كەش شىمىلدىعىن دەپارتامەنت باسشىسى نۇرگۇل جاننازاروۆا اشتى. ونىڭ ايتۋىنشا, قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى «بولاشاققا باعدار – رۋحاني جاڭعىرۋ» باعدارلاماسىنىڭ «وزگەرىستەردى وزىڭنەن باستا» كىشى باعدارلاماسىن وڭىرىمىزدە جۇزەگە اسىرىلۋىن ۇيلەستىرەتىن ورگان بولىپ تابىلادى.
ونىڭ ماقساتى - مەملەكەتتىك ورگانداردىڭ ۇيىمداستىرۋشىلىق مادەنيەتىن جەتىلدىرۋ جانە 2030 جىلعا دەيىن مەملەكەتتىك قىزمەتشىلەردىڭ مىنەز-قۇلقىنىڭ مودەلىن وزگەرتۋ.
كەزدەسۋدە سىبايلاس جەمقورلىقپەن كۇرەس, ادالدىق, مادەنيەتتى قالىپتاستىرۋ, ۇلكەنگە قۇرمەت, كىشىگە ىزەت ءبىلدىرۋ, مەملەكەتتىك قىزمەتشىلەردىڭ ءتارتىبى, قازاق ادەبيەتىنىڭ دامۋى, ءبىلىم سالاسىنداعى رەفورمالار جانە ت.ب. ماسەلەلەر ءسوز بولدى.
-مەنىڭ ويىمشا كەز-كەلگەن مەملەكەتتىك قىزمەتشى الدىمەن مەملەكەت مۇددەسىن بيىك قويسا, كوزدەگەن ماقساتىنا جەتەدى. ەڭ باستىسى ارى تازا بولسا, ەڭسەسىن كوتەرىپ جۇرە الادى. راس, بۇگىندە مەملەكەتتىك قىزمەتشىلەردىڭ ءتۇرلى سىنعا ۇشىرايتىنى تۋرالى ءجيى ەستيمىز. بىراق بارلىعىنا بىردەي كۇيە جاعۋعا بولمايدى, ءوز ىسىنە ادال قىزمەتكەرلەر دە بار. ەڭ باستىسى ادال قىزمەت ەتىپ, تۋىنداعان سۇراقتار بويىنشا ءادىل شەشىم شىعارىپ, ادامگەرشىلىك قاسيەت مەملەكەتتىك قىزمەتشىنىڭ بويىنان تابىلۋىن تىلەيمىن, دەدى اقىن.
اقىنمەن بولعان كەزدەسۋدەن مەملەكەتتىك قىزمەتشىلەر ۇلكەن اسەر العاندىعى ءسوزسىز. كورەرمەندەردىڭ قوناقكادە بولسىن دەگەن ءوتىنىشىن جەرگە تاستاماعان داۋلەتكەرەي كاپ ۇلى دومبىراسىن قولىنا الىپ, جىردان شاشۋ شاشتى.
كەزدەسۋگە كەلگەندەر ايتىسكەر اقىنعا سۇراقتار قويىپ, شىعارماشىلىعىنا, جەكە ومىرىنە قاتىستى ماعلۇماتتارمەن قانىعىپ, سىبايلاس جەمقورلىققا قاتىستى كوزقاراسىن ءبىلدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
