ءىس-شاراعا پرەزيدەنت اكىمشىلىگىنىڭ, جوعارعى سوتتىڭ, قۇقىق قورعاۋ ورگاندارىنىڭ باسشىلارى, پارلامەنت دەپۋتاتتارى, ەقىۇ/دياقب, ەىدۇ جانە ەۋروپا كەڭەسى ۆەنەتسيا كوميسسياسىنىڭ ساراپشىلارى, سونداي-اق ۇكىمەتتىك ەمەس قۇقىق قورعاۋ ۇيىمدارىنىڭ وكىلدەرى مەن جاقىن جانە الىس شەتەلدەردىڭ عالىمدارى قاتىستى.
قۇتتىقتاۋ سوزىندە ق.ءمامي قۇقىقتىق مەملەكەتتىڭ اجىراعىسىز ەرەكشە بەلگىلەرىنىڭ ءبىرى تاۋەلسىز سوت بيلىگى ەكەنىن اتاپ ءوتتى. وسى جىلدار ىشىندە سوت جۇيەسىن رەفورمالاۋ ەلدىڭ كونستيتۋتسياسى مەن باعدارلامالىق قۇجاتتارىنا سايكەس جۇرگىزىلدى.
2001 جىلدان باستاپ قازاقستان تمد كەڭىستىگىندە سۋديالاردى كونكۋرس ارقىلى تاعايىنداۋ ءراسىمىن العاشقى بولىپ ەنگىزدى. 2016 جىلى كونستيتۋتسياعا بۇرىن قابىلدانعان تۇزەتۋلەرگە سايكەس جوعارى سوت كەڭەسىنىڭ مارتەبەسى كوتەرىلىپ, ونىڭ مۇشەلىگى مەن وكىلەتتىكتەرى كەڭەيتىلدى.
– قازاقستاندا قابىلدانعان كەشەندى شارالار ناتيجەسىندە مەملەكەتتىك بيلىكتىڭ ادام قۇقىقتارى مەن بوستاندىقتارىن قورعايتىن دەربەس جانە سەنىمدى سوت تارماعى قالىپتاستى. ول لايىقتى سۋديالار كورپۋسىن قالىپتاستىرۋعا جانە ونىڭ قۇرامىنا كەزدەيسوق ادامداردىڭ كىرۋ ىقتيمالدىلىعىن بارىنشا ازايتۋعا ىقپال ەتتى, – دەدى ق.ءمامي.
سونىمەن بىرگە قازىرگى زامانعى سىن-قاتەرلەر سوت قوعامداستىعى الدىندا جاڭا مىندەتتەر قويۋدا. بۇل ۇزدىكسىز پروتسەستە بەلگىلەنگەن رەفورمالاردىڭ جۇيەلىلىگىن ساقتاعان ماڭىزدى.
وسىعان بايلانىستى جوعارى سوت كەڭەسىنىڭ قۇرامىن سۋديالار مەن زاڭ قوعامداستىعىنىڭ وكىلدەرىنىڭ ەسەبىنەن ودان ءارى كەڭەيتۋ ويعا قونىمدى.
حالىقارالىق ستاندارتتاردىڭ نەگىزگى تالاپتارى – وسىنداي مەكەمەلەردىڭ قۇرامىندا ءارتۇرلى ينستانتسيالاردىڭ سۋديالارى باسىم بولۋعا ءتيىس.
– سۋديالاردى ىرىكتەۋ مورالدىق قاسيەتتەرى مەن كاسىبي بىلىكتىلىگىنە بايلانىستى وبەكتيۆتى جانە اشىق ولشەمشارتتار نەگىزىندە جۇرگىزىلۋگە ءتيىس, – دەپ قورىتىندىلادى ءسوزىن كونستيتۋتسيالىق كەڭەس توراعاسى.
