كونفەرەنتسيادان ءبىر كۇن بۇرىن كەڭەس وداعىنىڭ باتىرى, اكادەميك, پەداگوگ, جازۋشى, قوعام جانە مەملەكەت قايراتكەرى مالىك عابدۋلليننىڭ كوكشەتاۋداعى مۋزەيىندە «مالىك عابدۋللين – قازاقتىڭ وقجەتپەسى» اتتى البوم-كىتاپتىڭ تۇساۋكەسەرى وتكىزىلدى.
تۇساۋكەسەر راسىمىندە اقمولا وبلىسىنىڭ اكىمى مالىك مىرزالين قۇتتىقتاۋ ءسوز سويلەپ, «مالىك عابدۋللين – قازاقتىڭ وقجەتپەسى» اتتى البوم-كىتاپتى باتىر اتىنداعى مۋزەيگە تابىس ەتتى. ودان ءارى «التىن كىتاپ» باسپا ءۇيىنىڭ ديرەكتورى ۆياچەسلاۆ تيتەنوۆ, قوعام قايراتكەرى, جازۋشى-دراماتۋرگ, «اقمولا-«تىرشىلىك» سەرىكتەستىگىنىڭ ديرەكتورى جابال ەرعاليەۆ جانە مۋزەي ديرەكتورى قۇدايبەرلى مىرزابەك ءسوز سويلەپ, بۇل شارانىڭ مالىك عابدۋلليننىڭ ەسىمىن ەل ەسىندە ساقتاۋ باعىتىندا جاسالعان يگى قادام ەكەندىگىن ايتىپ, جىلى لەبىزدەرىن ءبىلدىردى.
وسىناۋ ايتۋلى ەڭبەكتە باتىردىڭ ءومىرى مەن شىعارماشىلىعى, قوعامدىق قىزمەتى جانە م.عابدۋللين مۋزەيىنىڭ ەكسپوزيتسيالىق زالدارى تۋرالى تولىق ماعلۇمات بەرىلگەن. البوم-كىتاپ الماتى قالاسىنداعى «التىن كىتاپ» باسپاسىنان 1000 دانامەن جارىق كوردى.
كەلەسى كۇنى كونفەرەنتسياعا قاتىسۋشىلار باتىردىڭ ەسكەرتكىشىنە گۇل شوقتارىن قويىپ, تاعزىم ەتتى. كونفەرەنتسيا جۇمىسىنا قازاقستان رەسپۋبليكاسىنىڭ بەدەلدى قوعام قايراتكەرلەرى, عالىمدار مەن ەلىمىزدىڭ الدىڭعى قاتارلى جوعارى وقۋ ورىندارىنىڭ عىلىمي قىزمەتكەرلەرى مەن ستۋدەنتتەرى قاتىستى. ينستيتۋت باسشىسى, تەحنيكا عىلىمدارىنىڭ دوكتورى سىرىم ءشارىپحانوۆ كونفەرەنتسيانى اشىپ, جۇرگىزىپ وتىردى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عالىمدارى قارجاۋباي سارتقوجا مەن جامبىل ارتىقباەۆ ەرلىك ۇلگىسىمەن, سول ەرلىكتى جاساعان قايتپاس قايسار ەرلەر تۋرالى تۇششىمدى باياندامالار جاسادى.
كونفەرەنتسيانىڭ ەكىنشى جارتىسىندا سەكتسيالىق وتىرىستار وتكىزىلدى. جۇمىس قورىتىندىسى بويىنشا شەشىم قابىلدانىپ, قاتىسۋشىلارعا سەرتيفيكاتتار تابىس ەتىلدى. بۇل ءبىر ەرلىككە ۇندەيتىن, ەل حالقىن جاڭا قازاقستاندىق پاتريوتيزمگە باۋليتىن ونەگەسى مول شارا بولدى.
بايقال ءبايادىل,
«ەگەمەن قازاقستان»
اقمولا وبلىسى
