قازاق-بريتان تەحنيكالىق ۋنيۆەرسيتەتىندە وتكەن ديكتانت جازۋعا الماتىنىڭ 8 اۋدانىنان اكىمشىلىك قىزمەتكەرلەر, جوعارعى وقۋ ورىندارىنىڭ, كوللەدجدەردىڭ وقىتۋشىلارى مەن ستۋدەنتتەرى, مەكتەپ مۇعالىمدەرى, جوعارى سىنىپ وقۋشىلارى جانە مەديتسينا سالاسىنىڭ قىزمەتكەرلەرى, ت.ب. قاتىستى.
لاتىن نەگىزدى قازاق ءتىلى ءالىپبيىنىڭ, «قازاق ءتىلى ەملەسىنىڭ نەگىزگى ەرەجەلەرى» جوباسىن ءىس-اجىريبەدە جان-جاقتى قامتۋمەن قاتار جاڭا ەرەجەگە بەيىمدەلۋدى ماقسات ەتەتىن ديكتانت جازۋ شاراسى ءتىلدى جىلدام مەڭگەرۋگە ۇندەيدى.
ديكتانت جازۋشىلارعا حالىقارالىق «قازاق ءتىلى» قوعامىنىڭ پرەزيدەنتى, اكادەميك ومىرزاق ايتباەۆ ءسات-ساپار تىلەپ, ەلىمىزدىڭ ءتىل ساياساتىنىڭ ماڭىزدىلىعىنا توقتالىپ, بارشا قاۋىمدى ءتىلىمىزدى دامىتۋعا شاقىردى.
الماتى قالاسى تىلدەردى دامىتۋ باسقارماسىنىڭ ءبولىم باسشىسى باقىت قالىمبەتتىڭ ايتۋىنشا, الماتى قالاسى بويىنشا جالپىحالىقتىق ديكتانتقا 120 مىڭ ادام قاتىسادى دەپ جوسپارلانعان. ديكتانت ناتيجەسىندە كىمنىڭ قانشالىقتى ساۋاتتى جازعاندىعىن انىقتاۋ باستى شارت ەمەس. ساۋاتتىلىقتى تەكسەرۋ ارنايى بەلگىلەنگەن ولشەم-شارتتار نەگىزىندە انىقتالادى.
ياعني, ءاربىر قاتىسۋشى وسى كەستەگە وراي ءوزى جازعان ءماتىندى ءوزى تەكسەرەدى. احمەت بايتۇرسىن ۇلى اتىنداعى ءتىلى ءبىلىمى ينستيتۋتى عالىمدارىمەن ازىرلەنگەن «جاڭا ءالىپبي نەگىزىندەگى قازاق ءتىلى ەملەسىنىڭ ەرەجەلەرى» جوباسىنىڭ ءالى دە تالقىلىناتىندىعىن جەتكىزگەن باقىت قالىمبەت بۇگىنگى شارانىڭ ماقساتى وسى جوبانىڭ قانشالىقتى جۇزەگە اسىپ جاتقاندىعىنا زەر سالۋ. ەگەر قازىرگى قولدانىستاعى الىپبيىمىزگە قاتىستى سىن-ەسكەرتپەلەر بولىپ جاتسا, ونىڭ بارلىعى دا عالىمدار تالقىسىنا تۇسەدى. ەملە ەرەجەسىمەن http://tilalemi.kz سايتىنان تانىسۋعا بولادى.
ديكتانت جازۋشىلار ءۇشىن اۋديو ماتىندە بەرىلگەن «جاڭا ءالىپبي – جاڭارۋدىڭ قاينارى. ءالىپبي ارقىلى ۇلتتىق سانا كۇشەيەدى. الەمدە بولىپ جاتقان جاڭالىقتار وسى جازۋ ارقىلى قابىلدانادى. سونداي-اق, بۇل ءالىپبي قازاق ءتىلىنىڭ ءتول تابيعاتىن ساقتاۋعا مۇمكىندىك بەرەدى» دەپ باستالاتىن «رۋحاني جاڭعىرۋ» تاقىرىبىندا 77 ءسوز قامتىلعان.
ديكتانت جازۋ تارتىبىنە سايكەس ءماتىن ءۇش مارتە قايتالانىپ وقىلىپ, ءاربىر دىبىستالۋعا ەرەكشە ءمان بەرىلدى. قاتىسۋشىلار ءۇشىن ءماتىندى مۇقيات تىڭداپ, جازىپ ءارى تەكسەرۋگە ارنايى ۋاقىت ءبولىندى.
ەلۆيرا سەرىكقىزى,
«ەگەمەن قازاقستان»
الماتى
