بيىلعى شارا اياسىندا دا الەمدىك كينەماتوگرافياداعى تاڭداۋلى تۋىندىلار كورسەتىلەدى. وتاندىق كينووندىرىس تۋىندىلارى ءۇشىن دايىندالعان ارنايى باعدارلاما دا جۇيەلەنگەن. ەڭ باستىسى, بيىل تۇركىتىلدەس مەملەكەتتەردىڭ كينولارىنا باسا نازار اۋدارىلادى.
فەستيۆالدىڭ اشىلۋ سالتاناتىنا قر مادەنيەت جانە سپورت ءمينيسترى ارىستانبەك مۇحامەدي ۇلى قاتىستى. كينوفەستيۆالگە قولداۋ بىلدىرگەن الماتى قالاسى اكىمدىگىنىڭ اتىنان ءسوز العان شاھار باسشىسىنىڭ ورىنباسارى ارمان قىرىقباەۆ: «جاڭا فەستيۆالدىڭ نەگىزگى ميسسياسى – ورتالىق ازيانىڭ جۇرەگى قازاقستاندا تۇركى الەمىنىڭ كينەماتوگرافيستەرىن بىرىكتىرۋ. تاريحي تۇرعىدان العاندا بۇل تولىعىمەن اقتالعان قادام, سەبەبى تۇركىتىلدەس حالىقتاردىڭ مادەني ديالوگى ىقىلىم زاماننان بەرى جالعاسىپ كەلەدى. ەندىگى كەزەكتە وسى ديالوگتى جاڭا, ساپالى دەڭگەيدە دامىتۋ قاجەتتىلىگى تۋىنداپ وتىر. وسىنداي ۇستانىمى بار XIV حالىقارالىق شاكەن ايمانوۆ كينوفەستيۆالى ءبىزدىڭ قالامىزدىڭ مادەني ومىرىندەگى جارقىن ءارى قىزىقتى وقيعا بولاتىنىنا سەنىمدىمىن», - دەدى.
م.اۋەزوۆ اتىنداعى دراما تەاترىنىڭ الدىنا توسەلگەن قىزىل كىلەممەن الەمدىك جانە قازاقستاندىق كينەماتوگرافيانىڭ تانىمال جۇلدىزدارى ءجۇرىپ ءوتتى. ولاردىڭ ىشىندە اۋعان رەجيسسەرى, «التىن گلوبۋس» سىيلىعىنىڭ يەگەرى سيدديك بارماك, «Miramax» كينوكومپانياسىنىڭ ۆيتسە-پرەزيدەنتى, پروديۋسەر روزان كورەنبەرگ, گولليۆۋدتىڭ شەتەلدىك ءباسپاسوز قاۋىمداستىعىنىڭ (HFPA) شەتەل تىلدەرىندەگى فيلمدەر كوميتەتىنىڭ توراعاسى («التىن گلوبۋس») سەرگەي راحلين, رەسەيلىك تەاتر جانە كينو اكتريساسى روزا حايرۋللينا, تۇرىك اكتەرى سەردار گەكحان, الەمدىك كينوجۇلدىز كاتايۋن بەگلاري, قازاقستاندىق رەجيسسەر, ستسەناريست سەرىك اپىرىموۆ جانە تاعى باسقالارى بولدى.
قىرعىز ەلىنىڭ بۇگىنگى تاڭداعى ەڭ تانىمال كينورەجيسسەرلەرىنىڭ ءبىرى سادىق شەر-نياز: «تۇركى دۇنيەسى دەگەن نە نەمەسە كىم؟ تۇركى دۇنيەسى دەگەن – ومار حايامنىڭ دۇنيەسى, ءابۋ يبن سينانىڭ دۇنيەسى, ۇلىقبەكتىڭ دۇنيەسى, نازىم حيكمەتتىڭ, ابايدىڭ, مۇحتار اۋەزوۆتىڭ, شىڭعىس ايتماتوۆتىڭ دۇنيەسى. بۇگىنگى كۇنى وسىلاردىڭ ءبارى دە شىعارماشىلىق نىساندارعا, ناسيحاتقا سۋساپ تۇر. ءبىز باسقا مادەنيەتكە بەت بۇرىپ كەتتىك»دەپ تۇركى ەلدەرىنىڭ كينوسىنا باسىمدىق بەرىپ وتىرعان بيىلعى فەستيۆالدىڭ جاڭالىعىن قۇپ العانىن قۋانا جەتكىزدى.
كينوفەستيۆال 21 قاراشاعا دەيىن جالعاسادى. حالىقارالىق دەڭگەيدەگى شارانىڭ شەڭبەرىندە ءار ءتۇرلى شىعارماشىلىق كەزدەسۋلەر, دوڭگەلەك ۇستەلدەر, كونفەرەنتسيالار مەن شەبەرلىك دارىستەرى ۇيىمداستىرىلماق.
ايگۇل احانبايقىزى,
«ەگەمەن قازاقستان»
الماتى
