وبلىس باسشىسى قىرىمبەك كوشەرباەۆ وتكىزگەن القالى جيىندا سۋ تاسقىنىنان شىعىنسىز ءوتۋ جايى تالقىلاندى.
وبلىستىق جۇمىلدىرۋ دايىندىعى باسقارماسىنىڭ باسشىسى اسىلبەك شامەنوۆ سىرداريا بويىندا 56 ىقتيمال قاۋىپتى ايماق انىقتالعاندىعىن ايتتى. ولارعا 109 جاۋاپتى مەكەمە بەكىتىلىپ, وتىن مەن شىعىن ماتەريالدارى ساتىپ الىنعان. 79 ەۆاكۋاتسيالىق جانە 99 قابىلداۋ پۋنكتى, سونداي-اق, 2 «قازاۆياقۇتقارۋ» تىكۇشاعى قىزمەت كورسەتۋگە دايىن.
- بوگەتتەر مەن قورعانىس بەكىنىستەرىنىڭ جاعدايىن زەرتتەۋ بارىسىندا 37 نىسان انىقتالدى. ونىڭ ىشىندە 25-ءى ءبىرىنشى كەزەكتە جوندەۋدى قاجەت ەتەدى. قازالى اۋدانىندا 18 نىسان جوندەۋدەن ءوتتى, قالعانى بويىنشا جۇمىس جۇرگىزىلۋدە, - دەدى باسقارما باسشىسى.
وبلىستىق تج دەپارتامەنتى باستىعىنىڭ مىندەتىن اتقارۋشى اسقار تولەشوۆ قىس مەزگىلىندە وڭىردە 232 ادام مەن 32 ارنايى تەحنيكا جۇمىلدىرىلىپ, 13 جىلىتۋ پۋنكتى مەن راديو جانە تەلەفونمەن جابدىقتالعان 3 مەديتسينالىق-قۇتقارۋ پۋنكتى جۇمىس ىستەيتىندىگىن باياندادى.
وبلىس اكىمى جاۋاپتى تۇلعالارعا سىرداريا وزەنىنە تاۋلىك بويى مونيتورينگ جۇرگىزىپ, جەكە قۇرامدى تۇراقتى دايىندىقتا ۇستاۋدى بۇيىردى. وبلىستىق جانە رەسپۋبليكالىق ماڭىزى بار جولداردا قاتتى سۋىقتا جول-كولىك قاتىناستارىن توقتاتۋدى تاپسىردى.
باقتيار تايجان,
«ەگەمەن قازاقستان»
قىزىلوردا وبلىسى
