حالىقارالىق دەڭگەيدە وتكەن جيىنعا «نەۆادا-سەمەي» حالىقارالىق انتيادرولىق قوزعالىسىنىڭ توراعاسى, اقىن ولجاس سۇلەيمەنوۆ قاتىستى. فورۋمدا ءسوز العان مارتەبەلى مەيمان قازاقستانداعى انتيادرولىق قوزعالىستىڭ باستالۋىنا 1989 جىلدىڭ 19 قازانىندا قاراعاندى كەنشىلەرىنىڭ جاپپاي ەرەۋىلگە شىعۋى مۇرىندىق بولعانىن اتاپ ءوتتى. «ەندى, مىنە, 30 جىل بۇرىنعىداي قاراعاندى, قارمتۋ وزگە وبلىستاردىڭ ىشىندە العاشقى بولىپ, بۇل فورۋمدى ۇيىمداستىرىپ وتىر», دەدى و.سۇلەيمەنوۆ.
انتيادرولىق قوزعالىستىڭ بەلسەندىسى, اتوم جوباسىنىڭ قۇرمەتتى ەلشىسى, سۋرەتشى كارىپبەك كۇيىكوۆ وتكەن كۇندەردى ەسكە الىپ, ءوزىنىڭ تۋعان جەرىندە جاسالعان سىناق جارىلىستارىنان قاراپايىم حالىقتىڭ قانداي زارداپ شەككەنىن ايتتى. «ونداعان جىلدار بويى جاسالىپ كەلگەن يادرولىق سىناقتار قازىر تىيىلسا دا, ادامدار ءالى كۇنگە دەيىن جارىلىستاردىڭ زارداپتارىن ويلاپ, قاتتى ۋايىمدايدى», دەدى ول. ءسوزىنىڭ اياعىندا ول بۇگىنگى جاستاردىڭ ەستافەتانى قولعا نىق الىپ, اعا بۋىن وكىلدەرى باستاعان ءىستى لايىقتى جالعاستىرارىنا سەنىم ءبىلدىردى.
جيىن بارىسىندا سونداي-اق تاۋەلسىز قازاقستاننىڭ تۇڭعىش سىرتقى ىستەر ءمينيسترى, ساياسي عىلىمدار دوكتورى, قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ پروفەسسورى ت.سۇلەيمەنوۆ, پاۆلودارداعى «سامال» ساۋىقتىرۋ ورتالىعىنىڭ ديرەكتورى ز.باگنەنكو جانە باسقالار مازمۇندى بايانداما جاسادى.
قايرات ءابىلدا,
«ەگەمەن قازاقستان»
قاراعاندى
