقتاردى دارىپتەپ, كۇيبەڭ تىرلىك پەن وتباسىلىق ءومىردىڭ باسقا دا قيىندىقتارىن جەڭىل قابىلداۋعا شاقىرادى. سونىمەن بىرگە, «گۋدباي, موي باي» ءفيلمى قازىرگى قوعامداعى الەۋمەتتىك ماڭىزى بار باستى ماسەلەلەردى كوتەرەدى», – دەيدى كومەديالىق ءفيلمنىڭ باستى ءرولىن سومداۋشىلاردىڭ ءبىرى ءسابيت راحيمباەۆ.
ءبىر سوزبەن ايتقاندا, اۆتورلارى ءفيلمنىڭ تابىستى بولاتىنىنا سەنىمدى. سەبەبى, قازاقستاندىق كينوپروكاتقا جاڭادان قوسىلعان بۇل تۋىندى بۇعان دەيىن «31 ارنادا» ۇلكەن سۇرانىسقا يە بولعان «جەناتيكي» تەلەحيكاياسىنىڭ جەلىسىمەن تۇسىرىلگەن.
«مەن ءۇشىن «گۋدباي, موي باي» جوباسى تولىعىمەن دەبيۋت سانالادى. كومەديانى جىلى قابىلدادى. بۇل جولى كورەرمەننىڭ ءۇمىتىن اقتادىق. فيلم كەلگەندەردىڭ ءبارىن ريزاشىلىققا بولەدى. كارتينا ارقىلى كورەرمەن جۇرەگىنە جول تاپقان ومىرشەڭ ءازىل زالداعىلاردى كۇلكىگە قارىق قىلدى. اسىرەسە, ەرلەر جاعىنىڭ قاتتى كۇلگەنىن بايقادىم. كەيىپكەرلەرگە قاراپ, وزدەرىن تانىعان بولار», – دەدى كومەديالىق ءفيلمىنىڭ رەجيسسەرى انۆار ماتجانوۆ.
فيلم اۆتورلارى كومەديا اياقتالعاندا كورەرمەندەردىڭ ورىندارىنان تۇرىپ, ۇزاق قوشەمەت كورسەتۋىن شىنايى دا جاقسى باعا دەپ قابىلدادى.
ايناش ەسالي,
«ەگەمەن قازاقستان»
الماتى
