بيىلعى جىلعى بايقاۋ قازاقستاننىڭ تۇڭعىش پرەزيدەنتى – ەلباسى قورىنىڭ «جاسStar» شىعارماشىلىقپەن اينالىساتىن حالىقارالىق جاستار فەستيۆالى اياسىندا ۇيىمداستىرىلدى. قازاقستاننىڭ ونەرلى جاستارى ءۇشىن ماڭىزدى بولىپ سانالاتىن بايقاۋدىڭ اشىلۋ سالتاناتى كوللەدجدىڭ جاڭادان پايدالانۋعا بەرىلگەن ەرمەك سەركەباەۆ اتىنداعى زالىندا ءوتتى. كسرو حالىق ءارتىسى ءاسانالى ءاشىموۆ جاستارعا اق باتاسىن بەرىپ, قازاقستاننىڭ حالىق ارتىستەرى نۇرعالي ءنۇسىپجانوۆ, ناعيما ەسقاليەۆا, قازاقستاننىڭ ەڭبەك سىڭىرگەن ونەر قايراتكەرى ءجاميلا سەركەباەۆا بايقاۋدىڭ قۇرمەتتى قوناقتارى رەتىندە قاتىستى.
كونتسەرتتە بەلگىلى دومبىراشى اسىلبەك ەڭسەپوۆ, «سامۇرىق» بي ءانسامبلى, ءان ءبولىمىنىڭ ستۋدەنتتىك حورى, قوبىزشىلار ءانسامبلى, كۇي كۆارتەتى ونەر كورسەتىپ, زاماناۋي ادىسپەن باتىل وڭدەلگەن بەلگىلى ءان مەن كۇيلەردى شەبەرلىكپەن ورىنداپ شىقتى.
– «كوشپەندىلەر اۋەنى» بايقاۋى تالانتتى جاس ورىنداۋشىلاردى ورتاق شىعارماشىلىق ماقساتقا بىرىكتىرە الۋىمەن وركەندەپ كەلەدى,– دەدى كوللەدج ديرەكتورى, قازاقستاننىڭ ەڭبەك سىڭىرگەن قايراتكەرى ءبىرجان حاسانعاليەۆ.– بۇل بايقاۋ مۋزىكامىزداعى ۇلتتىق ءداستۇردى دامىتىپ قانا قويماي, جاس تالانتتاردىڭ قوعامدىق كەڭ اۋقىمدا تانىلۋىنا, قاناتىنىڭ قاتايۋىنا سەرپىن بەرەدى. سوندىقتان دا ءبىز جۇلدەگەرلەرگە بەرىلەتىن بارلىق اتالىمداردى «قۇرمانعازى», «قورقىت», «مۇحيت» دەپ اتاۋدى ءجون كوردىك, قازاق دالاسىنىڭ ەڭ ۇلى مۋزىكانتتارى اتىنداعى جۇلدەلەر جەڭىمپازداردى ءسوزسىز قاناتتاندىرا تۇسەدى. قازىلار القاسىنا دا بەلگىلى مۋزىكانتتار مەن پەداگوگتاردى تاڭدادىق. بەلگىلى مۋزىكا زەرتتەۋشىسى, كۇيشى ابدۋلحاميت رايىمبەرگەنوۆ, قازاقستاننىڭ ەڭبەك سىڭىرگەن ءارتىسى, پروفەسسور مەرۋەرت قالەنباەۆا, قازاقستاننىڭ ەڭبەك سىڭىرگەن قايراتكەرى, پروفەسسور ايگۇل قوسانوۆا جاس تالانتتاردىڭ ونەرىنە قازىلىق جاسادى.
بايقاۋدىڭ ەرەجەسى مەن تالابىنا سايكەس, ونەر باسەكەسىندە انىقتالعان ەڭ مىقتى جاس ورىنداۋشىلاردىڭ ۇستازدارىنىڭ ەسىمى دە ەسكەرۋسىز قالماي, جەڭىمپاز بولعان لاۋرەاتتىڭ نەمەسە ديپلومانتتىڭ قارجىلاي جۇلدەسىنىڭ جارتىسى ونى باپتاعان ۇستازىنا دا تيەسىلى بولۋى كوزدەلدى. «كوشپەندىلەر اۋەنى» بايقاۋىن ۇيىمداستىرۋ كوميتەتى وسىنداي ءتاسىل ارقىلى مۇعالىم مارتەبەسىن كوتەرۋ تۋرالى پرەزيدەنت ن.نازارباەۆتىڭ قازان ايىنداعى جولداۋىن ءىس جۇزىندە دالەلدەۋدى ءجون كوردى. بايقاۋ قورتىندىسى بويىنشا, دومبىراشىلار اراسىندا پ.چايكوۆسكي اتىنداعى الماتى مۋزىكا كوللەدجىنىڭ ستۋدەنتى ەرجانات جارقىننۇر ۇزدىك دەپ تانىلىپ, گران-ءپريدى يەلەندى. ونىڭ 300 000 جۇلدەسى ەكىگە ءبولىنىپ, 150 000 تەڭگەسىن ۇستازى سايات اقباسوۆ يەلەندى.
سايكەسىنشە, بارلىق جۇلدە جەڭىمپازدار مەن پەداگوگتارعا تەڭ تيەسىلى بولدى. انشىلەر اراسىنداعى «مۇحيت» جۇلدەسى ج.ەلەبەكوۆ اتىنداعى ەسترادا جانە تسيرك كوللەدجىنىڭ ستۋدەنتى بايان جۇبانوۆاعا (پەداگوگ رىستى سۇلەيمەنوۆا), قوبىزشىلارعا بەرىلگەن «قورقىت» جۇلدەسى الماتى مۋزىكالىق كوللەدجىنىڭ ستۋدەنتى ايدا بەكنازاروۆاعا (لاۋلا چەنەميسوۆا) تابىستالدى. اسەل قالەكەشوۆانىڭ شەبەرلىك سىنىبىندا وقيتىن اتىراۋ مۋزىكالىق كوللەدجىنىڭ ستۋدەنتى نۇرايسۇلۋ تالعاتوۆا تەحنيكالىق جاعىنان شىڭدالعان ۇزدىك ورىنداۋشى رەتىندە تانىلدى. مارەگە جەتكەن 42 ۇزدىك ورىنداۋشى مەن پەداگوگ ءارتۇرلى جۇلدەلەرگە يە بولدى. «كوشپەندىلەر اۋەنى» رەسپۋبليكالىق بايقاۋىنا تورەلىك جاساعان قازىلار القاسى بيىلعى قاتىسۋشىلاردىڭ دەڭگەيىنىڭ جوعارى ەكەنىن اتاپ ءوتىپ, كەلەشەكتە قازاق ونەرى تالابى دا, تالانتى دا بيىك جاڭا ەسىمدەرمەن تولىعا تۇسەتىنىنە سەنىم ءبىلدىردى.
ايگۇل احانبايقىزى,
الماتى
