باستاۋىش پارتيا ۇيىمدارىنىڭ قىزمەتىن جانداندىرۋدىڭ ءتيىمدى جولدارى مەن تەتىكتەرىن تالقىلاۋ ماقساتىندا ۇيىمداستىرىلعان فورۋمنىڭ اشىلۋىندا «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ بارشا قاتىسۋشىلارعا ساتتىلىك تىلەپ, فورۋمنىڭ ماڭىزىنا توقتالدى. «ەلباسى بىزگە پارتيا قىزمەتىن جۇيەلى جاڭعىرتۋدى تاپسىرعانىن بىلەسىزدەر. باستاۋىش پارتيا ۇيىمدارىنىڭ تيىمدىلىگىن ارتتىرۋ – سول جۇمىستىڭ باستى باعىتتارىنىڭ ءبىرى. سوندىقتان سوڭعى ايلاردا وسى سالادا ايتارلىقتاي جۇمىستار اتقارىلىپ, شىمكەنت, قاراعاندى, پاۆلودار جانە اقتوبە قالالارىندا باستاۋىش ۇيىمداردىڭ ءتورت بىردەي ايماقتىق فورۋمى ءوتتى. سونىڭ قورىتىندىسى رەتىندە بۇگىن رەسپۋبليكالىق فورۋمدا باس قوسىپ وتىرمىز. وسىنداي يگى باستامالار باستاۋىش پارتيا ۇيىمدارىنىڭ جۇمىسىن زامان تالاپتارىنا ساي جەتىلدىرىپ, ولاردىڭ تيىمدىلىگىن ارتتىرا تۇسەتىنى ءسوزسىز», – دەدى م.اشىمباەۆ.
سونداي-اق ول فورۋم بارىسىندا ايتىلعان وزەكتى پىكىرلەردى ءاربىر نۇروتاندىق ءتيىمدى پايدالانۋ كەرەكتىگىنە نازار اۋداردى. «بۇگىنگى ءىس-شارانى تاجىريبە الماساتىن, تولعاندىرىپ جۇرگەن ساۋالدارعا جاۋاپ الاتىن پىكىر الماسۋ الاڭى رەتىندە قاراستىرعان ابزال. سوندىقتان بارشاڭىزدى اشىق جانە ەركىن ديالوگقا شاقىرامىز», – دەدى م.اشىمباەۆ.
جيىندا قوعامدىق دامۋ ءمينيسترى دارحان كالەتاەۆ ەلىمىزدە اۋىلدى جانداندىرۋ ماقساتىندا ارنايى جول كارتاسى ازىرلەنگەنىن جەتكىزدى. سول ءۇشىن «رۋحاني جاڭعىرۋ» باعدارلاماسى اياسىندا بەكىتىلگەن التى باعىتقا جەتىنشىسى قوسىلىپ, «اۋىلىم – التىن بەسىگىم» اتتى ارنايى باعىت ەنگىزىلمەك. سونداي-اق مينيستر الداعى «جاستار جىلىنا» ارنالعان ارنايى جول كارتاسى دا دايىندالعانىن اتاپ ءوتتى.
ال ۇلتتىق ەكونوميكا ءمينيسترى تيمۋر سۇلەيمەنوۆ «7-20-25» تۇرعىن ءۇي باعدارلاماسى بويىنشا اتقارىلىپ جاتقان جۇمىستارعا كەڭىنەن توقتالىپ, فورۋمعا قاتىسۋشىلاردىڭ ساۋالدارىنا جاۋاپ بەردى.
ءوز كەزەگىندە ءبىلىم جانە عىلىم ۆيتسە-ءمينيسترى اسحات ايتماعامبەتوۆ ەلباسى جولداۋىندا ايتىلعان «پەداگوگ مارتەبەسى تۋرالى» زاڭ اياسىندا مۇعالىمدەردىڭ جۇكتەمەسى ازاياتىنىن ايتتى. سونداي-اق ول بەس الەۋمەتتىك باستامانىڭ ءۇشىنشى باعىتى – قولجەتىمدى جانە ساپالى جوعارى ءبىلىم مەن ستۋدەنتتەردىڭ جاتاقحاناداعى جاعدايىن جاقسارتۋ بويىنشا قولعا الىنعان ناقتى ىستەرگە نازار اۋداردى.
جالپى, باستاۋىش پارتيا ۇيىمدارى – جەرگىلىكتى جەرلەردە پارتيا ساياساتى مەن ونىڭ ستراتەگيالىق مىندەتتەرىن جۇزەگە اسىرىپ, حالىقپەن جانە ءاربىر نۇروتاندىقپەن ەتەنە جۇمىس ىستەيتىن پارتيالىق قۇرىلىم. بۇگىندە پارتيانىڭ 6 مىڭعا جۋىق باستاۋىش ۇيىمى بار. سونىڭ ىشىندە 1000-نان استام مۇشەسى بار 104 ءىرى باستاۋىش ۇيىم تىركەلگەن. پارتيا قىزمەتىن جاڭعىرتۋ اياسىندا جۇرگىزىلگەن ساراپتامالار ناتيجەسىندە باستاۋىش ۇيىمداردىڭ پارتيا فيليالدارىمەن جانە ورتالىق اپپاراتپەن بايلانىسى جۇيەلى جولعا قويىلماعانى, باستاۋىش ۇيىمدار دەڭگەيىندە جۇزەگە اسىرىلاتىن ناقتى جوبالاردىڭ بولماۋى, ولاردى قارجىلاي قولداۋدىڭ رەتسىزدىگى جانە ماتەريالدىق-تەحنيكالىق جابدىقتالۋىنىڭ كوڭىل كونشىتپەيتىنى سياقتى بىرقاتار وزەكتى ماسەلەلەر انىقتالعان. وسى تۇيتكىلدەردى ءتيىمدى شەشۋ جولدارى باستاۋىش پارتيا ۇيىمدارىنىڭ جۇمىسىن جانداندىرۋ تۇجىرىمداماسىندا ايقىن كورسەتىلگەن.
فورۋم دەلەگاتتارى اتالعان تۇجىرىمدامادا قامتىلعان ماسەلەلەردى پانەلدى سەسسيالاردا كەڭىنەن تالقىلادى. ماسەلەن, «پارتياىشىلىك مەنەدجمەنت» سەسسياسىندا قاتىسۋشىلار پارتيا جۇمىسىنداعى زاماناۋي تەحنولوگيالار, سونىڭ ىشىندە ىشكى بيزنەس ۇدەرىستەرىن اۆتوماتتاندىرۋ, ە-اناليتيكا جۇيەسىن ەنگىزۋ, جوبالىق ءتاسىل جانە باستاۋىش ۇيىمداردىڭ ءوز جوبالارىن جۇزەگە اسىرۋ سياقتى پارتيا قىزمەتىن جانداندىراتىن ۇتىمدى تۇستاردى قاراستىردى. وسى ماسەلە جونىندە شەتەلدىك ساراپشى, تۇركيانىڭ ادىلەت جانە دامۋ پارتياسىنىڭ شىعىس انادولى وڭىرىندەگى ۇيلەستىرۋشىسى ماحمۇت سامي ماللى كەڭىنەن ءسوز قوزعاپ, شەتەلدىك تاجىريبەگە توقتالدى. كەلەسى سەسسيادا قاتىسۋشىلار پارتيانىڭ كادرلىق رەزەرۆىن قالىپتاستىرۋداعى جاڭا ءادىس-تاسىلدەرگە نازار اۋداردى. بۇل سەسسيادا رەسەيدىڭ «ەدينايا روسسيا» پارتياسىنىڭ دەپارتامەنت باسشىسى ن.فينكو كادرلىق رەزەرۆ قالىپتاستىرۋدىڭ حالىقارالىق تاجىريبەسىنە نازار اۋداردى.
ء«تيىمدى كوممۋنيكاتسيا» دەپ اتالعان ءۇشىنشى سەسسيادا دەلەگاتتار پارتيا جاقتاستارىن ورتاق ماقساتتارعا جۇمىلدىرۋ, قوعامدىق پىكىرلەرگە بايلانىستى ارەكەت ەتۋ, قوعامدىق كۇن ءتارتىبىن قالىپتاستىرۋ سياقتى پارتيا جۇمىسىنداعى بازالىق مىندەتتەردى جۇزەگە اسىرۋ كەزىندەگى زاماناۋي كوممۋنيكاتسيانىڭ ءرولى جايىندا پىكىر الماستى. سونداي-اق قاتىسۋشىلار ۋكراينالىق ساياساتتانۋشى ۆسەۆولود زەلەنيننىڭ پىكىرلەرىن تىڭداپ, ءوز ساۋالدارىنا جاۋاپ الدى.
پانەلدى سەسسيا كەزىندە باستاۋىش ۇيىمداردىڭ جۇمىس تيىمدىلىگىنىڭ كورسەتكىشتەرى دە جان-جاقتى تالقىلانىپ, قاتىسۋشىلار ءوزارا بايلانىس, قارجىلاندىرۋ, جەرگىلىكتى جەردەگى ماسەلەلەردى دەر كەزىندە انىقتاۋ سياقتى بىرقاتار باسىمدىقتار بويىنشا ءوز پىكىرلەرىن ءبىلدىردى. ال بۇل جيىندا شەتەلدىك تاجىريبە جونىندە ۇلىبريتانيانىڭ ساياسي كونسالتينگ باعىتىندا قىزمەت كورسەتەتىن CSM كومپانياسىنىڭ اتقارۋشى ديرەكتورى, حالىقارالىق ساياسي كونسۋلتانت قاۋىمداستىعى ديرەكتورلار كەڭەسىنىڭ مۇشەسى ر.مەرفي ايتىپ بەردى.
رەسپۋبليكالىق فورۋم بۇگىن ءوز جۇمىسىن جالعاستىرادى.
جولدىباي بازار,
«ەگەمەن قازاقستان»
