قايسار ءالىم 55 جىل بويى قازاق جۋرناليستيكاسىنىڭ قازانىندا قاينادى, سونىڭ ىشىندە «ەگەمەن قازاقستاندا» دا قىزمەت ەتتى, ادەبي شىعارمالارى دا وقىرمانىن تاپتى. قايساردىڭ قازاق ادەبيەتىندەگى قارىمدى قالامگەر ءازىلحان نۇرشايىقوۆپەن 34 جىل بويى جازىسقان حاتتارى ەپيستوليارلىق جانرداعى ەلەۋلى شىعارما بولىپ تابىلادى. سونىمەن قاتار ول – جۋرناليستيكا كوزمايىن تاۋىسىپ وقۋدى, ماڭدايتەرىن ءسۇرتىپ ءجۇرىپ جازۋدى قاجەت ەتەتىن ماماندىق ەكەنىن زامانداستارىنا دالەلدەگەن, ەڭبەكقورلىعى كەيىنگىگە ۇلگى بولاتىن قالامگەر.
كەشتە الدىمەن قايسار ءالىم تۋرالى ارنايى جاسالعان دەرەكتى فيلم كورسەتىلدى. قوستاناي وبلىسى مادەنيەت باسقارماسىنىڭ باسشىسى ەرلان قالماقوۆ قالامگەردى قۇتتىقتاپ, يىعىنا شاپان جاپتى. ارقالىق قالاسى, امانگەلدى, جانكەلدين اۋداندارى اكىمشىلىكتەرىنىڭ وكىلدەرى دە قالامگەرگە تۋعان جەردىڭ سالەمىن جەتكىزدى.
وسى كەشكە ارنايى كەلگەن بەلگىلى ەكونوميست عالىم, پروفەسسور سايلاۋ بايزاقوۆ ىنىسىنە رياسىز تىلەگىن ايتسا, اقىن قورعانبەك امانجول قايسار ءالىمنىڭ شىعارمالارىنا ارنايى توقتالدى.
– مىرجاقىپتىڭ سۇيەگىن الىپ كەلۋى, كەيكى باتىردىڭ باس سۇيەگىن اكەلۋگە قاتىسۋى سياقتى قوعامدىق-ازاماتتىق ىستەردى اتقارا ءجۇرىپ, ونى مولدىرەتە جازىپ, وقىرمانعا جەتكىزۋىن, باسقا پۋبليتسيستيكالىق, ادەبي شىعارمالارىن بىلاي قويعاندا, ءازىلحان نۇرشايىقوۆپەن 34 جىل ۇدايى حات جازىسۋى – ۇلكەن ەڭبەك, قازاق ادەبيەتىندە ەپيستوليارلىق جانردى قايسەكەڭ شەگەلەدى دەۋگە نەگىز سالادى, – دەدى قورعانبەك امانجول.
مۇنان كەيىن ءسوز العان قايسار ءالىمنىڭ قوستانايلىق ارىپتەستەرى, اقىن جولبارىس بايازيد, جازۋشى عۇمار احمەتچين جانە تاعى باسقالار ونىڭ پۋبليتسيستيكاسى مەن ماڭىزى جوعالمايتىن, ۋاقىت شەجىرەسى بولىپ قالاتىن شىعارمالارعا جوعارى باعا بەردى.
كەش سوڭىندا قايسار ءالىم ءوزىن قالامگەر رەتىندە قاناتتاندىرعان قوستانايعا كەلىپ, جەرلەستەرىمەن قاۋىشقانىنا, مەرەيتويىنا وراي وقىرماندارىمەن كەزدەسكەنىنە ريزاشىلىعىن ءبىلدىردى. قازاققا ءىرى اقىندار مەن عالىمداردى بەرگەن قۇتتى جەر – قىزبەلى تۋرالى تەبىرەنە سويلەدى. جۇرەگىندە تۋعان جەرگە دەگەن ماحابباتتى الاقانىندا ايالاعان شىراقتاي سوندىرمەي ۇستاۋ ادام رۋحىنىڭ جوعارىلىعى مەن تازالىعىن بىلدىرسە كەرەك. ال 1965 جىلى جاس قايسار كۇندەلىگىنىڭ بىرىندە: ء«بىر تۇسىنەتىنىم – ساعىنىش دەگەن جان دەرتى ەكەن, سول دەرتتى شاقىراتىن اڭسارلى اۋىلىڭ ەكەن. يە, جاراتىلىسى بولەك اۋىلىم مەنىڭ!» دەپ جازىپتى.
– تۋعان جەر دەگەندە الدىمەن قىزبەلدى ايتامىن. قوستانايدا قانشا اۋىل بار, سونىڭ بىرىندەي عانا كىشكەنە مەنىڭ قىزبەلىمنەن الاشتىڭ قانشاما ارىستارى تۇلەپ ۇشقان. مىرجاقىپ دۋلاتوۆ, سەيدازىم قادىرباەۆ, الماعامبەت قاسىموۆ, اسقار زاكارين, الەمگە بەلگىلى اكادەميكتەر فازىلحان بايىمبەتوۆ, سايلاۋ, ءسابيت بايزاقوۆتار – مەنىڭ اۋىلىمنىڭ ماڭگى ماقتانىشتارى! مەن قوستاناي وڭىرىندە بولىپ جاتقان جاڭارۋ, رۋحاني جاڭعىرۋلارعا, وبلىس اكىمى ارحيمەد مۇحامبەتوۆتىڭ باسشىلىعىمەن سوڭعى جىلدارى جۇزەگە اسىپ جاتقان ەكونوميكالىق تابىستارعا قۋانامىن. سىزدەرمەن قاۋىشۋ قالامگەر ءۇشىن باقىت, سونى مەن دە سەزىنىپ تۇرمىن», دەدى قالامگەر جەرلەستەرىنە.
كەشتى وبلىستىق فيلارمونيانىڭ انشىلەرى ماناپبەك قادىروۆ پەن تالعات مولداعاليەۆ انمەن ورنەكتەپ وتىردى. ءى.وماروۆ اتىنداعى قازاق دراما تەاترىنىڭ ارتىستەرى قايسار ءالىم شىعارمالارىنان ۇزىندىلەر ورىندادى.
ءنازيرا جارىمبەت,
«ەگەمەن قازاقستان»
قوستاناي
