ەلباسى نۇرسۇلتان نازارباەۆتىڭ 2018 جىلدىڭ 5 قازانىندا جاريالاعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋى ەلىمىزدىڭ الدىندا تۇرعان اۋقىمدى مىندەتتەردى ناقتىلاعان, ولاردى جۇزەگە اسىرۋدىڭ ءتيىمدى جولدارىن كورسەتكەن ستراتەگيالىق قۇجات بولىپ تابىلادى.
جولداۋ ەلىمىزدىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرىنە جانە قازاقستاندىقتاردىڭ ءال-اۋقاتىن ودان ءارى ارتتىرۋ ىسىنە ارنالعان. سوندىقتان دا جولداۋدا كوتەرىلگەن ماسەلەلەردىڭ بارلىعى بۇگىنگى قوعامىمىز ءۇشىن اسا ماڭىزدى. اسىرەسە الەۋمەتتىك سالاعا باسا نازار اۋدارىلۋى, ونىڭ ىشىندە مۇعالىمدەر مارتەبەسىن كوتەرۋگە قاتىستى باستامالار حالىقتىڭ كوڭىلىنەن شىقتى دەپ ەسەپتەيمىز.
وسى ورايدا ەلباسى نۇرسۇلتان نازارباەۆ كەلەسى جىلى مۇعالىمدەردىڭ قوعامداعى بەدەلىن كوتەرۋ ءۇشىن ءتيىستى زاڭ جوباسىن دايىنداۋدى تاپسىردى. «كەلەسى جىلى «پەداگوگ مارتەبەسى تۋرالى» زاڭدى ازىرلەپ, قابىلداۋ قاجەت دەپ سانايمىن. بۇل قۇجات مۇعالىمدەر مەن مەكتەپكە دەيىنگى مەكەمەلەر قىزمەتكەرلەرى ءۇشىن بارلىق يگىلىكتى قاراستىرىپ, جۇكتەمەنى ازايتۋعا, ءجونسىز تەكسەرىستەر مەن مىندەتتەن تىس فۋنكتسيالاردان اراشالاۋعا ءتيىس», دەدى مەملەكەت باسشىسى.
سونداي-اق پرەزيدەنت جەرگىلىكتى بيلىكتىڭ «بارلىق جۇمىستى مۇعالىمدەردىڭ موينىنا ارتىپ قوياتىنىن» اتاپ كورسەتتى. «نە بولسا, سونىڭ ءبارى مۇعالىمدەرگە جۇكتەلەدى. سايلاۋدى دا مۇعالىمدەر وتكىزەدى, ۇگىت-ناسيحات كامپانياسىن دا مۇعالىمدەر جۇرگىزەدى. بۇل ءۇشىن ولارعا ەشنارسە تولەمەيدى. ولار جۇمىسىن ىستەپ, دايىندالۋى ءتيىس. بۇل از بولعانداي, ولاردى تەكسەرەدى», دەدى ەلباسى.
پرەزيدەنت بۇعان قوسا, ەلدە كەيبىر ايماقتاردا مەكتەپ جەتىسپەي, وقۋشىلار ءۇش اۋىسىمدا وقىپ جاتقانىن سىناپ, بۇل ماسەلەنى شەشۋ ءۇشىن ۇكىمەتكە 2019-2021 جىلدارعا ارنالعان بيۋدجەتتەن قوسىمشا 50 ميلليارد تەڭگە قاراستىرۋدى تاپسىردى.
مەن دە وسى ءبىلىم سالاسىندا قىزمەت ەتىپ كەلە جاتقان مۇعالىم رەتىندە ەلباسىنىڭ جولداۋىنا قولداۋ بىلدىرگىم كەلەدى. ەلباسىنىڭ پەداگوگ ماماندارعا كورسەتكەن قولداۋىنىڭ ارقاسىندا, قازاقستان دامىعان 30 ەلدىڭ قاتارىنا قوسىلاتىنىنا سەنەمىن.
حالقىمىزدىڭ باقۋاتتى ءومىر ءسۇرۋى جانە ەلىمىزدىڭ دامىعان 30 ەلدىڭ قاتارىنا قوسىلۋى باستى مىندەت. وسىناۋ اسىل مۇرات جولىندا ءبىزدىڭ ەلىمىز زامانا سىنىنا تەگەۋرىندى ءىس-قيمىلىمەن لايىقتى جاۋاپ بەرىپ كەلەدى. ءيا, بۇگىنگى كەزەڭنىڭ تالابى وڭاي ەمەس. بىرلىگىمىز مىزعىماسا, ىنتىماعىمىز ىدىراماسا, ءبىز ءۇشىن الىنبايتىن اسۋ بولمايدى. سوندىقتان دا قوعامىمىزعا تاتۋلىق پەن رۋحاني كەلىسىمنىڭ ورنىعۋىن ەلباسى ۇستانعان ساياساتتىڭ ارقاسى ەكەنىن ءتۇسىنىپ, ورتاق مۇددە جولىندا بىرلەسە جۇمىس ىستەۋىمىز كەرەك.
مۇحتار اۋەزوۆ ايتقانداي, «حالىق پەن حالىقتى تەڭەستىرەتىن – ءبىلىم». سوندىقتان ءبىلىم باسەكەسىنە قابىلەتتى شاكىرت تاربيەلەۋ – پەداگوگتاردىڭ الدىنا قويعان باستى ماقساتى.
ءبيبى جازىقباەۆا,
الاتاۋ باتىر اۋىلى
س.كاتتەبەكوۆ اتىنداعى
جالپى ورتا مەكتەپتىڭ باستاۋىش سىنىپ مۇعالىمى
تۇركىستان وبلىسى, شاردارا اۋدانى
