ءداستۇرلى «بولات تۇرلىحانوۆتىڭ كۋبوگى» 2015 جىلدان بەرى حالىقارالىق كۇرەس فەدەراتسياسىنىڭ ءىس-شارالار جوسپارىنا ەنگەن. سونىمەن قاتار قازاقستاندا گرەك-ريم كۇرەسىنەن جالعىز مارتەبەسى بار تۋرنير سانالادى. كۇرەس تاريحىنا ۇڭىلسەك, اتالعان تۋرنير الەمدىك ارەنادا اتوي سالعان تالاي داڭقتى بالۋانداردىڭ توماعاسىن سىپىرعان ايتۋلى جارىس ەكەنىنە كوز جەتكىزەمىز. بۇل رەتتە ەل داڭقىن اسىرعان يۋري مەلنيچەنكو, مكحيتار مانۋكيان, باقتيار بايسەيىتوۆ, گەورگي تسۋرتسۋميا, نۇرباقىت تەڭىزباەۆ, نۇرماحان تىناليەۆ سىندى بوزكىلەم شەبەرلەرى وسى تۋرنيردەن قاناتتانعانىن ماقتانىشپەن ايتۋعا بولادى. بيىلعى تۋرنيرگە قوناق رەتىندە الەكساندر كارەلين, كاماندور مادجيدوۆ, كيم ەن نام, جاقسىلىق ۇشكەمپىروۆ جانە تاعى دا باسقا وليمپيادا چەمپيوندارى قاتىسادى.
ايتۋلى تۋرنيردە جەڭىمپاز دەپ تانىلعان سپورتشىلارعا «حالىقارالىق دارەجەدەگى سپورت شەبەرى» اتاعى بەرىلەدى. وعان قوسا جۇزدەن جۇيرىك دەپ تانىلعان جەڭىمپازدار مەن جۇلدەگەرلەرگە ۇيىمداستىرۋشىلار تاراپىنان قارجىلاي قوماقتى سىياقى تابىستالماق.
ەسكە سالساق, بولات تۇرلىحانوۆ – قازاق سسر-نىڭ ەڭبەك سىڭىرگەن جاتتىقتىرۋشىسى. سەمەي وڭىرىندە دۇنيەگە كەلىپ, 1956 جىلى قازاق دەنە شىنىقتىرۋ ينستيتۋتىن تامامداعان. سانالى عۇمىرىندا تالاي چەمپيونداردى باۋلىعان ايگىلى باپكەردىڭ ەسىمى ەل ەسىندە.
ارمان وكتيابر,
«ەگەمەن قازاقستان»
الماتى
